IMAMAT 14:21 - KITAB NU TUMPU ALLA LELE MA'IMAI'

²¹ De mian aijo' kasiasi ka' madi' moko ala montanggungi koloban saba' koloban bau polugi'i ia timbali momboa ola sa'angu' na anak nu domba lakinyo anu osombahkon obee' hi Tumpu. Ka' mule' sangga'at labu sa'angu' na kilogram ogalo'i nu lanya' zaitun bau koloban kaanon, ka' sa'angu' na liten lanya' zaitun anu obagi totolu' sambagian na obee'.

IMAMAT 14:21 ပူးပေါင်းရင်းမြစ်များ

AYUB 34:19

Ia madi' montinjohi to tomu-tomundo, kabai lebe mompopodaka' mian anu kaya ka' madi' montapa-tapali mian anu talalo hodo kasiasi. Kalana aha iwi-iwi' Ia na nompotimbali.

AMSAL 17:5

Ihe an mongkokojoi mian anu talalo kasiasi; mongalu Tumpu anu nompotimbali ia. Ihe na ola bilahi montoa kasusa'an nu mian, tionyo mohumpak hukuman.

AMSAL 22:2

Mian kaya ka' mian anu kasiasi daagi ko sa'angu' na han anu pokakana: Tumpu na anu nompotimbali aha iwi-iwi'.

YEHEZKIEL 46:7

Tiba sapi' lakinyo ka' mule' mee' lakinyo ia tionyo monsombahkon mule' ahi' gandum konjoo'nyo 17,5 liter bau ponggampai toto sa'angu' na sapi', ka' mule' toto sa'angu' na anak nu domba yayamo anu okahanda'i na konjoo'nyo nu gandum. De mongkolobanakonmo gandum tionyo ahi' ogampai totolu' na liter lanya' nu zaitun na suele osombahkon.

IMAMAT 1:14

De anu osombahkon sa'angu' na tomonsi', tionyo ahi' sapatau kabai malapati' bata'nyo.

IMAMAT 12:8

De boune aijo' madi' moko ala mompotouka sa'angu' na anak nu domba, yo ia tionyo ahi' momboa ohua' na tomonsi' malapati' anu daagi' bata'nyo kabai tomonsi' sapatau anu daagi' bata'nyo; sa'angu' bau koloban anu opotunu ka' sa'angu' mule' na koloban bau pongampuni dosa'. Imam tionyo ahi' sabole-bole mombau adatnyo bau pompobelesi'i humimi' nu boune aijo', sahingga ia timbalimo belesi'.

IMAMAT 14:10

Toka i sinaa ko ialunnyo mian aijo' tionyo ahi' momboa ohua' na anak nu domba lakinyo ka' sa'angu' na anak nu domba behenyo umunnyo anu sataunmo, ka' toto sa'angu' madi' ko panyakitnyo. Ka' suele mule' labu totolu na kilogram anu ginalo'anmo nu lanya' zaitun ka' saliten na lanya' nu zaitun anu obagi totolu', sambahagian na oboa mae.

IMAMAT 14:22

Ia tionyo ahi' momboa ohua' na tomonsi' malapati anu daagi' bata'nyo kabai sapatau anu daagi' bata'nyo: sa'angu' bau koloban pongampuni dosa' ka' sa'angu' mule' bau koloban anu opotunu.

IMAMAT 27:8

De mian anu binalaniatmo talalo kasiasi ka' susa' na mombayan olinyo anu tinantukanmo, ia tionyo ahi' momboa mian anu sinombahkonmo hi Tumpu aijo' mamba hi imam. Imam tionyo ahi' montantukan olinyo anu lebe dengke ka' anu nupoko ala nu mian aijo'.

IMAMAT 5:11

De mian anu ko sala'nyo madi' moko ala momposadia tomonsi' sapatau behenyo tiba lakinyo kabai tomonsi' malapati' bau koloban pongampuni dosa', ia tionyo ahi' momboamo labu sa'angu' na kilogram. Labu aijo' madi' timbali ogalo'i nu lanya' nu zaitun kabai tiba kamangian, kalana koloban aijo' te koloban bau pongampuni dosa', misa' koloban kaanon anu osombahkon.

IMAMAT 5:7

Panyo de mian anu ko sala'nyo madi' moko ala momposadia domba kabai mee' bau pontobus dosa'nyo, ia tionyo ahi' momboa tomonsi' sapatau lakinyo tiba behenyo kabai tomonsi' malapati' anu daagi' bata'nyo, sa'angu' bau koloban pongampuni dosa' ka' sa'angu' mule' bau koloban anu opotunu.

LUKAS 6:20

I Yesus nontoa anu saja' mombatuki Ia, lantas notatae, “Bila-bilahi na komiu to mia-mian kasiasi, kalana komiu minsoop mian anu palesayamo hi Tumpu!

2 KORINTUS 8:12

De komiu halala' na mombee' saba' nutalima nu Tumpu na anu obee' aijo' iyamo na anu daagi' hi belemiu, misa' pa' apaa na anu madi' hi belemiu.

2 KORINTUS 8:9

Kalana osumbu' miu hondo kita talalo nukalibosi i Yesus Kristus Tumpunto. Ia kaya, panyo Ia nompotimbalimo butong-Nyo kasiasi kalana kapentingan miu da kalana Ia kinasiasimo aijo', komiu timbalimo kaya.

1 SAMUEL 2:8

I uno nu kasusa'an ihangkatNyomo na mian anu madi' ko apa-apaa, i uno nu kasansala'an pinobebasNyomo na mian anu madi' kokaliangannyo. Aha pinotimbalimo sangalu nu to mia-mian tulunan nu mian daka', ka' binee'anmo pangkat anu o angga'i. Paningkokoan nu dunia, nu Tumpu, ka' aita'i buannyo na pinombauanNyo dunia.