FILIPI 3:10 - KITAB NU TUMPU ALLA LELE MA'IMAI'

¹⁰ Ola sa'a-sa'angu'nyomo na ku kahanda'i aijo'mo da aku monsumbu' i Kristus, ka' mongoa'i kuasa anu nompotumuu'mo Ia sinilaka. Ku inde'i da mongoa'i sansala hingga-hinggat tiba Ia, ka' timbali pokakana sumo Ia i uno nu han Ia sinilaka.

FILIPI 3:10 ပူးပေါင်းရင်းမြစ်များ

YEREMIA 9:23

Tumpu notatae, “Mian anu pade madi' timbali buulon kalana kapandeannyo aijo' ka' mule' mian anu mahoson kalana kahosonannyo aijo' ka' mian anu kaya kalana kakaya'annyo aijo'.

MATIUS 20:23

I Yesus notatae, “Memang komiu monginumje suele i mangko'-Ku. Panyo mongkona ihe na anu sumuhang i kowi ka' i koanan-Ku, aijo' misa' kuasang-Ku na montantukan. Tampat-tampat aijo' bau tampat nu to mia-mian anu tinantukanmo nu Tuumang-Ku.”

YOHANES 10:18

Madi' ko samian pe'e moko ala mongala aiya hi beleng-Ku. Aku nombee' posi pongka'oho'-Ku. Aku ko kuasa mombee', ka' ko kuasa po'ule' mongala. Aijo'mo na palentah anu ingalang-Ku hi Tuumang-Ku.”

YOHANES 17:3

Aiyamo na kantumuu'an kopian ka' toka sidu-sidutu'; da mian monsumbu' kita Tuuma, ola sa'a-sa'angu'nyomo na Tumpu anu totu'u, ka' monsumbu' i Yesus Kristus anu sinai mae nu kita Tuuma.

ROMA 8:17

Jadi, de kita to ana-anak-Nyo, tantu kita mule' ko hak mohumpak hi Ia, anu tionyo montalima to bala-balakat anu pinosadiamo nu Tumpu bau bagi nu to ana-anak-Nyo. Kita tionyo mohumpak hingga-hinggat tiba i Kristus apaa na anu pinosadiamo nu Tumpu hi Ia; kalana de kita mongoa'i sansala tiba i Kristus, kita suele opopodaka' tiba Ia.

ROMA 8:29

Aha anu pinile'anmo nu Tumpu, pinoko tantukanmo lengkat pe'e i imomoonanyo da timbali pokakana sumo Anak-Nyo, aijo'mo i Yesus Kristus. Kalana aitu Anak aijo' timbalimo anu tongkoimoona hi aha anu moto utus manjoo'.

ROMA 8:36

I Uno nu Kitab nu Tumpu tinulis sumo uuka, “Sansina-sinaa kami tumuu' i uno nu balaa', kapatean kalana Beleyum. Kami obau sumo domba anu okahanda'imo okolot.”

2 KORINTUS 1:10

Iamo na anu nomposalamatmo kami i balaa' nu kapatean anu daka' aijo'. Ka' Iamo suele na momposalamat kami i sinaa imihinyo mae, kalana ola hi Ia na kataha'imanan mami.

2 KORINTUS 1:5

Iwi-iwi' na kasansala'an anu ingoa'anmo i Kristus suele sumo aijo'mo na konjoo'nyo na anu ingoa'anmo mami. Ka' kahosonan anu i humpakmo mami hi Kristus, kinyonyoa mami pinohosonmo hondo.

2 KORINTUS 13:4

Memang tempo'nyo Ia sinalib, Ia madi'mo noko ala nombau apa-apaa, panyo uuka aiya Ia tinumuu'mo kalana kuasa nu Tumpu Allah. Kami suele madi' moko ala mombau apa-apaa i uno nu kantumuu'an mami mosa'angu' tiba i Kristus. Panyo de mongahopi komiu, kami suele mahosonmo hingga-hinggat tiba i Kristus kalana kuasa nu Tumpu.

GALATIA 2:20

Uuka misa'mo aku na anu tinumuu', panyo i Kristusmo na tinumuu' i uno nu butongku. Kantumuu'an aiya anu ku oa'i uuka aiya aitumo tumuu' palesaya hi Anak nu Tumpu anu mongkalibosi aku ka' anu nongkulubanakonmo butong-Nyo kalana aku.

GALATIA 6:17

Ka' mule' bolimo ko samian pe'e na po'ule' monsusa'i aku, kalana i butongku daagi'mo kinotopia-piangkuka na ko bukuti'nyo na aku nombatukimo i Yesus.

EFESUS 4:13

Tiba jalan anu sumo aijo' kita iwi-iwi' mosa'angu'mo i kapalesaya'an anu pokakana ka' pangalati'an anu pokakana mongkona Anak nu Tumpu. Ka' kita timbalimo to mia-mian anu motu'amo na pikilan ka' kopipinnyo ko pintu-pintuangnyomo talakana' sumo i Kristus.

FILIPI 3:8

Misa' ola hahan anu sinanggomo aijo' panyo ahi' iwi-iwi na apaa kusangka sumo hahan anu ola mompolugi' aku. Anu daagi' hi belengku uuka aiya aijo'mo na lebe ko angga'nyo: aijo' mo monsumbu' i Kristus Yesus, Tumpungku. Kalana i Kristus, sahingga aku nolapasakonmo iwi-iwi na aijo'. Kusangka iwi-iwi' aijo' ola sumo duhehe da timbali ku humpak na i Kristus,

KOLOSE 1:24

Uuka aku sanang na mongoa'i sansala kalana komiu. Kalana sansala anu ingoa'anmo nu butongku, aku momposampa'mo apaa na anu tionyo daagi' nu oa'i i Kristus kalana jama'at-Nyo, aijo'mo butong-Nyo.

KOLOSE 2:13

Naipuan mae komiu natemo na kapalesaya'an kalana komiu binala dosa'mo, ka' kalana komiu madi' sinunat nu adat nu dunia. Panyo uuka aiya Tumpu nompotumuu'mo komiu hingga-hinggat tiba i Kristus. Tumpu nongampunimo iwi-iwi' na dosa'to,

KOLOSE 3:1

Komiu po'ule'mo pinotumuu' hingga-hinggat tiba i Kristus. Mokonyo aijo' tionyo ahi' komiu bala usaha da mohumpak hahan anu i suluga', anu kiita' mae na i Kristus mompalentah hingga-hinggat tiba Tumpu.

1 PETRUS 1:3

Imbo' na kita montalima kase hi Tumpu, Tuuma Tumpunto i Yesus Kristus! Ia talalo mongkalibosi kita, aijo' na pu'unnyo Ia nombee'imo kantumuu'an bu'ou hi kita, aijo'mo i Yesus Kristus sinilaka po'ule'mo pinotumuu'. Aiya mompokeman kita da mahoson na montaha'imani.

2 PETRUS 1:13

De aku daagi' tumuu', ku oa'i pantas na saja' mompotuka' belemiu i hahan aijo'.

1 YOHANES 2:3

De kita tulu-tulutan hi iwi-iwi' na palentah nu Tumpu, aijo'mo na tandanyo taalu' kita nonsumbu'mo Tumpu.

1 YOHANES 2:5

Panyo mian anu tulu-tulutan i potatae nu Tumpu, mian aijo' mongkalibosi Tumpu totu-totu'u. Aijo'mo na tandanyo taalu' kita tumuu' nosa'angu'mo tiba Tumpu.

ANU PINOTO'I HI YOHANES 1:18

Akumo na Ia anu tinumuu'mo! Aku sinilakamo, panyo toamo, Aku tumuu'mo sampe toka sidu-sidutu'. Aku mongkuasai kapatean, ka' i dunia nu mian anu i natemo.