HABAKUK 2:6 - KITAB NU TUMPU ALLA LELE MA'IMAI'

⁶ Panyo iwi-iwi na anu pinatundu'nyomo aijo' saidi' mae lewa'mo monsisik han anu ma'idek ka' mule' lewa'mo mongalu. Aha motatae, “Kinutukan na beleyum kalana montambun balang anu misa' belemiu na tumpunyo! Daagi hipian na kopinnyo na beleyum mompokaya butong nu beleyum anu lewa'mo mompakisa to mia-mian anu kosamaya'nyo hi beleyum da bau pombayan samaya nu aha?”

HABAKUK 2:6 ပူးပေါင်းရင်းမြစ်များ

MAZMUR 94:3

O, Tumpu sampe toka hipian na kopinnyo, na mian anu ma'idek na kinyonyoanyo mongoa'i lame'? Sampe toka hipian na kopinnyo, O, Tumpu?

AMSAL 22:16

Ihe na mongka'oho' timbali kaya, tiba jalan monsansala mian anu kasiasi ka' mombee'i palasen hi mian anu kaya, imihinyo mae timbalimo kasiasi hondo.

YESAYA 10:13

Tomundo' nu aha Asyur talalo molabi-labi na motatae, ia nontaloakon, “Iwi-iwi' na anu binaungkumo aijo' kalana kakuasa'anku. Aku monsumbu' monggoliliakon ka' mule' aku pande. Madi'mo pinobee'ku na kobata-batasnyo bansa sa'angu' tiba bansa sangga'at ka' mule' pinahuhuakonkumo na talakonan nu aha. Susumo sapi' pinahampeja'akonkumo na aha mian anu pompalentah.

YESAYA 44:20

Mian anu nombau aijo' pokakanamo nongkaan abu'. Mian aijo' pinoponga'mo nu pikilannyo pipinonga'mo sahingga ia susa'mo na daagi otulungi. Ia madi'mo daagi' moko ala mongakui saba' patong anu aijo' ilimanyo samata-mata ola ahi' mongakali.

YESAYA 5:8

Silakamo na belemiu anu lewa'mo nongoli ka' lewa'mo nongagoi ale' da bau pontuangi apaa na anu nu belemiu! Madi' pin mingkotmo na tampat nu aha mian sangga'at sahingga me belemiu na jojoong ilipu' aiya.

YESAYA 55:2

Bau apaa na mongoli tulu-tulumo anu madi' moko pa'osa, ka' bau apaa na mokalaja de madi' momposanang? Batukimo na palentang-Ku, da belemiu mongkaan anu ma'ima', ka' molasaimo kaanon anu matami'.

YEREMIA 17:11

Sumomo ahi' tomonsi' mongokobi anu misa' nggalau'nyo, sumo aijo'mo na mian anu tageo' na kinyonyoanyo nohumpak halata'nyo. Toka ipohintonga'anmo nu umunnyo mingkotmo na halata'nyo aijo' iwi-iwi'. Ipupuusnyomo nu kantumuu'annyo, onyata'je taalu' ia mian anu ponga' ahi' hondo.

YEREMIA 29:22

Sahingga de bisuanyo aha mian anu binoamo lengkat mae i Yerusalem namba i Babel mongkutukimo ihehe na mian, aha motataemo, ‘O amalakon da Tumpu mombaumo beleyum susumo i Zedekia tiba i Ahab, anu pinapuanmo titu-tituu' nu tomundo' Babel’.

YEREMIA 50:13

Kalana Aku notambuha'mo sahingga Babel timbalimo tampat anu nohobo'-hobo'mo ka' madi'mo daagi' ko anu monjojoongi. Iwi-iwi' na mian anu motulu ikiijo' tolokengkengmo ka' mule' mabuhukmo.

YEHEZKIEL 32:21

To tale-talenga' anu toto babaani ka' mule' aha to mia-mian nu Mesir anu nahampate nolabotmo mian nu Mesir tahahumo na kinolame'nyo i dunia nu mian anu sinilakamo. Aha nontaligalaimo sumo uuka, ‘To mia-mian anu madi' monsumbu' Tumpu Allah aijo' sinilakamo i uno nu pahampatean. Uuka aiya aha tinokamo mae i aiya ka' matimale'mo i aiya!’

MIKHA 2:4

Nasib nu belemiu nu gunakonmo nu mian bau ponsindin ka' aha mongajanmo nyanyian anu onyanyiakon de ko anumo silaka, sumo uuka, ‘Tumpu nonsilakaimo lipu' mami aiya ka' mule' nombee'mo hi aha anu nomboamo kami. Kami memang ahi' ihansunmo totu-totu'u.’ ”

HABAKUK 1:15

Bansa Babel nohakopmo to mia-mian nu peka susumo au'aitu aha aijo' ikan. Mian haha aijo' ihela'mo i uno nu buani ka' bansa Babel binalasana-sanangmo kalana aha nohumpakmo hasinnyo.

HABAKUK 2:12

Kinutukan na beleyum! Kalana palabuatan nu beleyum ma'i-ma'idek atina' sahingga noko alamo nombau kota'. Ka' nombau atina' lewa' nompatei mian.

HABAKUK 2:13

Iwi-iwi' na bansa anu pinatundu'mo nu beleyum pagala binala usaha panyo madi' kinogunanyo, ka' iwi-iwi' na anu pinotinjonyo nu aha ola ningkot notoyo' nu apu. Iwi-iwi' aijo' pongka'oho' nu Tumpu Anu Daka' na kuasanyo.

NOMBILANGMO 23:18

Lantas i Bileam nompoto'imo apaa na anu jadi, sumo uuka, “O, Balak, anak i Zipor, imbo' toka mae aiya potombihing apaa na anu kahanda' ku taloakon.

NOMBILANGMO 23:7

Lantas i Bileam nompoto'imo sisikonnyo sumo uuka, “Lengkat mae i Aram, bungkutnyo kiijo' mae i sasu kabete'an, i Balak, tomundo nu aha Moab nolagamo aku, ka' notatae, ‘Tokamo mae, poto'i mae hi belengku. Kutukimo na bansa Israel aijo'!’

LUKAS 12:20

Panyo Tumpu notatae hi ia, ‘O anu ponga'! Pihi uuka mule' beleyum matemo, lantas ihemo ahi' na mohumpak iwi-iwi' kakaya'an anu ilimu'umo bau kapentingan nu butongum?’

1 PETRUS 4:7

Iwi-iwi na apaa mongahopi ka'ahenannyo, mokonyo aijo' okuasai ahi' na butong miu ka' balajaga-jaga, da belemiu moko ala timbali balado'a.