IBRANI 6:17 - KITAB NU TUMPU ALLA LELE MA'IMAI'

¹⁷ Tumpu ko kahanda' lebe momponasa hi to mia-mian anu nontalimamo janji'-Nyo, tukoonyo Ia madi'mo mombali'i anu ingatun-Nyomo. Aijo' na sababnyo pinaka tuangan-Nyomo na sumpa'nyo anu jinanji'-Nyomo aijo'.

IBRANI 6:17 ပူးပေါင်းရင်းမြစ်များ

KAJADIAN 26:28

Lantas tinaamanmo nu aha, “Uuka aiya sinumbu'mo mami taalu' Tumpu monjagai beleyum ka' kami binapikinmo lebe ma'ima' kita balajanji'mo. Basumpa'mo

MAZMUR 110:4

Tumpu binajanji' sinumpa'akon, Ia madi'mo timbali mompojalo janji'-Nyo. “Belentomo na imam sampe toka sidu-sidutu', sumomo i Melkisedek.”

MAZMUR 33:11

Panyo tanga'an nu Tumpu na tataap ahi' sabole-bole jadi tanga'an-Nyo otaha'imani sampe toka sidu-sidutu'.

MAZMUR 36:8

Talalo ahi' koangga'nyo na kalibosan nu Belento o Tumpu, manusia mihohung i uno nu hohung nu polipik nu Belento.

NOSABATMO 22:11

Han anu sumo aijo' ia tionyo ahi' mamba i tampat ponsomban ka' basumpa' i sanggo nu Tumpu ka' montaloakon tukoonyo ia madi' nombuling potuu'on anu pinoki potuu'mo hi aha. De memang ia madi' nombuling, tumpunyo tionyo ahi' mombayan pombolosi kalugi'an aijo' ka' mian anu nompotuu'mo madi'mo timbali mombayan pombolosi kalugi'an.

AMSAL 19:21

Manusia talalo hondo manjoo' na tanga'an, panyo ola ahi' kaputusan nu Tumpu na jadi obau.

NYANYIAN ANU TALASANGGO 5:1

Aku tinokamo i ale'ku, sindua'anku pangantinku. Ilimu'kumo na mur tiba lampa-lampangku potik tiba juu' nu uani'ku kinaankumo inginumkumo na susu tiba uee nu anggurku. Pongkaanmo ka ponginumo to sanga-sangalungku. Inummo sampe nu osaimo na sindua'anku.

YESAYA 14:24

Tumpu Anu Daka na Kuasanyo notataemo, “Anu tinanga'an-Kumo aijo' tionyo ahi' jadimo.

YESAYA 46:10

Salatamo pe'e momonanyo mae pinoto'ing-Kumo na hahan anu imihinyo mae jadi, naipuan pe'e mae kinila-kilang-Kumo apaa na anu jadi aiya mae i ahop. Aku notataemo: Anu tinantukan-Kumo tinyo ahi' jadimo, anu kinahanda'an-Kumo tionyo ahi' Ku baumo!

YESAYA 55:11

sumo atina'mo suele na potatae anu tinaeakon-Kumo mai' mobalik mae hi beleng-Ku ola palasuma panyo ko hasinnyo mombau apaa na anu Ku kahanda'i, ka' montokai iwi-iwi' na anu Ku kahanda'i.

YESAYA 55:7

Tionyo ahi' mian anu ma'idek na gau'nyo mombabali'i kantumuu'annyo, ka' mombali'i pikilannyo. Sahanyo ahi' ia minsusule' mae hi Tumpu, da mohumpak pangasihan-Nyo. Tionyo ahi' ia po ule' mae toka hi Tumpunto, kalana Tumpu mongampuni nu kinyonyoa anu ma'ima.

MALEAKHI 3:6

“Akumo na Tumpu, ka' Aku madi' mongabali'. Kalana aijo' belemiu lee' mae i Yakub, madi' ahi' opatei.

YOHANES 10:10

Anu buling toka ola da mombuling, da mompatei tiba mongidei. Panyo Aku toka da mian mohumpak kantumuu'an – tumuu' molabi-labi.

ROMA 11:29

Kalana de Tumpu nompile'imo mian ka' mombalakatimo mian aijo', Tumpu madi'mo toho' po'ule' momadi'akon apaa na anu binau-Nyomo.

ROMA 8:17

Jadi, de kita to ana-anak-Nyo, tantu kita mule' ko hak mohumpak hi Ia, anu tionyo montalima to bala-balakat anu pinosadiamo nu Tumpu bau bagi nu to ana-anak-Nyo. Kita tionyo mohumpak hingga-hinggat tiba i Kristus apaa na anu pinosadiamo nu Tumpu hi Ia; kalana de kita mongoa'i sansala tiba i Kristus, kita suele opopodaka' tiba Ia.

GALATIA 3:29

De komiu i Kristusmo na tumpunyo, saba' komiu lee'mo i Abraham. Ka' komiu montalimamo apaa na anu jinanji'mo nu Tumpu Allah.

EFESUS 1:11

Tumpu nombau iwi-iwi' apaa posi pongka'oho'-Nyo ka' posi kaputusan-Nyo. Salatanmo pe'e imoonanyo Ia nompile'imo kita kalana Ia mongkahanda'i da kita timbali mian anu palesayamo kalana mosa'angu'mo tiba i Kristus.

IBRANI 11:7

Kalana bala'iman, sahingga i Nuh pinoto'imo nu Tumpu mongkona hahan anu jadi aiya mae i ahop, anu madi' pinoko ala tinoanyo. I Nuh tulu-tulutan hondo hi Tumpu, sahingga ia nombaumo sa'angu' na kapan anu ahennyo nomposalamatmo butongnyo tiba aha sampoto'utus. Tiba jalan anu sumo aijo', dunia i hukumo, panyo i Nuh kalana ia bala'iman, sahingga koonyo nu Tumpu ia mian anu ma'ima'.

IBRANI 11:9

Kalana bala'iman, i Abraham mian anu lengkat mae i salipu'an jinojoongmo i lipu' anu jinanji'mo nu Tumpu hi ia aijo'. I Abraham jinojoongmo kiijo' i kemahnyo. Sumo aitu mule' na i Ishak ka' i Yakub, anu nontalimamo palajanjian pokakana sumo aijo' lengkat mae hi Tumpu.

IBRANI 6:12

Kami madi' mongka'oho' komiu timbali moluluk. Panyo okahanda'i mami da komiu tumuu' sumo to mia-mian anu mohumpak apaa na anu jinanji'mo nu Tumpu, kalana palesaya hi Ia ka' kalana sabaan na montanda'i Ia.

IBRANI 6:16

De mian basumpa', ia basumpa' hi sanggo nu mian sangga'at anu lebe matangkas molingkudui ia, sahingga madi'mo ko'anu lewa' monggagakon kalana iwi-iwi' sinumpa'mo.

IBRANI 6:18

Ohua' na han aijo' madi'mo daagi' mongabali': Tumpu madi' toho' baleko' i janji'-Nyo ka' sumpa'-Nyo. Kalana aijo', kita anu ningkongmo hi Tumpu, kinakeha'mo da mahoson na mintoong hi anu otaha'imani anu naningkoyamo i ahopto.

YAKOBUS 1:17

Batu-batu taju anu ma'ima' ka' palasen anu ma'ima' pinolengkatannyo mae i suluga', tinau'akon nu Tumpu, anu Nompotimbali iwi-iwi na anu ma jingka i langit. Iamo na Tumpu anu madi' mongabali' ka' madi' mule' monsaduakon kapintungan mau mule' pa' mosiamo.

YAKOBUS 2:5

O inau', to Utu-utus anu okanonongi! Mian anu kasiasi i dunia aiya, pinile'anmo nu Tumpu da timbali mian anu kaya i uno nu iman. Mian haha aijo' pinosoopmo da timbalimo mian anu palesayamo hi Tumpu, sumo anu jinanji'mo nu Tumpu hi mian anu mongkalibosi Ia.

1 PETRUS 1:3

Imbo' na kita montalima kase hi Tumpu, Tuuma Tumpunto i Yesus Kristus! Ia talalo mongkalibosi kita, aijo' na pu'unnyo Ia nombee'imo kantumuu'an bu'ou hi kita, aijo'mo i Yesus Kristus sinilaka po'ule'mo pinotumuu'. Aiya mompokeman kita da mahoson na montaha'imani.

1 PETRUS 3:7

Ka' komiu mule' suele to langka-langkai' nu mian, tionyo ahi' tumuu' mangalati' totu-totu'u hi bengkele' miu, ka' sinsumbu' saba' aha atina' mian anu madi' mahoson, o adati na mongatun aha, kalana aha mohingga-hinggat tiba belemiu montalimaje balakat kantumuu'an anu mingkaliangan lengkat mae hi Tumpu. Obau na aiya, da belemiu timbali balado'a.