HOSEA 11:11 - KITAB NU TUMPU ALLA LELE MA'IMAI'

¹¹ Lengkat mae i Mesir aha tokamo mae ko lia'nyo sumomo ahi' tomonsi', ka' lengkat mae i Asyur sumomo ahi' sampahas na malapati'. Lantas aha Ku boamo minsusule' i laigan nu aha. Akumo na Tumpu anu notataemo.”

HOSEA 11:11 ပူးပေါင်းရင်းမြစ်များ

YESAYA 11:11

Toka isinaa aijo' Tumpu po ule' mule' monggunakon kakuasa'an-Nyo ka' monsule'akonmo mae mian anu palesayamo hi Ia anu tinasisa i Asyur ka' i Mesir, ka' mule' i iwi-iwi na lipu' Patros, Sudan tiba Elam anu kiijo' i Babel, ka' mule' Hamat tiba iwi-iwi' na togong anu toto jo'o-jo'on.

YESAYA 60:8

Te apaa na aijo' anu i lumahapmo susumo kundom susumo malapati' anu hau-haunyo lumahap mobalikmo?

YEREMIA 31:12

Mamba i Puge'nyo nu Sion aha tokamo mae lame'na ohup nu aha otoa ka' manyanyi lame' hondo. Kalana iwi-iwi' apaa na anu binee'-Kumo hi aha, aijo'mo, gandum, lanya', anggur, sapi' tiba domba. Aha sumomo ahi' sa'angu' na taman anu sukup na ueenyo, ka' madi' ko anu kulang apa-apaa.

YEHEZKIEL 34:27

Iwi-iwi' na kau' mimbua'mo, iwi-iwi' na ale' ko hasinnyomo ka' iwi-iwi' na mian jojoong madi'mo ko anu mompoposia itano'nyo. De lante' anu pinompungu mian anu palesayamo hi beleng-Ku, Ku botu'akonmo ka' aha Ku pobebasmo da madi'mo nu botuani nu tomia-mian anu nombotuanimo aha, nusumbu'je nu aha taalu' Akumo ahi' na Tumpu.

YEHEZKIEL 34:28

Aha madi'mo daagi otololangi nu to bansa-bansa anu madi' monsumbu' Aku, kabai nu sa'u nu to bina-binatang anu mahangas. Aha tumuu'mo ma'ima' ka' madi'mo daagi ko samian anu lewa' mompahatakut aha.

YEHEZKIEL 37:21

Lantas poto'imo hi aha, taalu' Aku, Tumpu Anu Matangkas na Kuasanyo mongalamo mae iwi-iwi' na bansang-Ku lengkat mae ilipu'-lipu' anu kinalambananmo nu aha. Aha Ku posihukmo ka' po ule'mo Ku boa mae iposi lipu' nu aha.

HOSEA 3:5

Panyo tokaje mae na tempo'nyo bansa Israel po'ule'mo ninsusule' hi Tumpu nu aha, ka' hi tomundo' nu aha anu lengkat mae hi lee' i Daud. Lantas aha mabuhukmo ka' moholomatimo Tumpu ka' montalimamo to bala-balakat-Nyo.

HOSEA 7:11

Israel naha lajanganmo mokiijo' ka' mo uuka mae sumomo tomonsi' malapati' anu ponga'. Momonanyo mian haha aijo' nomoitamo bantuan hi aha mian nu Mesir, lapas aijo' aha nalaimo namba i Asyur!

OBAJA 1:17

“Panyo i bungkutnyo nu Sion saidi' mae ko anumo oposalamat ka' bungkutnyo aijo' timbalimo sa'angu' na tampat bau katokaan-Ku. Sahingga lee' i Yakub po Ule'mo montumpui tano' pusaka' nu aha.

ZAKHARIA 10:10

Lengkat mae i Mesir ka' lengkat mae i Asyur na aha Ku sule'akonmo. Ku pojoongmo na aha i posi lipu'nyo. Ku boamo na aha mamba i Gilead ka' suele i Libanon, sahingga songko-songko na lipu' me saja' aha.

ZAKHARIA 8:7

Aku momposalamatmo mian anu palesayamo hi beleng-Ku anu kiijo' mae isongko-songko na lipu' pipinomboanmo aha,

ZAKHARIA 8:8

ka' monsule'akonmo mae aha anu lengkat mae i kabete'an, ka' mule' anu lengkat mae i kinsoban, sahingga aha po ule'mo jojoong i Yerusalem. Aha timbalimo mian anu palesayamo hi beleng-Ku ka' Akumo na Tumpu nu aha. Aku mompalentahmo aha ma'i-ma'ima' ka' mule' adin.”