4 Panyo Tumpu notataemo, “O Israel tiba Yehuda! Apaa na anu tionyo Ku bau hi belemiu? Liibosum hi beleng-Ku malia' hondo saimpotulu susumo sehu' kabai dondu'ok daagi' subu-subu hondo.
Tumpu notatae, “O Israel, Aku kahanda'mo montalima beleyum salaku anak-Ku, ka' mombee'imo beleyum lipu' anu oka'ima'i nu kinyonyoa, lipu' anu ma'ima' hondo idunia aiya songko-songko. Ku kahanda'i da beleyum monsanggo Aku tuuma nu beleyum, ka' madi'mo daagi' mompala'i Aku.
Pa' piniangkuka na sinaa anu ihikuhakonmo na na'ima'mo ahi' na kalakuan nu belemiu ka' nombaumo ahi' anu momposanang mae kinyonyoang-Ku. Belemiu iwi-iwi' nonsitujuimo da mompobebasmo ahi' to botu-botuan anu bubu' mae bansa nu belemiu ka' binalajanji'mo tiba Aku i uno nu Laigan-Ku.
Tumpu notatae, “Kadaka' Aku mongampunimo dosa-dosa' nu mian anu palesayamo hi beleng-Ku? Aha nompala'imo mae Aku ka' mule' nonsombahmo anu misa' Tumpu Allah. Aku na nombee'i anu okaan hi aha sampe aha nobosumo, panyo aha nasala'mo ka' toto minsan aha mambamo hi to mia-mian anu saja' masala'.
Kalana aijo' Tumpu Anu Mahakuasa notataemo, “Susumo logam, mian anu palesayamo hi beleng-Ku Ku uji'mo da aha madi'mo daagi' ko galo-galo'nyo. Apaa mule' na daagi' Ku bau hi aha mian anu palesayamo hi beleng-Ku nonombaumo palabuatan anu ma'idek?
Tumpu notatae, “O Israel te toho' mule' ahi' belemiu Ku pojohok kabai Ku pala'i. Te toho' mule' ahi' belemiu Ku hopu'i susumo Adma? Kabai pa' Ku baumo susumo Zeboim? Madi' sanang na kinyonyoang-Ku mombau han aijo' kalana liibos-Ku talalo hondo daka-daka' hi beleyum!
Kalana aijo' mian haha aijo' ihopu'anmo susumo sehu' kabai susumo dondu'ok daagi subu-subu. Aha saidi' mae sumomo abu' nu tangke nu gandum anu nu puuhimo nu mombun aijo' itampat pongututan gandum ka' mule' sumomo tibuk anu mosabat mae ipipa nu tibuk.
Tumpu notatae, “De Aku kahanda'mo mompa alin mian-Ku Israel anu palesayamo ka' po ule'mo mompokopiani kalakuan nu aha, panyo anu Ku toa ola ka'idekan tiba dosa' nu aha. Aha mompaha bale-baleko'i, aha mompinsoopi laigan nu mian ka' mombulingi, ka'aha mongagoi anu nu mian i jalan-jalan.
Panyo lele aijo' madi' mimbakat i uno nu kinyonyoa nu aha, sahingga madi' montahan pin. Salatan aha mongoa'imo susa' kabai o sakisa, kalana lele aijo', lau-laus aha moojalo.