HAGAI 1:14 - KITAB NU TUMPU ALLA LELE MA'IMAI'

¹⁴ Sumo aijo' na Tumpu nongkakeha' kinyonyoa i Gubernur Zerubabel, tiba i Imam Daka' Yosua ka' mule' iwi-iwi' na mian anu ninsusule'mo mae lengkat itampat pinomboan ka' pinompojoongan aha da iwi-iwi' mokalajamo mombau Laigan nu Tumpu Anu Daka' Na-Kuasanyo, Tumpu Allah nu aha.

HAGAI 1:14 ပူးပေါင်းရင်းမြစ်များ

1 TAWARIKH 5:26

Kalana aijo' Tumpu Allah nompotuka'mo hi kinyonyoa i Pul tomundo' nu aha Asyur, sahingga i lambanannyomo tinumbuhan na lipu' aijo'. I Pul suele salakumo i Tiglat-Pileser. Lantas aha tulunan nu bansa Ruben, Gad, tiba tulunan nu bansa Manasye anu i sasu kabete'an Kaunyo nu Yordan binoamo nu aha salaku anu i hakop ka' mambamo pinojoong nu aha i Halah, i Habor, i Hara, ka' sa'angu' na tampat koko Kaunyo Gozan. I Kiijo' mae aha tinataapmo na jinojoong sampe sinaa uuka aiya.

2 TAWARIKH 36:22

Taun anu momonanyo salatan i Kores nompalentahmo, tomundo nu Persia, Tumpu nombaumo apaa na anu pinoto'inyomo hi Nabi Yeremia. Tumpu nompotuka'mo hi kinyonyoa i Kores da ia mombebakonmo palentah anu obasa'akon toka hi songko-songko na kalaja'annyo. Onyi'nyo sumo uuka:

EZRA 1:1

Taun momonanyo salatan i Kores tomundo nu Persia nompalentahmo. Tumpu nombaumo apaa na anu pinoto'i-Nyomo hi Nabi Yeremia. Kinakeha'mo nu Tumpu na kinyonyoa i Kores da nombee'mo sulat palentah anu binasa'akonmo hi songko-songko na kalaja'an. Onyi'nyo sumo uuka:

EZRA 1:5

Lapas aijo' to kapa-kapala nu aha toto sa'anakan mae nu tulunan Yehuda ka' Benyamin, to ima-imam ka' to mia-mian nu aha Lewi, ka' toto samian anu pinotuka'mo nu Tumpu Allah na kinyonyoanyo, mosadiamo ninsusule' i Yerusalem ka' po'ule'mo mombau Laigan nu Tumpu.

EZRA 5:2

Nohongo apaa na anu pinoto'i nu nabi ua'aha aijo', i Zerubabel anak i Sealtiel ka' i Yosua anak i Yozadak lia-lia' na aha nontampu'uni po'ule'mo nombau Laigan nu Tumpu kiijo' i Yerusalem, ua'aha na nabi aijo' na nontulungi.

EZRA 5:8

Da osumbu' nu belento Tomundo, taalu' kami nambamo i Propinsi Yehuda ka' nontoamo Laigan nu Tumpu, Tumpu Allah Anu Daka' na kuasanyo, hau-haunyo po'ule'mo binau nompake batu toto daka-daka' ka' pagannyo mesen i lapisan nu kau'. Talalo ahi' pinopokopianan na nombau, ka' saja' sakala-kalajanyo madi' toho' opo'idok.

NEHEMIA 4:6

Tempo'nyo aitu kami sabole-bolemo nombau pagan mesen aijo', ka' madi' pinin ingko-ingkot na pagan mesen aijo' inintonga'mo na kotangkasnyo na binau, kalana mian da'isan nakekemo hondo na nokalaja.

MAZMUR 110:3

De tokamo na sinaanyo beleyum mongkuasaimo, i bungkutnyo anu susi', layat nu beleyum sanang na mamba mahampate. Sumomo dondu'ok daagi' subu, to oli-olitau tokamo mae hi beleyum.

HAGAI 1:1

I taun kino ohua'nyomo na i Tomundo' Darius nompalentah Persia i tanggan sa'angu' bitu'on ko anomnyomo Tumpu notataemo nonggunakon i Nabi Hagai. Potuunon nu Tumpu aijo' tinujukannyo hi Zerubabel anak i Sealtiel, gubernur nu Yehuda tiba mule' hi Imam Daka' Yosua anak i Yosadak.

HAGAI 1:12

Lapas aijo' i Zerubabel tiba Yosua ka' iwi-iwi' na mian Israel anu ninsusule'mo mae lengkat itampat pinomboan ka' pinompojoongan kiijo' mae i Babel nontulutimo potatae i Hagai posaihon nu Tumpu aijo'. Aha nombaumo apaa na anu pinalentahkonmo nu Tumpu hi aha kalana nabuhukmo hi Tumpu.

HAGAI 1:15

Aha nontampu'uni nokalaja i tanggan uampulu' ka' opat bitu'on ko anomnyomo i taun ko ohua'nyomo na i Tomundo' Darius nompalentah.

HAGAI 2:2

Tumpu nonsaimo i Hagai da mompoto'i hi Gubernur i Zerubabel, i Imam Daka' Yosua ka' hi mian da'isan da opoto'i na potuunon sumo uuka,

HAGAI 2:21

Da opotokakon hi Gubernur Zerubabel. Koonyo nu Tumpu, “Madi'mo daagi pin langit ka' tano' Ku tenenggohimo,

1 KORINTUS 15:58

Mokonyo aijo', to Utu-utus anu ku ku kanonongi, tionyo ahi' komiu mahoson ka' moko ala montahan soba'an. Saja' mokalaja totu-totu'u bau kapentingan nu Tumpu, kalana osumbu' miu, iwi-iwi' na anu obau miu bau kapentingan nu Tumpu, madi' ola palasuma.

2 KORINTUS 8:16

Tahahumo hondo na kami montalima kase hi Tumpu, kalana Ia nompotimbalimo i Titus nakekemo sumo kami da montulungi komiu!

IBRANI 13:21

O amalakon da Tumpu anu pinolengkatan mae nu kabilahian aijo' momposukup hi komiu iwi-iwi na han anu ma'ima' anu opalalui miu da moko ala mombau apaa na anu Nu kahanda'i. O amalakon da kalana i Yesus Kristus, Tumpu na mokalaja i uno nu butongto apaa na anu Nu kahanda'i. Tionyo ahi' i Kristus o puji' sampe toka sidu-sidutu'! Amin.