IMAMAT 5:12 - KITAB NU TUMPU ALLA LELE MA'IMAI'

¹² Labu aijo' tionyo ahi' oboa hi imam. Imam tionyo ahi' mongala sangkakup na labu aijo' salaku tanda saba' iwi-iwi' kinolobanakonmo hi Tumpu. Labu anu sangkakup aijo' tionyo ahi' opotunu i mezbah salaku koloban kaanon. Aijo'mo na kolobannyo bau pongampuni dosa'.

IMAMAT 5:12 ပူးပေါင်းရင်းမြစ်များ

IMAMAT 1:13

Lantas mian aijo' tionyo ahi' mombaso'i isi nu kompongnyo ka' pa'a nu binatang aijo'. Lapas aijo' imam tionyo ahi' monsombahkonmo iwi-iwi' hi Tumpu ka' mompotunu aijo' i mezbah. Hongohisnyo nu koloban anu pinotunu aijo' momposanangmo kinyonyoa nu Tumpu.

IMAMAT 1:17

Lapas mae tomonsi' aijo' tionyo ahi' o sampan i pu'un nu polipiknyo panyo polipiknyo madi' timbali opolaus na monsampan. Lantas tomonsi' aijo' tionyo ahi' opotunu aijo' i mezbah. Hongohis nu koloban aijo' momposanangmo kinyonyoa nu Tumpu.

IMAMAT 1:9

Lantas mian aijo' tionyo ahi' mombaso'i isi nu kompongnyo tiba pa'anyo nu sapi' aijo', ka' imam anu mokalaja tionyo ahi' mompotunu iwi-iwi'. Hongohisnyo nu koloban anu pinotunumo aijo' momposanangmo kinyonyoa nu Tumpu.

IMAMAT 2:16

Imam tionyo ahi' mompotunu sambagian na gandum aijo' tiba lanya' ka' iwi-iwi' na kamangiannyo salaku bau pontandai saba' iwi-iwi' aijo' sinombahkonmo hi Tumpu.

IMAMAT 2:2

Ia tionyo ahi' momboa hi to ima-imam lee' i Harun. Imam anu mokalaja tionyo ahi' mongala sangkakup na labu aijo' tiba lanya' nu zaitun ka' iwi-iwi' na kamangiannyo, lantas nu potunumo i mezbah salaku tanda saba' iwi-iwi' aijo' sinombahkonmo hi Tumpu. Nohongo nu koloban anu okaan aijo' momposanangmo kinyonyoa nu Tumpu.

IMAMAT 2:9

Roti aijo' sambagian nu ala nu Imam lantas opotunumo i mezbah salaku tanda saba' iwi-iwi' sinombahkonmo hi Tumpu. Nohongnyo momposanangmo kinyonyoa nu Tumpu.

IMAMAT 3:11

Imam anu mokalaja tionyo ahi' mompotunu iwi-iwi' aijo' i mezbah bau koloban kaanon anu osombahkon hi Tumpu.

IMAMAT 3:4

dampilannyo tiba lompo'nyo ka' bahagian anu ma'ima' hondo i atenyo.

IMAMAT 4:35

Lapas aijo' iwi-iwi' na lompo'nyo nu binatang aijo' tionyo ahi' o ala susumo anu kinolobanakonmo bau pompodame. Lompo'nyo aijo' tionyo ahi' opotunu i mezbah, hingga-hinggat tiba koloban kaanon anu osombahkon hi Tumpu. Sumo aijo' na imam monsombahkon koloban bau pontobus dosa' nu mian aijo', sahingga ia nu ampunimo nu Tumpu.

IMAMAT 5:11

De mian anu ko sala'nyo madi' moko ala momposadia tomonsi' sapatau behenyo tiba lakinyo kabai tomonsi' malapati' bau koloban pongampuni dosa', ia tionyo ahi' momboamo labu sa'angu' na kilogram. Labu aijo' madi' timbali ogalo'i nu lanya' nu zaitun kabai tiba kamangian, kalana koloban aijo' te koloban bau pongampuni dosa', misa' koloban kaanon anu osombahkon.

IMAMAT 5:13

Sumo aijio' na imam monsombahkon koloban bau pontobus dosa' nu mian aijio', sahingga ia nu ampunimo nu Tumpu. Labu labinyo aijo' baumo bagi nu imam, susumo biasa obau mongkolobanakon gandum.

IMAMAT 6:15

Ia tionyo ahi' mongala sangkakup na labu anu ma'ima' hondo tiba lanya' ka' iwi-iwi' na kamangian anu opalalui lantas opotunumo i mezbah salaku bau pontandai saba' iwi-iwi' na koloban aijo' sinombahkonmo hi Tumpu. Nohongnyo nu koloban aijo' momposanangmo kinyonyoa nu Tumpu.

NOMBILANGMO 5:26

Lantas ia tionyo ahi' mongala sangkakup na labu salaku tanda saba' iwi-iwi' na labu aijo' sinombahkonmo, lantas opotunumo i mezbah. Ahennyo uee aijo' opo'inumo i boune aijo'.

SISIKON NU TO RASUL-RASUL 10:4

I Kornelius nontonto'i Malaikat aijo' ka' nabuhukmo lantas notatae, “Daagi' ko apaa Tuan?” Tinaaman nu malaikat aijo', “Do'aum ka' ka'ima'an nu kinyonyoaum tinalimamo nu Tumpu ka' Tumpu nonginau'mo beleyum.

EFESUS 5:2

Kantumuu'anum maunyo ahi' okinyonyoai nu kalibosan susumo pongkalibosi i Kristus kita. Ia nongkulubanakonmo butong-Nyo kalana kita, salaku palasombahan anu manohong ka' momposanang kinyonyoa nu Tumpu.