IBRANI 9:12 - KITAB NU TUMPU ALLA LELE MA'IMAI'

¹² I Kristus ninsoop i Salipi' anu Susi' hondo i uno nu kemah aijo', ola ninsan sampe toka sidu-sidutu'. Tempo'nyo aijo' Ia madi' nomboa baso' nu mee' mo'anenyo kabai baso' nu anak nu sapi' da osombahkon; Ia nomboamo posi baso'-Nyo ka' tiba jalan anu sumo aijo' Ia nompobebasmo kita sampe toka sidu-sidutu'.

IBRANI 9:12 ပူးပေါင်းရင်းမြစ်များ

DANIEL 9:24

Pimpitun lipat na pitumpulu' na taun, aijo'mo na tempo' anu pinotataapmo nu Tumpu mompobebas bansa nu belemiu tiba kota' nu belemiu anu susi' aijo' da bolimo baladosa' ka' bolimo mombau palabuatan anu ma'idek. Iwi-iwi' na dosa' o'ampunimo ka' mule' ka adilan anu sampe toka sidu-sidutu' aijo' sabole-bolemo ahi' opake sahingga anu lewa' tinoa ka' mule' anu lewa' okila-kila aijo' onyata'mo ahi', ka' Laigan nu Tumpu anu susi' aijo' po ule'mo ahi ponsomban Tumpu.

IMAMAT 16:15

Lapas aijo' i Harun tionyo ahi' mongkolotmo mee' bau koloban pongampuni dosa' nu aha mian Israel. Baso' nu mee' aijo' tionyo ahi' nu boa i Salipi' anu Susi' hondo, lantas opipi'akonmo i sasu ahop nu kolop nu Peti' Palajanjian aijo', ka' i ahop nu Peti', susumo anu binaunyomo i baso' nu sapi' lakinyo.

IMAMAT 4:3

De anu baladosa' Imam Daka', sahingga bansa Israel suele sala'mo, ia tionyo ahi' mongkolobanakon sa'angu' na sapi' lakinyo anu daagi' bata'nyo ka' anu madi' ko panyakitnyo hi Tumpu da dosa'nyo o ampuni.

IMAMAT 8:2

“Laga na i Harun tiba to ana-anaknyo ka' boa na baju' nu imam, lanya' anu opake mombalakati, sa'angu' na sapi' lakinyo anu daagi' bata'nyo da bau koloban pongampuni dosa', ohua' na domba lakinyo ka' sa'angu' na loyang na roti anu madi' ko raginyo.

IMAMAT 9:15

Lapas aijo' ia nonsombahkonmo mee' bau koloban pongampuni dosa' nu mian. Mee' aijo' kinolotnyo ka' sinombahkonnyomo susumo koloban bau pongampuni dosa'nyo.

ZAKHARIA 3:9

Ku potimpasmo na batu sa'angu' hi ahop i Yosua, popitu' na pasu'nyo anu Ku botikje nu tulisan-tulisan. Ola sansinaa na kopinnyo Ku alinmo na dosa' nu lipu' aiya.

MARKUS 3:29

Panyo de ia montalo-taloakon anu ma'idek hi Roh nu Tumpu Allah, ia madi'mo daagi' o ampuni! Kalana montaloakon anu ma'idek, atina'mo na dosa' anu sidu-sidutu'.” (

LUKAS 1:68

“Imbo' da kita mompuji' Tumpu, Tumpu mian nu Israel! Ia tinokamo montulungi mian anu palesayamo hi Ia ka' mompobebas aha.

SISIKON NU TO RASUL-RASUL 20:28

Tionyo obala ingati na butong miu ka' otoa suele na jama'at iwi-iwi' anu binee'mo nu Roh nu Tumpu hi komiu da otoa; kalana komiu ingangkatmo da montoa jama'at aijo'. Tionyo komiu montoa jama'at nu Tumpu aijo' sumo polaya' montoa dombanyo, kalana Tumpu nompotimbalimo jama'at-Nyo, aijo'mo na sababnyo sahingga i Yesus Anaknyo sinilakamo.

EFESUS 1:7

Kalana i Kristus sinilakamo, kita pinobebasmo nu Tumpu Allah, alati'nyo Ia nongampunimo kita i to dosa-dosa'to.

KOLOSE 1:14

Kalana Anak-Nyo aijo', sahingga kita pinobebasmo; alati'nyo dosa'to iwi-iwi' ingampunanmo.

1 TESALONIKA 1:10

Aha notatae mule' mongkona mosia na komiu montaha'imani katokaan nu Anak nu Tumpu lengkat mae i suluga', aijo'mo i Yesus, anu sinilakamo po'ule'mo pinotumuu' nu Tumpu. I Yesusmo ai-aijo' na anu momposalamat kita i tambuha' nu Tumpu anu saidi' mae toka.

TITUS 2:14

Ia nongkulubanakonmo butong-Nyo kalana kahanda' mompobebas kita da iwi-iwi' na anu ma'idek bolimo obaunto, ka' mompotimbalimo kita mian anu binebasmo madi'mo ko dosa'nyo ka' samata-mata iamo na tumpu-Nyo, ka' makekemo na mombau anu ma'ima'.

IBRANI 1:3

Iamo na mompotoa katalasanggoan nu Tumpu anu talalo hondo ko angga'nyo; Iamo na gambalan nu butong nu Tumpu anu manasa hondo. Iamo suele na mompotuu' kahosonan nu songko-songko na dunia aiya nu potatae-Nyo anu talalo hondo matangkas na kuasanyo. Noko lapas na Ia nontokong mian da madi'mo nukona nu hukuman nu dosa' na aha, Ia sinumuhangmo i kasuhangan kiita' i suluga' hingga-hinggat tiba Tumpu Anu Matangkas na kuasanyo.

IBRANI 10:19

Yo, to utu-utus, kalana i Yesus sinilakamo sumo aijo', kita uuka aiya baanimo na minsoop i Salipi' anu Susi' hondo.

IBRANI 10:4

kalana memang baso' nu sapi' ka' baso' nu mee' lakinyo madi' moko ala mongalini dosa'.

IBRANI 13:12

Mokonyo aijo' i Yesus suele sinilaka i sambiha'nyo nu tumban daka' nu kota da baso'-Nyo bau pombaso'i dosa' nu mian-Nyo anu palesayamo, hi Ia.

IBRANI 5:9

Sahingga salatan Ia pinotimbalimo anu momposalamat totu-totu'u, Ia tinimbalimo pinolengkatan nu kasalamatan anu sampe toka sidu-sidutu' kona hi iwi-iwi'na mian anu tulu-tulutan hi Ia,

IBRANI 7:27

Ia madi' sumo to ima-imam daka' sangga'at, anu toka sansina-sinaa tionyo monsombahkon koloban kalana posi dosa'nyo iwi-iwi', lapas aijo' atina'je ka' kalana to dosa-dosa' nu mian anu palesayamo. I Yesus nonsombahkon koloban ola ninsan panyo tinanggungnyomo sampe toka sidu-sidutu', tempo'nyo Ia nonsombahkonmo posi butong-Nyo salaku bau koloban.

IBRANI 9:13

Baso' nu mee' ka' sapi' mo'anenyo tiba abu' nu anak nu sapi', anu kinolobanakon, opake da bau pompipi' to mia-mian anu mahenyu susumo koonyo nu atulan nu agama, da aha timbali belesi'.

IBRANI 9:14

Yo, de baso' tiba abu'nyo aijo' moko ala mompobelesi kahenyuan nu to mia-mian, apaa mule' baso' i Kristus. Kalana kuasa nu Roh anu sampe toka sidu-sidutu', i Kristus nonsombahkonmo posi butong-Nyo hi Tumpu salaku koloban anu ma'ima'. Baso'-Nyo mompobelesi kinyonyoanto da bolimo mombau atulan nu agama anu madi' kogunanyo, da kita timbali mombau palentah nu Tumpu anu tumuu'.

IBRANI 9:15

Aijo' na sababnyo i Kristus tinimbalimo Jalan i sa'angu' na palajanjian anu bu'ou, da mian anu i lagamo nu Tumpu montalimamo to bala-balakat anu madi' mingkot anu jinanji'mo nu Tumpu. Iwi-iwi' aijo' tinimbalimo kalana daagi'mo ko anu sinilaka, aijo'mo i Kristus; ka' Ia sinilaka aijo' nompobebasmo mian i kasala'an-kasala'an anu binaumo nu aha tempo'nyo palajanjian anu momona daagi' pinake.

IBRANI 9:19

Momonanyo i Musa nompoto'i iwi-iwi' na palentah atulan nu Tumpu hi bansa Israel. Lapas aijo' i Musa nongalamo baso' nu anak nu sapi' ka' baso' nu mee' mo'anenyo, lantas ginalo'annyomo nu uee, lapas aijo' pinipi'akonnyomo i Kitab nu Atulan anu lengkat mae hi Tumpu ka' hi iwi-iwi' na bansa Israel mompake hemput hisop ka' bulu nu domba buhitnyo momea' hondo na bau pompipi'akon.

IBRANI 9:28

Sumo aitu mule' na i Kristus ola minsan na sinombahkon salaku koloban mompobelesi dosa' nu mian da'isan. Ia po'ule'je toka kopinduannyo, misa' pa' kahanda' mongulusmo palakala nu dosa', panyo momposalamatmo to mia-mian anu saja' montanda'i katokaan-Nyo.

IBRANI 9:7

Anu minsoop i uno nu kemah anu kiijo' hondo-hondo i unonyo nu kemah aijo', ola Imam Daka'. Ia mombau kalajanyo ola minsan sataun. Aijo' nu kalaja momboa baso' da osombahkon hi Tumpu kalana dosa' nu butongnyo ka' kalana to dosa-dosa' anu madi' sangaja' na binau nu mian anu palesayamo hi Tumpu.

ANU PINOTO'I HI YOHANES 1:5

ka' lengkat mae hi Yesus Kristus, sakisi anu mohongo-hongo. Iamo na anu sinilaka po'ule' pinotumuu' momona, ka' Iamo na anu mongkuasai to tomu-tomundo nu dunia. I Yesus mongkalibosi kita, ka' kalana Ia sinilakamo aijo' sahingga Ia nompobebasmo kita da madi'mo o hukum kalana dosa'to, haha aijo'.

ANU PINOTO'I HI YOHANES 5:9

Aha nonyanyiakonmo sa'angu' na nyanyian anu sala'je aitu na i nyanyi: “Belento pantas mongala kitab aijo' ka' mombeak segen haha aijo'. Kalana Belento pinateanmo, ka' kalana Beleyum sinilakamo, mian i iwi-iwi' na tulunan, sisik, negara, ka' bansa ingolimo nu Belento da timbalimo anu nu Tumpu.