HOSEA 9:3 - KITAB NU TUMPU ALLA LELE MA'IMAI'

³ Belemiu o bansa Israel madi'mo daagi tataap jojoong i tano' anu binee'mo nu Tumpu hi belemiu. Belemiu tionyo ahi' minsusule'mo i Mesir, ka' tionyo ahi' mongkaanmo kaanon anu madi' toho' okaan kiijo' mae i Asyur.

HOSEA 9:3 ပူးပေါင်းရင်းမြစ်များ

1 TOMU-TOMUNDO' 9:7

saba' Ku laa'mo na mian nu Israel anu pinalesayamo hi beleng-Ku haha aijo' da bolimo jojoong i lipu' anu binee'-kumo hi aha. Ka' mule' Ku pala'imo na Laigan aiya anu tinantukan-Kumo bau ponsomban Aku. Iyaya mae mian nu Israel saja' opopo ambang ka' okokojoi.

2 TOMU-TOMUNDO' 17:6

– anu ko osio'nyomo na taun na i Hosea nompalentah – i Salmaneser nongalamo Samaria. Lantas mian nu Israel binoanyomo nokiijo' i Asyur salaku mian anu i hakop. Sambagian na aha pinojoong i kota' Halah, ka' sambagian mule' koko Kaunyo Habor i da'erah Gozan, ka' sambagian mule' i to kota-kota' i lipu' Madai.

YEREMIA 16:18

Dosa' tiba palabuatan ma'idek nu aha Ku balosakonmo nu hukuman pinduan lipat, kalana aha nohenyuimo lipu'-Ku nu pilogot manjoo' hondo. Pilogot haha aijo' madi' konyawanyo sumomo ahi' bangke' nu mian anu sinilakamo.”

YEREMIA 2:7

Namba ilipu' anu ma'omuk Aku na nomboa aha da molasaimo hasin nu tano'nyo ka' iwi-iwi' na anu ma'ima ikiijo' mae. Panyo ikiijo' mae tano'-Ku ihumimi'anmo nu aha ka' anung-Ku pinojadimo nu aha susumo sa'angu' na balang anu okahegatimo.

MOHAANGI 5:6

Kami mamba lewa' momoita kiijo' i Mesir, kami momoita anu okaan kiijo' i Asyur.

YEHEZKIEL 4:13

Tumpu notatae, “Sumo aijo'mo na balu-balu'nyo na aha mian nu Israel saidi' mae mongkaanmo kaanon anu otewa' madi' timbali okaan susumo koonyo nu atulan i Musa, salatan aha Ku boamo ka' opojoongmo ilipu' nu mian anu isalipu'an.”

DANIEL 1:8

Kalana tinulunganmo nu Tumpu, i Daniel nu kanonongi ka' nu kalibosi i Aspenas. I Daniel madi' hondo mongka'oho' ohumimi'i na butongnyo nu anu okaan ka' monginum anggur i laigan nu tomundo' kalana aijo' ia nomoitamo hi Aspenas da timbali mohumpak kaanon sangga'at.

HOSEA 11:11

Lengkat mae i Mesir aha tokamo mae ko lia'nyo sumomo ahi' tomonsi', ka' lengkat mae i Asyur sumomo ahi' sampahas na malapati'. Lantas aha Ku boamo minsusule' i laigan nu aha. Akumo na Tumpu anu notataemo.”

HOSEA 11:5

Mian nu Israel haha aijo' madi'mo mongka oho' minsusule' mae hi beleng-Ku, kalana aijo' aha tionyo ahi' minsusule'mo mamba i Mesir ka' bansa Asyur na mompalentahje aha.

HOSEA 7:11

Israel naha lajanganmo mokiijo' ka' mo uuka mae sumomo tomonsi' malapati' anu ponga'. Momonanyo mian haha aijo' nomoitamo bantuan hi aha mian nu Mesir, lapas aijo' aha nalaimo namba i Asyur!

HOSEA 7:16

Aha lasaja mombatuki topilo pilogot anu madi kokuasa apa-apaa. Aha madi bisa otahaimani sumo panah anu madi mayontok. To tana tanaas nu aha la saja motatae sombong. Mokanyo aitu aha tionyo opatei nu bajak ka nu kokojoi nu tomia mian nu Mesir.”

HOSEA 8:13

Aha mongka'ima'i monsombahkon koloban hi beleng-Ku ka' mongkaan ponoha' anu kinolobanakonmo aijo', panyo Aku Tumpu madi' montalima koloban haha aijo'. Uuka aiya Ku inau'mo na dosa' nu aha ka' mohukumo aha kalana dosa' nu aha haha aijo'; Po ule'mo Ku boa na aha i Mesir!

HOSEA 9:6

De balaa' tokamo mae hi belemiu ka' mule' oboamo ilipu' sangga'at saba' anu daagi jinojoong nu posihukmo nu aha mian Mesir da opateimo ka' olamunmo kiijo' i Memfis! Hemput tiba hii' tumuu'mo mae ka' mongkukubimo iwi-iwi' na tampat anu pinombauan nu belemiu laigan tiba bala-balang salaka anu mahan na olinyo.

IMAMAT 18:28

da belemiu boli o hukum ka' Nu laa'mo madi' timbali jojoong i tano' aijo'. Susumo to mia mian anu madi' monsumbu' Tumpu, anu jinojoongmo kiijo' mae ma'isa pe'e kino belemiunyo.

IMAMAT 20:22

Tumpu notatae, “Otuluti iwi-iwi' na atulan ka' palentah-ngKu, da belemiu madi' o laa' mompala'i lipu' nu Kana'an, ka' maumo pa' iyaya mae na pomboan-Ku belemiu.

IMAMAT 25:23

Tano' nu belemiu madi' timbali opobaluk sidu-sidutu'mo kalana tano' aijo' misa' belemiu na tumpunyo panyo anu nu Tumpu Allah. Belemiu ola susumo mian anu lengkat mae i salipu'an anu pinoloasmo da mompake tano' aijo'.

AMOS 7:17

Tumpu notatae tukoo-Nyo bengkele' nu beleyum tinimbalimo mian masala' i jala-jalan nu kota' ka' to ana-anak nu beleyum opateimo i pahampatean. Tano' nu beleyum obagi-bagimo hi mian sangga'at, ka' suele beleyum silakamo ilipu' anu madi' palesaya hi Tumpu. Mian aha i Israel memang oboamo ka' opojoongmo i sa'angu' na tampat, majo'on ilipu' nu aha.”

MIKHA 2:10

Tinjomo ka' lako'mo i aiya madi'mo daagi' ko ka amanannyo. Iwi-iwi' na dosa' nu belemiu nompotokamo mae balaa' anu okabuhuk hondo i tampat aiya.

SISIKON NU TO RASUL-RASUL 10:14

Tinaaman i Petrus, “Madi', Tumpu! Ma'isa toho' aku nongkaan apa-apaa anu madi' timbali o kaan kabai anu pahengas.”

PO'ULE' INGULIT 28:63

Susumo Tumpu sanang na mombee'i kabilahian hi belemiu ka' montuangi da belemiu manjoo', Ia mule' sanang na monsilakai ka' mohopu'i belemiu. Belemiu po'ule' mule' osabatakon i lipu' anu madi'mo pin kajojoonganmo nu belemiu.

PO'ULE' INGULIT 28:68

Tumpu po'ule'mo momboa belemiu mamba mokiijo' i Mesir sumake' kapan, mau mule' Ia toho'mo notatae tukoo-Nyo belemiu madi'mo po'ule' minsusule' mokiijo'. Ikiijo' mae belemiu mompobalukmo butong nu belemiu da timbalimo posaihon hi sampobali' nu belemiu, panyo madi' ko samian pe'e na anu mongka'oho' mongoli belemiu.”

PO'ULE' INGULIT 4:26

Langit ka' tano' na timbali sakisi sinaa aiya de maluannyo belemiu madi' tulu-tulutan hi belengku, belemiu malia-lia' sampa mate i tano' anu o jojoongi miu i santoa nu Kaunyo Yordan aijo'. Belemiu madi' pin na jojoong ikiijo', belemiu opateimo ingko-ingkot.

YOSUA 23:15

Panyo susumo Ia nombaumo batu-batu anu jinanji'-Nyomo hi belemiu, sumo aitu mule' na Ia sabole-bole mombau batu-batu anu tinanga'an-Nyomo mombaya'i belemiu.