IMAMAT 7:12 - KITAB NU TUMPU ALLA LELE MA'IMAI'

¹² De koloban aijo' osombahkon bau pontalima kase, saba' tiba binatang aijo' tionyo ahi' okolobanakon suele na roti anu madi' ogalo'i ragi. Roti aijo' timbali opodaka' na mongkompon labu tiba lanya' zaitun, kabai roti anu ise' pinanggang anu osapui nu lanya', kabai labu na obau kukis ogalo'i nu lanya' nu zaitun.

IMAMAT 7:12 ပူးပေါင်းရင်းမြစ်များ

2 TAWARIKH 29:31

Ilapas na aijo' pinoto'imo i Hizkia, “Kalana belemiu uuka aiya pinosadiamo samata-mata mokalaja hi Tumpu, sahingga anu osombahkon salaku pontalima kase nu belemiu, belemiu tionyo ahi' momboa mae koloban i Laigan nu Tumpu.” Lantas iwi-iwi' na mian anu i kiijo' nomboamo anu osombahkon haha aijo', ka' daagi' mule' suele ko mian nomboa kasanangan nu kinyonyoanyo binatang anu osombahkon salaku koloban anu opotunu.

2 TAWARIKH 33:16

Lapas aijo' pinokopianannyomo na mezbah tampat ponsomban Tumpu, lantas nonsombahkonmo kiijo' koloban anu bau pompodame ka' koloban bau pontalima kase. Iwi-iwi' na mian nu Yehuda pinoto'inyomo da monsombah Tumpu Allah Israel.

NEHEMIA 12:43

Sinaa aitu manjoo' hondo na koloban anu sinombahkon hi Tumpu. Mian da'isan binalame-lame'mo kalana Tumpu Allah nompobilahimo kantumuu'an nu aha. To bou-boune ka' suele to ana-anak hingga-hinggatmo nolameanmo, ka' elok nu aha, ka' mule' taligala nu aha mau majo'onmo daagi' kahongoan.

MAZMUR 107:8

Pantasmo na aha montalima kaseh hi Tumpu kalana kalibosanNyo, kalana apa-apaa na anu binau-Nyomo, anu mompobangang hondo manusia.

MAZMUR 116:17

Aku momboamo koloban bau pontalima kaseh hi Belento, ka' mompotoka do'a hi Belento.

MAZMUR 50:23

Mian anu monsombahkon bau pontalima kaseh salaku bau kolobannyo, ia aijo' na moholomati Aku; ka' mian anu momposadiai jalan da kajalanan-Ku Ku potiju'je hi ia na kasalamatan anu lengkat aiya hi beleng-Ku.”

YEREMIA 33:11

Panyo itampat haha aijo' saidi' mae po ule'mo ohongo na lewo' nu mian anu lame' ka' anu binilahimo ka' mule' lewo' nu mian anu nombaumo babauon mo'osoa. Ka' ohongo mule' na nyanyian nu to mia-mian anu momboa koloban bau pontalima kase i Laigan-Ku. Aha motataemo, ‘Pontalima kasemo hi Tumpu Anu Balakuasa hondo, kalana Ia manonong ka' mule' kalibosan-Nyo sampe toka sidu-sidutu'.’ Lipu' aiya Ku pomajumo na kantumuu'an nu aha susumo momonanyo naipuan mae. Aku, Tumpu notataemo.”

HOSEA 14:2

Pinsusule'mo mae hi Tumpu na belemiu o bansa Israel! Dosa' nu belemiu nonsaduakonmo sahingga belemiu tinompaleda'mo ka' tinombahangkangmo.

IMAMAT 2:4

De anu osombahkon aijo' roti anu tinunu i pontunuan, roti aijo' obau boli ogalo'i nu ragi. Roti aijo' timbali opodaka', labu anu ma'ima' hondo na o adon tiba lanya' nu zaitun, kabai yo kukis anu ola osauti nu lanya' nu zaitun.

IMAMAT 2:5

De anu osombahkon aijo' roti anu opanggang i tampat pompanggangan, roti aijo' tionyo ahi' labu anu ma'ima' hondo na obau tiba lanya' nu zaitun panyo madi' timbali ogalo'i ragi.

IMAMAT 22:29

De belemiu monsombahkon koloban bau pontalima kase hi Tumpu, bau na aijo' ka' batuki na atulannyo da koloban nu belemiu otalima.

IMAMAT 6:16

Labinyo nu labu tionyo ahi' obaumo roti anu madi' ko raginyo ka' okaan nu to ima-imam i tampat anu samata-mata bau pongkaanan, aijo'mo i natan nu Kemah nu Tumpu. Aijo'mo na bagi nu to ima-imam anu binee'mo nu Tumpu hi aha anu ingala i koloban kaanon. Kaanon aijo' susi' hondo, sumomo koloban anu bau pongampuni dosa' ka' koloban bau polugi'i.

IMAMAT 7:15

Antoknyo aijo' tionyo ahi' okaanmo i sinaanyo binatang aijo' sinombahkon, anu sangkiding madi' timbali opotuha' toka dodop subu.

AMOS 4:5

Lako'mo monsombahkon roti salaku pompoita talima kase hi beleng-Ku ka' lako'mo sisik hi mian saba' belemiu nompaka tuangimo anu osombahkon! Tantu aijo'mo na anu oka'i ma'i nu bau nu belemiu!

NOMBILANGMO 6:15

Ia tionyo ahi' suele monsombahkon sa'angu' na kalanjang na roti anu binau madi' ginalo'an nu ragi, aijo'mo roti timpodon anu binau labu ginalo'an nu lanya' zaitun, ka' kukis anu monipis anu sinautan nu lanya' zaitun. Ka' sangga'at mule' tionyo ahi' nu sombahkon koloban kaanon ka' koloban anu o inum.

LUKAS 17:16

Lantas i ahop i Yesus ia nonsombah, ka' nontalima kase hi Ia. Mian aijo' mian nu Samaria.

LUKAS 17:18

Kadaka' ola mian nu santano'an aiya na ninsusule' mae nontalima kase hi Tumpu?”

ROMA 1:21

Mian monsumbu' Tumpu, panyo mian madi' mongadati Ia salaku Tumpu ka' madi' mule' montalima kaseh hi Ia. Ola mule' ahi' mian mompotutugakon anu mamisa-misa'; kinyonyoa nu aha pinintungmo.

EFESUS 5:20

Mau mule' pa' apaa tionyo komiu saja' montalima kase hi Tumpu Tuuma i uno nu sanggo i Yesus Kristus Tumpunto.

IBRANI 13:15

Kalana aijo', binuka'mo i Yesus na jalan sahingga kita saja'mo ahi' mompuji-puji' Tumpu; aijo' salakumo koloban pontalima kasento hi Ia, anu osombahkonto otaloakon nu biwi bau pompopodaka' sanggo-Nyo.

1 PETRUS 2:5

Belemiu sumomo to batu-batu anu tumuu'. Kalana aijo' tionyo ahi' da belemiu opake bau pompotinjo Laigan nu Tumpu, aijo'mo posa'angu'an nu mian anu pinalesayamo. Desumo aitu yo belemiu timbalimo to ima-imam, anu tumuu' matungka' bau kapentingan nu Tumpu Allah, ka' kalana i Yesus Kristus nonsombahkonmo butongnyo binau koloban rohani anu nuka'ima'i nu kinyonyoa nu Tumpu.