IBRANI 7:19 - KITAB NU TUMPU ALLA LELE MA'IMAI'

¹⁹ Atulan nu agama Yahudi madi' moko ala mombau apa-apaa da timbali ma'ima'. Aijo' na sababnyo kita uuka aiya binee'anmo anu timbali otaha'imani anu lebe ma'ima'; tiba jalan aijo' kita moko alamo ohani hi Tumpu.

IBRANI 7:19 ပူးပေါင်းရင်းမြစ်များ

MAZMUR 73:28

Panyo de belengku na totu-totu'u ahi' ma'ima' hondo na jojoong koko hi Tumpu. Tumpu na ku bau tampat pihohunganku da aku moko ala mombebakon iwi-iwi' apaa na anu binau-Nyomo.

YOHANES 1:17

Atulan nu Tumpu otalimanto hi Musa. Panyo liibos ka' kanonongan nu Tumpu pinonyata'-Nyomo hi Yesus Kristus.

YOHANES 14:6

I Yesus nontaami, “Akumo na jalan da osumbu' na Tumpu Allah, ka' pohumpakan kantumuu'an. Madi' ko samian pe'e moko ala toka hi Tuuma, de madi' montului Aku.

ROMA 5:2

Kalana kita palesaya hi Yesus, sahingga Ia nompotimbali kita moko ala mongoa'i liibos nu Tumpu, ka' kalana liibos aijo' kita tumuu' uuka aiya. Kalana aijo' kita lame' na kinyonyoa, kalana kita ko anu otaha'imani aijo'mo kita mongoa'ije tumuu' ma'ima' anu binee' nu Tumpu!

ROMA 7:7

Desumo aitu, apaa na anu otaloakonto? Te atulan nu agama Yahudi aiya ma'idek? Tantu madi'! Panyo atulanmo aijo' na mompokinde'i aku da nonsumbu' anu moko baladosa'. Madi' sinumbu'ku na mangoa pa' apaa, de atulan nu agama madi' nontaloakon, “Boli mangoa.”

ROMA 8:3

Apaa na anu madi' opoko bau nu atulan nu agama, kalana kita mian madi' moko ala mombau, aijo' binaumo nu Tumpu. Tumpu nohungku'imo kuasa nu dosa' anu i uno nu sipat nu mian, aijo'mo nonsai posi Anak-Nyo na tinoka nimbalu-balu sumo mian anu baladosa' da mongalini dosa'.

GALATIA 2:16

Mau mule' sumo aitu osumbu' mami saba' mian mompo'ule'mo ma'ima' tiba Tumpu ola kalana palesaya hi Yesus Kristus, ka' misa' kalana mompojalan atulan nu agama. Kami suele palesaya hi Yesus Kristus, da kami mompo'ule'mo ma'ima' tiba Tumpu Allah kalana palesaya totu-totu'u, misa' kalana kami mompojalan atulan nu agama. Kalana de ola mompojalan atulan nu agama, madi' ko samian pe'e na timbali mompo'ule'mo ma'ima' tiba Tumpu Allah.

GALATIA 3:21

Ugaat aijo' alati'nyo saba' atulan nu agama mompaha sala' tiba anu jinanji'mo nu Tumpu? Tantu ahi' madi'! Kalana de atulan nu agama binee' da mombee'i kantumuu'an hi manusia, sahingga manusia timbali mompo'ule' ma'ima' tiba Tumpu kalana atulan nu agama.

GALATIA 3:24

Tiba jalan anu sumo aijo', atulan nu agama timbalimo sumo ponjagai kita sampe i Kristus toka da mombau kita mompo'ule'mo ma'ima' tiba Tumpu kalana kita palesayamo hi Kristus.

EFESUS 3:12

Kalana palesaya hi Kristus, ka' kalana nosa'angu'mo tiba Ia, kita pinoloasmo mongohani Tumpu kalana pinalesayamo totu-totu'u.

KOLOSE 1:27

Hi mian-Nyo anu palesayamo aijo', Tumpu momponyata'mo palias na ko'ima'nyo ka' na katalasanggoan na lahasia-Nyo aijo' hi mian iwi-iwi'. Lahasia-Nyo aijo' atina'mo: I Kristus i unomo nu butong miu, alati'nyo komiu suele mongoa'imo katalasanggoan nu Tumpu Allah.

1 TIMOTIUS 1:1

Timotius, anakku anu totu-totu'u palesayamo hi Tumpu! Sulat aiya lengkat hi belengku i Paulus, rasul i Kristus Yesus anu pinalentahmo nu Tumpu, Pomposalamat kita ka' palentah i Kristus Yesus anu otaha'imaninto. O'amalakon da Tumpu Tuumanto ka' i Kristus Yesus Tumpunto mombee'i balakat, kalibosan ka' ka'ima'an hi beleyum.

IBRANI 10:1

Atulan nu agama Yahudi ola mombee'i gambalan anu opiha-pihau' mongkona han anu ma'ima' anu tokaje mae, misa' gambalan anu sahondo-hondonyo mongkona han aijo'. Atulan aijo' madi' moko ala mompokopiani mian anu toka monsombah Tumpu ka' momboa mae anu osombahkon, mau mule' sataun-toka sataun saja' monsombahkon kolobaan anu susumo aijo'.

IBRANI 11:40

kalana Tumpu ko tanga'an anu lebe ma'ima' hi kita. Tanga'an-Nyo aijo'mo saba' ola ahi' palesaya hingga-hinggat tiba kita, yo aha timbali ma'ima'.

IBRANI 11:6

De madi' bala'iman, madi' ko samian pe'e timbali moko ala momposanang kinyonyoa nu Tumpu. Kalana mian anu toka hi bele nu Tumpu tionyo ahi' palesaya saba' Tumpu daagi', ka' Tumpu mombalosije mian anu molio Ia.

IBRANI 3:6

Panyo i Kristus tinulu-tulutanmo salaku Anak anu mompangakui kalajanyo i uno nu Laigan nu Tumpu. Ka' kita aiya atina'mo na Laigan nu Tumpu, de kita tataap daka-daka' na kinyonyoa ka' tataap palesaya totu-totu'u da mohumpak apaa na anu otaha'imaninto.

IBRANI 4:16

Kalana aijo' imbo' na kita babaani na mangadap hi Tumpu Allah anu ma'ima' hondo na mompalentah. Tumpu mongkalibosije kita ka' mombalakati kita da kita nu tulungi de tokamo na tempo'nyo anu tinantukanmo.

IBRANI 6:18

Ohua' na han aijo' madi'mo daagi' mongabali': Tumpu madi' toho' baleko' i janji'-Nyo ka' sumpa'-Nyo. Kalana aijo', kita anu ningkongmo hi Tumpu, kinakeha'mo da mahoson na mintoong hi anu otaha'imani anu naningkoyamo i ahopto.

IBRANI 7:11

Tempo'nyo to ima-imam Lewi nompalentah, atulan nu agama Yahudi binee'mo hi mian Israel anu palesayamo. Kalana to ima-imam Lewi naipuan mae aijo' madi' moko ala mombau apaa na anu tionyo nubau nu aha ma'i-ma'ima', jadi tionyo ko imam sangga'at, aijo'mo anu sumo i Imam Melkisedek, ka' misa'mo anu lengkat mae i gombuan nu Imam Harun!

IBRANI 7:20

Ka' mule', iwi-iwi' aijo' pinohosonmo nu sumpa' nu Tumpu Allah. Madi' toho' ko sumpa' sumo aijo' tempo'nyo imam sangga'at haha aijo' i hangkat binau imam.

IBRANI 7:25

Mokonyo aitu sampe toka sidu-sidutu' i Yesus timbali momposalamat to mia-mian anu toka hi Tumpu, montului Ia, mokonyo aijo' Ia tumuu' sampe toka sidu-sidutu' da mompotokakon apaa na anu nu poita nu to mia-mian hi Tumpu.

IBRANI 8:6

Panyo uuka i Yesus nohumpakmo pangkat imam anu lebe talasanggo molingkudui anu kinalajamo nu to ima-imam haha aijo'. Kalana palajanjian anu pinodaagi'mo nu Tumpu hi mian atina'mo na palajanjian anu lebe ma'ima' kalana mimpu'u i janji' nu hahan anu lebe ma'ima'.

IBRANI 9:9

Aiya mongibalatakon tempo' uuka; alati'nyo saba' anu sola osombahkon ka' kolobaan binatang haha aijo' anu osombahkon hi Tumpu, madi' moko ala mompokopiani kinyonyoa nu mian anu momboa mae anu osombahkon.

YAKOBUS 4:8

O'ohani na Tumpu, da Tumpu suele mongohanije komiu. Obaso'i na lima miu, komiu anu baladosa'! Ka' opolino na kinyonyoa miu, komiu anu mopanga' na kinyonyoa!