HOSEA 9:10 - KITAB NU TUMPU ALLA LELE MA'IMAI'

¹⁰ Tumpu notatae, “Momonanyo Aku nongkabot aha mian nu Israel, Aku najama'mo hondo susumo mian anu nohumpakmo bua' nu anggur i padang anu mateges. Momonanyo aku nontoa mompolee' nu belemiu sinanangmo hondo na Aku susumo mian nontoamo bua'nu kau' ara anu ai-aijo'je na nimbua'. Panyo salatan aha nambamo ibungkutnyo nu Peor aha nontampu'unimo nonsombah Baal sahingga aha nahumimi'mo susumo pilogot anu nu nu kalibosi nu aha aijo'.

HOSEA 9:10 ပူးပေါင်းရင်းမြစ်များ

1 TOMU-TOMUNDO' 16:31

Ma'isa na'osa na ia i kantumuu'annyo lewa' mombau dosa' susumo i Tomundo' Yerobeam, pakalaus ia nongosoai mule' i Izebel anak i Tomundo' Etbaal mian nu Sidon, ka' mule' ia nonsombahmo Baal.

2 TOMU-TOMUNDO' 17:11

Aha mule' nompapuimo kamangian osombahkon hi pilogot aijo' hi iwi-iwi' na mezbah susumo anu saja' obau nu bansa-bansa anu i laa'mo nu Tumpu da bolimo jojoong i lipu' Kana'an. Aha nonsombahmo pilogot mau mule' Tumpu nontewa'mo. Batu-batu kalakuan nu aha anu madi' ma'ima' nonsaduakonmo Tumpu da pinusamo

MAZMUR 115:8

O' amalakon da sumo aijo'mo na uki' nu to mia-mian anu nombaumo sumo aijo' ka' iwi-iwi' na mian anu pinalesayamo hi ia.

MAZMUR 81:12

Panyo mian anu palesayamo hi belengku, madi'mo mohongo-hongo aku. Israel madi'mo tinulu-tulutan hi belengku.

NYANYIAN ANU TALASANGGO 3:6

Pa' aijo' anu tinoka lengkat i padang anu mateges; susumo tibuk nu apu anu butolu? Nohongnyo sumomo mur ka' kamangian, tiba iwi-iwi' na bada' anu manohong lengkat mae hi mian anu badagang.

YESAYA 28:4

Katalasanggoan nu kota' nu aha anu montampu'unimo luso' aijo' saidi' mae mingkotmo. Sisi'nyo sumomo sisi' nu bua' nu ara anu misa' pe'e kamahannyo, salatan otoamo balomo otipu ka' okaanmo.

YEREMIA 11:13

Pilogot nu aha Yehuda manjoo' hondo, sumo konjoo'nyo nu kota' nu aha. Mian anu jojoong i Yerusalem nompotinjomo mezbah-mezbah sumo konjoo'nyo nu jalan ikota' Yerusalem da bau ponsombahkonan koloban hi Pilogot Baal.

YEREMIA 24:2

Ponang anu palatamanyo ko isinyo bua' nu kau' ara anu toto ima-ima' sumo bua' nu kau' ara anu momona ingala na bua'nyo, panyo ponang anu ko ohua'nyo ko isinyo bua' nu kau' ara anu singkapmo nahutak, sahingga madi'mo timbali okaan.

YEREMIA 3:24

Sola' monsombah Baal, pilogot anu moko ambang aijo' ola ahi' da nonsaduakonmo kami da madi'mo kino to ana-anak mami ka' mule' potuu'on sapi' tiba domba, iwi-iwi' aijo' anu ingusahakonmo nu mompolee' mami salatanmo pe'e naipuan mae.

YEREMIA 3:25

Jadi bakasmo da otanggungmo mami na ambang ka' bakasmo na kami da madi'mo kino angga'nyo. Kalana, kami tiba mompolee' mami binaladosa'mo hi Tumpu Allah mami, ka' madi'mo toho' tinulu-tulutan hi iwi-iwi' na palentah-Nyo.”

YEREMIA 31:2

Ipadang tampat anu mapeges Ku potoaje na kalibosan-Ku hi aha anu madi' tinokan nu kasilaka'an. Tempo'nyo Israel noliomo kantumuu'an anu sanang

YEREMIA 5:31

to nabi-nabi binaleko'mo, to ima-imam mombau anu nu palentahkon nu Tumpu ola yayamo pongka'oho' nu kinyonyoa nu aha ka' belemiu mian anu palesayamo hi beleng-Ku nongka'ima'imo han aijo'. Panyo apaa na anu obau nu belemiu saidi' mae de tokamo na sinaanyo anu imihinyomo mae?”

YEHEZKIEL 20:8

Panyo aha madi' montuluti Aku ka' madi' mongka'oho' mohongo Aku. Aha madi' mongka'oho' mongalin iwi-iwi na patong nu aha anu okahegati aijo' ka' mule' madi' ahi mongka'oho' belenti na monsombah pilogot haha aijo' anu lengkat mae i Mesir. Tempo'nyo aha daagi' kiijo' mae, Aku sabenannyo mompotudunmo ahi' tambuha'-Ku hi aha.

HOSEA 11:1

Tumpu notatae, “Aku mongkalibosi Israel daagi' pe'e aha ise-ise', Ilagangku na anak-Ku aijo' nosabat mae lengkat i Mesir.

HOSEA 13:5

Itano' anu mateges ka' mule' i padang anu ewa, Akumo na anu nonjagai belemiu.

HOSEA 2:15

Iwi-iwi' na ale' nu anggurnyo Ku sule'akonje hi ia, ka' Bangka'nyo nu Kasusa'an Ku pojadimo tumban anu otaha'imani. Ikiijo' mae ia montalimamo Aku susumo tempo'nyo daagi' olitau, tempo'nyo ia sala'je no sabat mae lengkat i Mesir.

HOSEA 4:14

Panyo Aku madi' mohukum kalakuan nu aha aijo', kalana belemiu suele nambamo hi aha anu masala', anu mokalaja i laigan bau ponsomban tominuat, ka' tiba aha mule' belemiu nonsombahkonmo koloban hi tominuat. Totu'umo na potatae aiya: Bansa anu madi' mangalati' mongkona Tumpu, madi' moko ala tatahan.

HOSEA 4:18

Salatan aha malangu'mo kalana monginumo manjoo' na anggur, sanangmo na kinyonyoa nu aha masala'. Aha lebe mongka'ima'i o alu ka' madi' mongka'ima'i oholomati.

AMOS 4:5

Lako'mo monsombahkon roti salaku pompoita talima kase hi beleng-Ku ka' lako'mo sisik hi mian saba' belemiu nompaka tuangimo anu osombahkon! Tantu aijo'mo na anu oka'i ma'i nu bau nu belemiu!

MIKHA 7:1

Silakamo na aku! Aku sumomo mian anu no'ohopmo mamba montipu bua' nu kau' padahan nokolapasmo natempo'nyo nimbua'. Madi'mo daagi' ko bua'nyo na to kau-kau' Bua' nu anggur tiba bua' kau' ara anu toto ima-ima' iwi-iwi' iningkotmo tinipuan.

NOMBILANGMO 15:39

Jambu-jambunyo aijo' salaku bau pompotuka': De otoamo nu belemiu na aijo', belemiu tonginau'mo hi palentang-Ku iwi-iwi', ka' montulutimo. Ka' kalana daagi' ko aijo'nyo belemiu madi' mongkolilimi Aku, sahingga madi'mo montuluti posi pongka'oho' nu butong.

NOMBILANGMO 18:13

Iwi-iwi' aijo' belemiumo na tumpunyo. Batu-batu mian anu i auan nu belemiu anu madi' mahumimi' timbali mongkaan.

ROMA 6:21

Tempo'nyo aitu ka'untungan apaa na anu tinalima miu i hahan uuka aiya oka'ambangakon miu na o bau? Bauon haha aijo' ola momboa i kapatean!

PO'ULE' INGULIT 32:10

Tinokan-Nyo na aha hau-haunyo jojoong i tampat anu ling hondo ka' ewa, ka' ola saja' padang. Lantas Ia nonjagaimo ka' nompotuu'mo aha ka' jinagaannyo na aha salakumo ia na tumpu-Nyo.

PO'ULE' INGULIT 32:17

Aha nonsombahkon koloban hi tomi-tominuat anu ma'idek anu misa' Tumpu Allah, hi to pilo-pilogot anu madi' nusumbu' nu aha, to pilo-pilogot anu sala'je sinumbu' nu aha, anu madi' nu akui nu mompolee' nu aha.

PO'ULE' INGULIT 4:3

Pinosi toamo nu belemiu apaa na anu binaumo nu Tumpu Allah miu i Bungkutnyo nu Peor. Batu-batu mian anu monsombah Baal i tampat kiijo' pinatean-Nyomo,

TO MIA-MIAN KOPIAN 6:32

Kalana i Yoas notatae, “Pojohok da i Baalmo na mongewa i Gideon, kalana ia nongideimo mezbahnyo,” sahingga nolengkat pe'e i aijo' mian nonsanggohimo i Gideon “Yerubaal”.