IBRANI 7:27 - KITAB NU TUMPU ALLA LELE MA'IMAI'

²⁷ Ia madi' sumo to ima-imam daka' sangga'at, anu toka sansina-sinaa tionyo monsombahkon koloban kalana posi dosa'nyo iwi-iwi', lapas aijo' atina'je ka' kalana to dosa-dosa' nu mian anu palesayamo. I Yesus nonsombahkon koloban ola ninsan panyo tinanggungnyomo sampe toka sidu-sidutu', tempo'nyo Ia nonsombahkonmo posi butong-Nyo salaku bau koloban.

IBRANI 7:27 ပူးပေါင်းရင်းမြစ်များ

YEHEZKIEL 43:19

Ola ahi' imam lee' mae i Zadok anu lee' mae nu tulunan nu bansa Lewi na timbali toka mae i ahop-Ku mongatun palasombahan osombahkon. Aku, Tumpu Anu Matangkas na Kuasanyo na nompalentahkonmo han aijo'. Bee'i na aha sa'angu' na sapi' mo'anenyo anu daagi' bata'nyo da bau koloban pongampuni dosa'.

IMAMAT 16:11

Salatan moko lapasmo na i Harun monsombahkon ka' mongkolotmo sapi' lakinyo bau koloban pongampuni dosa' nu posi butongnyo ka' kona hi aha salaigan,

IMAMAT 16:15

Lapas aijo' i Harun tionyo ahi' mongkolotmo mee' bau koloban pongampuni dosa' nu aha mian Israel. Baso' nu mee' aijo' tionyo ahi' nu boa i Salipi' anu Susi' hondo, lantas opipi'akonmo i sasu ahop nu kolop nu Peti' Palajanjian aijo', ka' i ahop nu Peti', susumo anu binaunyomo i baso' nu sapi' lakinyo.

IMAMAT 16:6

I Harun tionyo ahi' monsombahkon sa'angu' na sapi' lakinyo bau koloban pongampuni dosa' nu posi butongnyo ka' aha salaigan.

ROMA 6:10

Kasilakaan anu ingoa'an i Kristus aijo'mo kasilakaan kalana dosa'. Aijo' ola minsan na tinimbali toka sidu-sidutu'. Ka' kantumuu'an anu ingoa'an-Nyo uuka aiya, kantumuu'anmo bau bagi nu Tumpu.

EFESUS 2:22

Kalana tumuu' nosa'angu'mo tiba i Kristus, komiu mule' hau-haunyo pinotinjomo hingga-hinggat tiba to mia-mian sangga'at da timbali sa'angu' na Laigan nu Tumpu; i kiijo' na Tumpu Allah jojoong tiba Roh-Nyo.

EFESUS 5:2

Kantumuu'anum maunyo ahi' okinyonyoai nu kalibosan susumo pongkalibosi i Kristus kita. Ia nongkulubanakonmo butong-Nyo kalana kita, salaku palasombahan anu manohong ka' momposanang kinyonyoa nu Tumpu.

TITUS 2:14

Ia nongkulubanakonmo butong-Nyo kalana kahanda' mompobebas kita da iwi-iwi' na anu ma'idek bolimo obaunto, ka' mompotimbalimo kita mian anu binebasmo madi'mo ko dosa'nyo ka' samata-mata iamo na tumpu-Nyo, ka' makekemo na mombau anu ma'ima'.

IBRANI 5:1

Batu-batu Imam Daka' opile'i hi aha mian anu palesayamo hi Tumpu, ka' o hangkat da mompojalan palentah nu Tumpu salaku wakin nu aha. Kalajanyo aijo'mo monsombahkon hi Tumpu, apa-apaa na obee' ka' okolobanakon bau pongampuni dosa'.

IBRANI 5:3

Ka' kalana ia madi' moko ala mombau apa-apaa, ia tionyo ahi' monsombahkon koloban, misa' ola kalana dosa' nu mian anu palesayamo hi Tumpu, panyo suele kalana dosa'nyo.

IBRANI 8:4

Bisuannyo Ia jojoong i dunia aiya, Ia madi' timbali jadi imam kalana daagi'mo ko imam anu monsombahkon koloban anu otuntut i uno nu atulan nu agama Yahudi.

IBRANI 9:12

I Kristus ninsoop i Salipi' anu Susi' hondo i uno nu kemah aijo', ola ninsan sampe toka sidu-sidutu'. Tempo'nyo aijo' Ia madi' nomboa baso' nu mee' mo'anenyo kabai baso' nu anak nu sapi' da osombahkon; Ia nomboamo posi baso'-Nyo ka' tiba jalan anu sumo aijo' Ia nompobebasmo kita sampe toka sidu-sidutu'.

IBRANI 9:14

Yo, de baso' tiba abu'nyo aijo' moko ala mompobelesi kahenyuan nu to mia-mian, apaa mule' baso' i Kristus. Kalana kuasa nu Roh anu sampe toka sidu-sidutu', i Kristus nonsombahkonmo posi butong-Nyo hi Tumpu salaku koloban anu ma'ima'. Baso'-Nyo mompobelesi kinyonyoanto da bolimo mombau atulan nu agama anu madi' kogunanyo, da kita timbali mombau palentah nu Tumpu anu tumuu'.

IBRANI 9:25

Imam Daka' nu Yahudi sataun-toka sataun minsoop i Salipi' anu Susi' hondo i uno nu Laigan nu Tumpu momboa baso' nu binatang sa'angu'. Panyo i Kristus madi' ninsoop nonsombahkon butong-Nyo pino'uli-ulit.

IBRANI 9:26

Kalana desumo aitu, aijo' alati'nyo saja' pino'uli-ulit-Nyo na nongoa'i kasansala'an salatanmo pe'e dunia aiya pinotimbali. Panyo bukuti'nyo, uuka aiya i tempo' anu i mihinyomo aiya, Ia tinoka ola ninsan da mompobelesi dosa', aijo'mo nongkolobanakonmo posi butong-Nyo.

IBRANI 9:28

Sumo aitu mule' na i Kristus ola minsan na sinombahkon salaku koloban mompobelesi dosa' nu mian da'isan. Ia po'ule'je toka kopinduannyo, misa' pa' kahanda' mongulusmo palakala nu dosa', panyo momposalamatmo to mia-mian anu saja' montanda'i katokaan-Nyo.

IBRANI 9:7

Anu minsoop i uno nu kemah anu kiijo' hondo-hondo i unonyo nu kemah aijo', ola Imam Daka'. Ia mombau kalajanyo ola minsan sataun. Aijo' nu kalaja momboa baso' da osombahkon hi Tumpu kalana dosa' nu butongnyo ka' kalana to dosa-dosa' anu madi' sangaja' na binau nu mian anu palesayamo hi Tumpu.