IMAMAT 17:6 - KITAB NU TUMPU ALLA LELE MA'IMAI'

⁶ Imam tionyo ahi' momdudu'akon baso' nu binatang aijo' i sulapa'nyo opa-opat nu mezbah i ahop nu sabatan nu Kemah nu Tumpu lantas opotunu na lompo'nyo da hongohisnyo momposanangmo kinyonyoa nu Tumpu.

IMAMAT 17:6 ပူးပေါင်းရင်းမြစ်များ

NOSABATMO 29:13

Lapas aijo' ala na tohitisnyo iwi-iwi', anu ma'ima' hondo ka' atenyo anu ma'ima' hondo, ka' ohu-ohua' na dampilannyo tiba lompo'nyo ka' potimpas iwi-iwi' aijo' i mezbah ka' tunuimo ka' osombahkonmo mae hi beleng-Ku.

NOSABATMO 29:18

Osombahkon iwi-iwi' na domba lakinyo aijo' i mezbah, salaku koloban anu otunui. Hongohisnyo aijo' momposanangmo kinyonyoang-Ku.

YEHEZKIEL 44:15

Tumpu Anu Matangkas na Kuasanyo notatae, “Tempo'nyo bansang Israel nohikumo mae Aku, aha to ima-imam Lewi anu lee' mae i Zadok na tinataap ahi' nontuluti apaa na anu pinalentahkon-Ku okalaja i Laigan-Ku. Kalana aijo' aha ahi' na tionyo mombau anu Ku palentahkon ka' toka mae i ahop-Ku monsombahkon lompo'nyo tiba baso' nu sinin na koloban.

IMAMAT 17:5

Kahanda' nu palentah aijo' da bansa Israel momboa mokiijo' i Kemah nu Tumpu iwi-iwi' na binatang anu osombahkon, kalana biasa nu kolotmo nu aha i pongale'an. Aha tionyo ahi' momboa anu osombahkon aijo' hi imam i ahop nu sabatan nu Kemah nu Tumpu ka' o kolot ikiijo' bau koloban pompodame.

IMAMAT 3:11

Imam anu mokalaja tionyo ahi' mompotunu iwi-iwi' aijo' i mezbah bau koloban kaanon anu osombahkon hi Tumpu.

IMAMAT 3:13

Ikiijo' ia tionyo ahi' mompotiik limanyo i ubak nu mee' aijo' lantas o kolot i ahop nu Kemah. Imam tionyo ahi' mondudu'akon baso' nu binatang aijo' i opa-opat na sulapa'nyo nu mezbah.

IMAMAT 3:16

Imam anu mokalaja tionyo ahi' mompotunu iwi-iwi' aijo' i mezbah. Hongohisnyo nu koloban anu okaan aijo' momposanangmo kinyonyoa nu Tumpu. Iwi-iwi' na lompo'nyo nu binatang aijo' osombahkon hi Tumpu.

IMAMAT 3:2

Mian anu monsombahkon aijo' tionyo ahi' mompotiik limanyo i ubak nu binatang aijo' lantas o kolot i ahop nu sabatan nu Kemah nu Tumpu. To ima-imam lee' i Harun tionyo ahi' mondudu'akon baso' nu sapi' aijo' i sulapa'nyo opa-opat nu mezbah aijo'.

IMAMAT 3:5

Iwi-iwi' aijo' hingga-hinggat tiba koloban anu opotunu sangga'at tionyo ahi' opotunu i mezbah. Hongohisnyo nu koloban anu okaan aijo' momposanangmo kinyonyoa nu Tumpu.

IMAMAT 3:8

Ikiijo' ia tionyo ahi' mompotiik limanyo i ubak nu domba aijo' lantas o kolot i ahop nu Kemah. Lantas imam tionyo ahi' mondudu'akon baso' nu domba aijo' i opa-opat na sulapa'nyo nu mezbah.

IMAMAT 4:31

Iwi-iwi' na lompo'nyo nu binatang aijo' tionyo ahi' o ala susumo anu kinolobanakonmo bau pompodame. Lompo'nyo aijo' tionyo ahi' nupotunu nu imam i mezbah, da hongohisnyo momposanang kinyonyoa nu Tumpu. Sumo aijo' na Imam monsombahkon koloban pontobus dosa' nu samian na layat sahingga mian aijo' nu ampunimo nu Tumpu.

NOMBILANGMO 18:17

Panyo sapi', domba ka' mee' anu momona pino anak madi' timbali otobus. Potuu'on aijo' samata-mata Aku na tumpunyo ka' tionyo ahi' okolobanakon. Dudu'akon na baso'nyo i mezbah ka' potunu na lompo'nyo salaku bau koloban. Hongihisnyo momposanangmo kinyonyoang-Ku.