IBRANI 9:28 - KITAB NU TUMPU ALLA LELE MA'IMAI'

²⁸ Sumo aitu mule' na i Kristus ola minsan na sinombahkon salaku koloban mompobelesi dosa' nu mian da'isan. Ia po'ule'je toka kopinduannyo, misa' pa' kahanda' mongulusmo palakala nu dosa', panyo momposalamatmo to mia-mian anu saja' montanda'i katokaan-Nyo.

IBRANI 9:28 ပူးပေါင်းရင်းမြစ်များ

YESAYA 25:9

Tempo'nyo aijo' mian motataemo, “Memang totu'u, Ia ahi' na Tumpu-nto; Iamo ahi' ia na anu ota-otanda'into, da kita oposalamat. Totu'umo ahi' aiyamo na Tumpu; Iamo ahi' ia na anu ota-otanda'into. Uuka aiya poloaismo lame-lame', kalana Ia momposalamatmo kita.”

IMAMAT 10:17

“Kadaka' koloban bau pongampuni dosa' aijo' madi' kinaan nu belemiu i tampat anu susi'? Koloban aijo' talalo hondo susi', Tumpu nombee'mo hi belemiu, da dosa' nu aha mian Israel o ampunimo.

ZAKHARIA 14:5

Belemiu mopalaije mamba motulu i bangka'nyo anu nobagimo ohua' na puge'nyo titinimbalimo ohua'. Belemiu mopalaije susumo mompolee' nu belemiu kikinolulu'mo tempo'nyo kapalentahan i Uzia, tomundo' nu Yehuda. Lantas tokamo na Tumpungku nutuntuni mae nu malaekat iwi-iwi'.

NOMBILANGMO 18:1

Tumpu notataemo hi Harun, “Beleyum, to ana-anak nu beleyum tiba aha mian nu Lewi tionyo ahi montanggungi kasala'an apaa na anu timbali i Kemah-Ku, panyo ola beleyum tiba to ana-anak nu beleyum na tionyo ahi' montanggungi de sala' na pakalaja'an nu to ima-imam.

NOMBILANGMO 18:23

Otampu'uni uuka aiya ola aha mian nu Lewi na timbali mongkalesang Kemah-Ku ka' anu montanggungi hondo pakalaja'an aijo'. Atulan aijo' opake suele hi lee' nu belemiu sampe toka sidu-sidutu'. Aha mian nu Lewi madi' ko pombagian apa-apaa i Israel,

MATIUS 20:28

Pokakana sumo Anak nu Mian aijo' suele Ia toka misa' da okalibosi, panyo da mongkalibosi, ka' mombee' nyawa-Nyo bau pompobebas mian da'isan.”

MATIUS 25:31

“De Anak Mian toka sumo Tomundo nu sampo jaalan nu malaikat-Nyo iwi-iwi', Ia sumuhang i kasuhangan-Nyo anu opopodaka'.

MATIUS 26:28

Kalana aiyamo na baso'-Ku anu mompokododo apaa na anu jinanji'mo nu Tumpu – baso' anu binubusakon bau kapentingan nu mian da'isan da bau pongampuni dosa' nu aha.

YOHANES 14:3

De lapasmo na Aku mamba montoukai tampat miu, Aku po'ule'je mae minsusule' ka' molabot komiu, da iyana kajojoongan-Ku, i kiijo' suele na kajojoongan miu.

SISIKON NU TO RASUL-RASUL 1:11

“Hee, to mia-mian nu Galilea,” koonyo nu ua'aha na mian haha aijo', “kadaka' komiu ola tuminjo atina' monsinda langit? I Yesus anu tinoa miu tinalahangkatmo nokiita' i suluga' atina' i ahop miu, po'ule'je minsusule' mae susumo atina' anu tinoamo miu u'uka aiya.”

ROMA 3:25

Tumpu nongkolobanakonmo i Yesus Kristus, da kalana Ia sinilaka aijo' mian natantumo pinobebasmo i kasala'an de aha palesaya hi Ia. Tumpu nombau sumo aijo' da mompotoa ka'adinan-Nyo. Kalana tempo' anu i hikuhakonmo Tumpu nonsabalakonmo dosa-dosa' nu mian, sahingga Ia madi' nohukum aha.

ROMA 5:15

Panyo ua-ua'aha aijo' madi' pokakana; kalana balakat nu Tumpu lebe daka' de opokakanakon tiba panggaga i Adam anu madi-madi' mohongo-hongo. Panggaga nu samian monsaduakon mian da'isan mate. Lebe daka' mule' na balakat nu Tumpu tiba kasalamatan anu binee'-Nyo hi mian anu sumo aijo' na konjoo'nyo, kalana ka'ima'an nu kinyonyoa nu samian, aijo'mo i Yesus Kristus.

ROMA 6:10

Kasilakaan anu ingoa'an i Kristus aijo'mo kasilakaan kalana dosa'. Aijo' ola minsan na tinimbali toka sidu-sidutu'. Ka' kantumuu'an anu ingoa'an-Nyo uuka aiya, kantumuu'anmo bau bagi nu Tumpu.

ROMA 8:23

Ka' misa' ola songko-songko na dunia na motusa'; kita suele motusa' i uno nu kinyonyoanto. Kita nohumpakmo Roh nu Tumpu Allah, panyo kita daagi' po'ule' montanda'i Tumpu mompobebas butongto iwi-iwi' ka' mompotimbali kita to ana-anak-Nyo.

ROMA 8:3

Apaa na anu madi' opoko bau nu atulan nu agama, kalana kita mian madi' moko ala mombau, aijo' binaumo nu Tumpu. Tumpu nohungku'imo kuasa nu dosa' anu i uno nu sipat nu mian, aijo'mo nonsai posi Anak-Nyo na tinoka nimbalu-balu sumo mian anu baladosa' da mongalini dosa'.

1 KORINTUS 1:7

sahingga sa'angu' pe'e na balakat madi' maga'a hi komiu, hau-haunyo komiu montanda'i Tumpunto i Yesus Kristus toka ka' nutoa nu mian iwi-iwi'.

1 KORINTUS 15:54

De butong anu timbali silaka obolosimo nu butong anu madi' silaka, ka' butong anu lengkat i dunia aiya obolosimo nu butong anu lengkat mae i suluga', tempo'je aitu ka' timbalimo apaa na anu tinulismo i Kitab nu Tumpu, “Kapatean i hungku'anmo; ka'untungan i humpakmo!”

1 TESALONIKA 1:10

Aha notatae mule' mongkona mosia na komiu montaha'imani katokaan nu Anak nu Tumpu lengkat mae i suluga', aijo'mo i Yesus, anu sinilakamo po'ule'mo pinotumuu' nu Tumpu. I Yesusmo ai-aijo' na anu momposalamat kita i tambuha' nu Tumpu anu saidi' mae toka.

2 TESALONIKA 2:1

Mongkona katokaan nu Tumpunto i Yesus Kristus, ka' mongkona kita saidi' mae Nu pisihukmo da jojoongmo tiba Ia, aiyamo na anu ku poita sabole-bole hi komiu:

2 TIMOTIUS 4:8

Ka' uuka aiya palasen nu ka'untungan nopadeka' nontanda'imo aku. I Sinaa Kakiamatan Tumpu, Mian Kopian anu adin aijo' mompotalimaje palasen aijo' hi belengku, kalana aku tumuu' mompaha ima'mo tiba Tumpu. Ka' misa' ola aku na montalima palasen aijo', panyo suele iwi-iwi' mian anu mongindi hondo montanda'i katokaan nu Tumpu.

TITUS 2:13

Uuka aiya kita hau-haunyomo montanda'i Sinaa anu o ima-imaninto aijo'; i Sinaa aijo' dunia montoaje i Yesus Kristus anu talasanggo; aijo'mo Tumpu Anu Matangkas na Kuasanyo ka' Tomundo anu Momposalamat kita.

IBRANI 1:14

Desumo aijo', to mala-malaikat haha aijo' ihe ahi' na sabenannyo na aha? Aha aijo'mo na to roh-roh anu mombau apaa na anu nu pokauhakon nu Tumpu, ka' anu nu palentah nu Tumpu Allah, da montulungi to mia-mian anu mohumpak kasalamatan.

IBRANI 10:10

I Yesus Kristus nombaumo apaa na anu nukahanda'i nu Tumpu Allah ka' butong-Nyo sinombahkonnyomo, salaku koloban. Kalana Ia nonsombahkonmo sumo aijo', ka' Ia nombaumo sumo aijo' ola ninsan sampe toka sidu-sidutu'; kita iwi-iwi' pinobelesi'mo i dosa'.

IBRANI 12:14

Bala usaha da tumuu' simbulu tiba to mia-mian. Ka' Bala usaha mule' da tumuu' susi', na palesaya hi Tumpu. Kalana madi' ko samian pe'e na moko ala montoa Tumpu de madi' ia tumuu' sumo aijo'.

IBRANI 2:3

Pakalaus mule' de kasalamatan anu lebe daka' na angga'nyo ka' anu molingkuduimo potuunon haha aijo'! De kita madi' saja' monginau' kasalamatan aijo', tantu kita madi' molapas i hukuman. Kalana Tumpu na momonanyomo nompoto'i kasalamatan aijo', ka' to mia-mian anu momonanyo nohongo nomponyata'mo anu totu'unyo hi kita.

IBRANI 4:15

Imam Daka'to anu talasanggo aijo' misa' imam anu madi' moko ala mongoa'i apa-apaa na anu madi' opoko ala o oa'into. Panyo Ia sinobanmo i uno nu iwi-iwi' na han, pokakana sumo kita; ola Ia madi' nombau dosa'.

IBRANI 5:9

Sahingga salatan Ia pinotimbalimo anu momposalamat totu-totu'u, Ia tinimbalimo pinolengkatan nu kasalamatan anu sampe toka sidu-sidutu' kona hi iwi-iwi'na mian anu tulu-tulutan hi Ia,

IBRANI 7:27

Ia madi' sumo to ima-imam daka' sangga'at, anu toka sansina-sinaa tionyo monsombahkon koloban kalana posi dosa'nyo iwi-iwi', lapas aijo' atina'je ka' kalana to dosa-dosa' nu mian anu palesayamo. I Yesus nonsombahkon koloban ola ninsan panyo tinanggungnyomo sampe toka sidu-sidutu', tempo'nyo Ia nonsombahkonmo posi butong-Nyo salaku bau koloban.

IBRANI 9:25

Imam Daka' nu Yahudi sataun-toka sataun minsoop i Salipi' anu Susi' hondo i uno nu Laigan nu Tumpu momboa baso' nu binatang sa'angu'. Panyo i Kristus madi' ninsoop nonsombahkon butong-Nyo pino'uli-ulit.

1 PETRUS 2:24

Posi i Kristus na nonsimbu to dosa-dosa'to i butong-Nyo aita' i kau' salib da kita opobebas i kuasa nu dosa', ka' tumuu' mombatuki pongka'oho' nu Tumpu. Iwi-iwi' bela i Kristus na anu mompa'alin belemiu.

1 PETRUS 3:18

Kalana i Kristus sinilaka ola minsan sampe toka sidu-sidutu' kalana dosa' nu manusia – samian anu madi' ko sala'nyo sinilaka kalana monsawani mian anu ko sala'nyo. I Kristus nombau sumo aijo' da Ia timbali molaya' belemiu toka hi Tumpu. Ia sinilakan ola butongnyo biasa, panyo po'ule' pinotumuu' nimbutongmo nu rohani.

2 PETRUS 3:12

hau-haunyo komiu montanda'i ka' mongindi Sinaa katokaanmo nu Tumpu. I Sinaa aijo' langit motoyo'mo iwi-iwi', ka' kalana panasnyo sahingga apa-apaa na anu aita' i langit moe'mo sumo uee.

1 YOHANES 3:2

To Utu-utus anu okanonongi! Kita tempo' uuka to ana-anakmo nu Tumpu, panyo mosia na ka'ada'anto saidi' mae ma'isa nanasa. Panyo osumbu'to, saba' de i Kristus tokamo, kita timbalimo sumo Ia, kalana kita montoamo Ia anu sahondo-hondo-Nyo.

1 YOHANES 3:5

Osumbu' miu saba' i Kristus toka mae da monsapui to dosa-dosa' nu mian, ka' memang madi'mo ko dosa'nyo i uno nu butong-Nyo.

YUDAS 1:21

ka' saja' ahi' tumuu' i uno nu kakuasa'an nu kalibosan nu Tumpu, hau-haunyo komiu montanda'i balakat i Yesus Kristus Tumpunto, anu mombee'ije kantumuu'an kopian hi komiu sampe toka sidu-sidutu'.

ANU PINOTO'I HI YOHANES 1:7

Toa, Ia toka mae nu saput nu kundom! Iwi-iwi' na mian montoa Ia, ka' suele aha anu nonjalo'mo Ia. Iwi-iwi' na bansa i dunia mohangi Ia. Memang, totu-totu'u! Amin!