IBRANI 2:17 - KITAB NU TUMPU ALLA LELE MA'IMAI'

¹⁷ Aiyamo na alati'nyo sahingga Ia tionyo timbali pokakana sumo to utu-utus-Nyo i uno nu iwi-iwi na han. Ka' tiba jalan anu sumo aijo' Ia noko alamo tinimbali Imam Daka' anu mohongo-hongo ka' anu ko kalibosan-Nyo. Kalana Ia nombaumo anu sumo aijo', sahingga dosa' nu mian ingampunanmo.

IBRANI 2:17 ပူးပေါင်းရင်းမြစ်များ

2 TAWARIKH 29:24

Lapas aitu mee' haha aijo' pinahang kolotakonmo nu to ima-imam ka' baso'nyo dinudu'akonmo i mezbah salaku koloban pongampuni dosa' nu mian da'isan iwi-iwi'. Han aijo' binaumo nu aha kalana pinalentahkonmo nu tomundo da obau na koloban anu opotunu ka' koloban pongampuni dosa' hi aha iwi-iwi' mian da'isan nu Israel.

YESAYA 11:5

Ia adin na mongala kaputusan ka' madi' tageo' na kinyonyoa i uno nu han iwi-iwi'.

YEHEZKIEL 45:17

Ia na halus mongoli potuu'on da bau koloban anu opotunu tiba koloban gandum tiba koloban anggur nu aha iwi-iwi' bansa Israel de tokamo isinaa anu olame'akonmo. Molame'akon Bitu'on Bu'ou sinaa nu Sabat tiba sinaa anu olame'akon sangga'at. Ia tionyo ahi' momposadia koloban bau pongampuni dosa', koloban gandum, koloban anu opotunu, tiba koloban paladamean bau pompoita ka'ampunan nu aha bansa Israel.”

YEHEZKIEL 45:20

Bau mule' sumo aijo' kakona itanggan popitu' bitu'onmo ai-aijo' kona hi batu-batu mian anu binaladosa'mo maumo anu madi' tinotonggolakon kabai kalana anu madi' sinumbu'. Tiba jalan anu sumo aijo' na belemiu monjagaimo kasusian nu Laigan-Ku.

DANIEL 9:24

Pimpitun lipat na pitumpulu' na taun, aijo'mo na tempo' anu pinotataapmo nu Tumpu mompobebas bansa nu belemiu tiba kota' nu belemiu anu susi' aijo' da bolimo baladosa' ka' bolimo mombau palabuatan anu ma'idek. Iwi-iwi' na dosa' o'ampunimo ka' mule' ka adilan anu sampe toka sidu-sidutu' aijo' sabole-bolemo ahi' opake sahingga anu lewa' tinoa ka' mule' anu lewa' okila-kila aijo' onyata'mo ahi', ka' Laigan nu Tumpu anu susi' aijo' po ule'mo ahi ponsomban Tumpu.

IMAMAT 14:18

Labinyo nu lanya' tionyo ahi' odudu'akonmo i ubak nu mian aijo'. Sumo aijo'mo na imam mombau anu bau pomposusi' hi mian aijo' i ahop nu Tumpu.

IMAMAT 16:16

Tiba jalan anu sumo aijo' ia momposusi'mo Salipi' anu Susi' hondo, anu i humimi'anmo nu aha bansa Israel kalana dosa' nu aha iwi-iwi'. Kemah nu Tumpu tionyo ahi' oposusi' kalana ia binau i totonga' nu kemah nu aha bansa Israel ka' kinonamo nu kapahumimi'an nu aha.

IMAMAT 6:30

Binatang anu opotunu pongampuni dosa' anu o ala sambagian na baso'nyo oboa i Salipi' Susi', tionyo ahi' opotunu iwi-iwi' ka' madi' timbali okaan.

IMAMAT 8:15

Lantas kinolotmo i Musa ka' nongala sambahagian na baso'nyo. Baso'nyo aijo' sinapuakonnyo nu kangkam nu limanyo i tanduk haha aijo' anu pinokona i pasu'nyo nu mezbah, da mezbah aijo' baumo samata-mata anumo nu Tumpu Allah. Labinyo nu baso' dinudu'akonnyomo i paningkokoan nu mezbah. Sumo aijo' na mombau mezbah aijo' da oposusi' ka' samata-matamo anumo nu Tumpu.

NOMBILANGMO 15:25

Lantas imam tionyo ahi' mombaumo atulannyo anu bau pongampuni dosa' nu aha mian. Sahingga aha o ampunimo kalana kasala'an aijo' madi' tinotonggolakon na nombau, ka' kalana aha nombaumo koloban pongampuni dosa' tiba koloban anu opotunu bau bagi nu Tumpu.

ROMA 15:17

Jadi, kalana aku nosa'angu'mo tiba i Kristus Yesus, sahingga aku timbali mongoa'i lame' i uno nu kalajangku bau kapentingan nu Tumpu.

ROMA 5:10

De tempo'nyo kita nompaha idek ka' Tumpu, kita pinodame-Nyomo nu kinasilakaan nu Anak-Nyo, apaa mule' uuka aiya salatan pompahasumbu'anto ka' Tumpu po'ule'mo na'ima', matantumo kita oposalamat mule' i uno nu kantumuu'an i Kristus.

EFESUS 2:16

Kalana Ia sinilakamo pinosalib, i Kristus nomposa'angu'mo ohua' na bansa aijo', ka' nompodamemo aha tiba Tumpu, sahingga madi'mo ko po'uwalian aijo'.

KOLOSE 1:21

Naipuan mae komiu majo'on hi Tumpu. Komiu monsampo bali' Ia, kalana kalakuan ka' pikilan miu ma'idek.

IBRANI 10:21

Ka' kita uuka aiya daagi'mo ko samian na Imam Daka', anu mompangakuimo pakalaja'an i Laigan nu Tumpu.

IBRANI 2:11

I Yesus nompolomasmo mian i dosa' nu aha iwi-iwi'; ka' Ia anu nompoloasmo, tiba aha anu pinoloasmo aijo', hingga-hinggat nontuumamo Tuuma samian. Mokonyo aijo' i Yesus madi' ma'ambang na mongakui aha aijo' sumomo to utu-utus-Nyo.

IBRANI 2:14

Kalana to mia-mian anu sinanggo-Nyo anak aijo', atina'mo mian anu timbali silaka, jadi i Yesus tinimbalimo pokakana sumo aha ka' tinumuu'mo pokakana sumo mian. Ia nombau sumo aijo', da kalana Ia sinilaka sumo aijo' Ia timbali mohopu'i Ibilis anu mongkuasai kapatean.

IBRANI 2:16

Jadi sinumbu'mo saba' misa' malaikat na tinulungan-Nyo, panyo lee' mae i Abraham.

IBRANI 3:1

To utu-utus bubuu' mian Kristen anu i lagamo suele nu Tumpu Allah! Soba popikilakon hondo-hondo na i Yesus aiya! Tumpu nonsaimo mae Ia samata-mata da timbali Imam Daka' i agama anu otoonginto.

IBRANI 3:2

Ia tulu-tulutan hondo hi Tumpu anu nompile'imo Ia da mombau pakalaja'an aijo' susumo i Musa naipuan mae tinulu-tulutanmo apaa na anu pinokauhakon nu Tumpu obau i Laigan nu Tumpu.

IBRANI 3:5

I Musa tulu-tulutan hondo salaku posaihon i uno nu Laigan nu Tumpu ka' mompotokakon hahan anu nu poto'ije nu Tumpu Allah aiyamae i ahop.

IBRANI 4:14

Mokonyo aijo' kita tionyo ahi' mintoong hoso-hoson i pangakuan nu kapalesaya'anto. Kalana kita daagi' ko Imam Daka' anu talasanggo, anu ninsoopmo sampe tinoka i ahop nu Tumpu Allah – atina'mo i Yesus anak nu Tumpu.

IBRANI 4:15

Imam Daka'to anu talasanggo aijo' misa' imam anu madi' moko ala mongoa'i apa-apaa na anu madi' opoko ala o oa'into. Panyo Ia sinobanmo i uno nu iwi-iwi' na han, pokakana sumo kita; ola Ia madi' nombau dosa'.

IBRANI 5:1

Batu-batu Imam Daka' opile'i hi aha mian anu palesayamo hi Tumpu, ka' o hangkat da mompojalan palentah nu Tumpu salaku wakin nu aha. Kalajanyo aijo'mo monsombahkon hi Tumpu, apa-apaa na obee' ka' okolobanakon bau pongampuni dosa'.

IBRANI 5:10

ka' Tumpu suele nompoto'imo Ia aijo' salaku i Imam Daka' susumo i Imam Melkisedek!

IBRANI 5:2

Imam Daka' aijo' manjoo' na anu madi' nupoko ala nu bau, ka' kalana aijo' ia tionyo ahi' mingkalakuan manonong hi to mia-mian anu madi' ko anu nu pisumbu-sumbu' ka' anu sinala'mo na jalannyo.

IBRANI 5:5

Sumo aijo'mo na i Kristus. Ia madi' nohangkat posi butong-Nyo da timbali Imam Daka'. Posi Tumpu na nohangkatmo Ia. Tumpu notatae hi Ia, “Anak-Ku na Beleyum; sinaa aiya Akumo na Tuuma nu Beleyum.”

IBRANI 6:20

I Yesus nombuka'mo jalan mamba i tampat aijo' bau kajalananto ka' ninsoopmo nokiita' binaumo Imam Daka'to sampe toka sidu-sidutu', susumo i Imam Melkisedek.

IBRANI 7:26

Jadi, i Yesus aijo'mo na Imam Daka' anu opalaluinto. Ia susi'; hi Ia madi' ko anu i humpak na kasala'an kabai pa' dosa' apaa. Ia gina'atakon nompala'i to mia-mian anu baladosa', ka' i liba'akon nokiita' i tampat anu lebe matangkas moliu-liu langit.

IBRANI 7:28

Atulan nu agama Yahudi mohangkat mian anu madi' ma'ima' da timbali imam daka'. Panyo salatan noko lapasmo na atulan aijo', Tumpu nojanji'mo ka' sinumpa'nyomo tukoonyo Ia mohangkatmo anu salaku bau Imam Daka', Anak anu pinotimbalimo bau Pomposalamat totu-totu'u ma'ima' sampe toka sidu-sidutu'.

IBRANI 8:1

Pinolengkatan nu anu sinisik iwi-iwi' aiya atina'mo: Kita daagi' ko Imam Daka' anu sumo aijo', anu sumuhang mompalentah hingga-hinggat tiba Tumpu Anu Matangkas na kuasanyo kiita' i suluga'.

IBRANI 8:3

Batu-batu Imam Daka' i hangkat da monsombahkon koloban kabai anu osombahkon hi Tumpu. Sumo aitu mule' na Imam Daka' to; Ia tionyo daagi' ko apa-apaa anu osombahkon.

IBRANI 9:11

Panyo i Kristus tinokamo salaku Imam Daka' lengkat mae i hahan anu ma'ima' anu polo-polo'mo daagi'. Kemah nu Tumpu anu pokalaja'an-Nyo salaku Imam Daka' aijo'mo na kemah anu lebe talasanggo ka' lebe ma'ima'. Aijo' misa' binau nu mian; alati'nyo misa' anu nolengkat mae i dunia anu pinotimbali aiya.