FILIPI 1:20 - KITAB NU TUMPU ALLA LELE MA'IMAI'

²⁰ Anu talalo ku ka'ima'i ka' kugagan aijo'mo da boli hondo-hondo aku madi' mingkaliangan i uno nu kalajangku. Panyo ahi' kugagan da iwi-iwi' na tempo' lebe-lebe mule' uuka aiya, aku timbali baani sahingga i uno nu kantumuu'anku – pa' aku tumuu' kabai silaka – i Kristus na opopodaka'.

FILIPI 1:20 ပူးပေါင်းရင်းမြစ်များ

MAZMUR 119:116

Pohosonakon mae na aku susumo anu jinanji'mo nu Belento da aku tumuu', boli opojohok dumo madi' ku humpak, na anu tinaha'imanankumo.

MAZMUR 119:80

O' amalakon da kinyonyoangku madi' mosele mompala'i atulan nu Belento, da aku madi' ma'ambang.

MAZMUR 25:2

O Tumpu-ngku, aku palesayamo hi Belento! Boli pojohok na aku opopo'ambang, ka' boli nu soso'oya'i nu anu monsampo bali' mae aku.

MAZMUR 62:5

Belemiu ola batanga' monabu'akon ia da madi'mo talasanggo na sanggonyo. Belemiu mongka'ima'imo baleko'; nganga' nu belemiu montaloakon mombalakati, panyo i uno nu kinyonyoa nu belemiu montotobi'akon.

AMSAL 10:28

Anu nu taha imani nu mian anu manonong na kinyonyoanyo mompotimbali ia sanang na kinyonyoanyo; anu nu taha imani nu mian anu ma'idek na kinyonyoanyo madi'mo ko apa-apaa anu nu humpak.

AMSAL 23:18

da kantumuu'an nu beleyum anu aiya mae i ahop timbali ma'ima ka' anu nu taha'imani madi' mokangkan.

YESAYA 45:17

Panyo Israel nuposalamatmo nu Tumpu; kasalamatannyo madi' ola sasaingoni'. Belemiu madi'mo opopo ambang ka' o'alu sampe toka sidu-sidutu'.’ ”

YESAYA 50:7

Kalana Tumpu montulungimo mae aku, sahingga aku madi'mo ahi' opopo'ambang. Aku nompohosonmo kinyonyoangku da sabaan ahi'; ku sumbu' saba' aku na madi' ahi' opopo'ambang.

YESAYA 54:4

Boli mabuhuk, beleyum madi opopo'ambang; madi'mo o, alu ka' lewa' mahasasungonan. O kolilimimo nu beleyum na beleyum madi' namomong tempo'nyo daagi' olitau; madi'mo daagi' monginau' na beleyum iliing tempo'nyo beleyum binalumo.

YOHANES 21:19

(Tiba potatae aijo' i Yesus nompoto'imo mosia na i Petrus silaka saidi' mae mompopodaka' Tumpu.) Lapas aijo' i Yesus notatae hi Petrus, “Batuki mae na Aku!”

SISIKON NU TO RASUL-RASUL 20:24

Panyo aku madi' mompajuli kantumuu'anku aiya, asan aku moko ala mompomingkot kalaja anu binee'mo nu Tumpu Yesus hi belengku ka' asan aku tulu-tulutan toka imihinyo nu kantumuu'anku mompolele Lele Ma'ima' aijo' mongkona balakat nu Tumpu.

SISIKON NU TO RASUL-RASUL 21:13

Panyo tinaamannyo, “Apaa na gunanyo kita Utus humaang sumo aiya sahingga monsaduakon kinyonyoangku ma'idekan? Aku noko sadiamo misa' ola da o hakop i kiijo' mae, panyo maumo o patei pe'e kalana i Tumpu Yesus.”

SISIKON NU TO RASUL-RASUL 4:31

Ilapas na aha binalado'a, tampat sinihukan nu aha aijo' tinolohenggomo. Aha iwi-iwi' kinuasanmo nu Roh nu Tumpu ka' mulaimo binaani hondo na notatae mongkona lele lengkat mae hi Tumpu.

ROMA 12:1

To Utu-utus! Tumpu talalo ma'ima' hi kita. Mokonyo aijo' ku poita hondo-hondo na komiu monsombahkon butong miu sumo sa'angu' na panyombahan anu tumuu' ola sa'a-sa'angu'nyo hi Tumpu tiba mule' anu momposanang kinyonyoa-Nyo. Komiu monsombah hi Tumpu tionyo sumo aijo'.

ROMA 5:5

Anu otaha'imani susumo aiya madi' ahi' mombaleko'i kita, kalana kinyonyoanto ingisianmo nu Tumpu nu liibos-Nyo. Tumpu nombau aijo' montului Roh-Nyo, anu binee'mo hi kita.

ROMA 6:13

Boli mule' kita Utus mombee' bagi-bagian nu butongum i kuasa nu dosa' ka' opakemo i to kaha-kahanda' anu ma'idek. Panyo simpalakonmu na butongum hi Tumpu salaku mian anu ilalinmo lengkat i kasilakaan mokiijo' i kantumuu'an. Simpalakonmo na butongum iwi-iwi' hi Tumpu da opake mombau kahanda' nu Tumpu.

ROMA 6:19

Kalana mongalati'i, komiu ma'isa moko ala, aku nompake sonto-sonto' tobotuanan da lebe dengke na komiu mangalati'. U'utu mae komiu mombee' butong miu iwi-iwi' salaku botuan nu hahan anu mahenyu ka' anu ma'idek bau kapentingan nu han anu ma'idek. Sumo aitumo mule' tempo' uuka, tionyo komiu monsimpalaakon butong miu iwi-iwi' salaku posaihon mombau pongka'oho' nu Tumpu, apaa na anu nukahanda'i nu Tumpu da miu susi'.

ROMA 8:19

Songko-songko na dunia daka-daka' na kinyonyoa montanda'i te tempo'nyo Tumpu momponyata' to ana-anak-Nyo.

ROMA 9:33

Mongkona batu aijo', i Kitab nu Tumpu tinulis sumo uuka, “O intomakon na aiya: I Sion pinotimpas-Kumo sambatu na batu anu monsaduakon mian tosumpun; aijo'mo sambatu na batu daka' anu monsaduakon mian motua'. Panyo mian anu palesaya hi Ia madi' mompele-pele'.”

1 KORINTUS 15:31

To Utu-utus! Sansina-sinaa aku monta'up sansala kalana aku sanang na montoa kantumuu'an miu, kalana komiu pinalesayamo hi Kristus Yesus Tumpunto.

1 KORINTUS 6:20

Ingolimo nu Tumpu na komiu ka' pinolunasnyomo na olinyo. Mokonyo aijo', opake na butong miu ma'i-ma'ima' sahingga Tumpu opopodaka'.

1 KORINTUS 7:34

ahennyo anu nupopikilakon mobagi-bagimo. Samian na boune anu madi' ko langkai'nyo, kabai samian na langkoyang, manjoo' mompopikilakon hahan mongkona Tumpu, kalana ia mongka'oho' da butong ka' santuu'nyo timbali Tumpu na tumpunyo. Panyo samian na boune anu ko langkai'nyomo, momposa'angu'mo pikilannyo i hahan nu dunia aiya, kalana ia mongka'oho'mo momposanang kinyonyoa nu langkai'nyo.

2 KORINTUS 10:8

Aku madi' ma'ambang de aku talalo mombuulakon kakuasa'an anu binee'mo nu Tumpu hi kami, kalana kakuasa'an aijo' binee' mae da mombangonakon komiu misa' da mongidei.

2 KORINTUS 3:12

Kalana kami montaha'imani anu susumo aijo', sahingga kami baani na motatae sumo aijo'.

2 KORINTUS 4:10

Saja' o'oa'i i butong mami na i Yesus sinilaka, da kantumuu'an-Nyo suele saja' otoa i butong mami.

2 KORINTUS 5:15

I Kristus sinilaka bau pontokong mian iwi-iwi', da to mia-mian anu totuu', madi'mo daagi' tumuu' bau posi anu nu butongnyo, panyo baumo bagi i Kristus anu sinilakamo ka' nompo'ule'mo tinumuu' kalana kapentingan nu aha.

2 KORINTUS 7:14

Aku memang nombuulakonmo komiu hi ia. Talima kaseh komiu madi' nongambangi aku. Iwi-iwi' na anu toho'mo tinaloakon mami hi komiu totu'u. Sumo aijo' mule' apaa na anu binuulakonmo mami mongkona komiu hi Titus memang ahi' totu'u.

2 KORINTUS 7:4

Kupalesaya totu-totu'u na komiu. Ka' mule' kami sanang hondo hi komiu! Mau mule' kami mongoa'i manjoo' na kasusa'an, molumu hondo na kinyonyoangku kalana komiu. Kinyonyoangku bilahi hondo!

FILIPI 1:14

Ka' aku tinalungku' nonsaduakonmo manjoo' na to mia-mian Kristen i kota aiya nompaka palesayamo mule' hi Tumpu, sahingga aha nompaka baanimo na mombebakon potuunon nu Tumpu, ka' madi'mo maha pabuhukan.

FILIPI 2:17

Ugaat aku saidi' mae opateimo ka' baso'ku timbalimo sumo kuluban anu obubusakon i bawo nu anu osombahkon komiu hi Tumpu Allah salaku sa'angu' na tanda saba' komiu pinalesayamo hi Ia. De memang aijo' tionyo sumo aijo', aku montalima kase i han aijo' ka' lame'mo hingga-hinggat tiba komiu.

KOLOSE 1:24

Uuka aku sanang na mongoa'i sansala kalana komiu. Kalana sansala anu ingoa'anmo nu butongku, aku momposampa'mo apaa na anu tionyo daagi' nu oa'i i Kristus kalana jama'at-Nyo, aijo'mo butong-Nyo.

1 TESALONIKA 5:23

O amalakon da posi Tumpuje na mombee'i kita ka'ima'an, mompotimbali komiu mian anu totu-totu'u tumuu'mo samata-mata hi Tumpu. O amalakon da Tumpu monjagai butong miu, iwi-iwi' mau mule' roh, santuu' kabai pe'e butong miu, sahingga madi' ko ideknyo de Tumpunto i Yesus Kristus mompo'ule'mo mae toka.

1 PETRUS 4:16

Panyo de komiu mongoa'i kasansala'an kalana komiu mian Kristen, boli ma'ambang kalana han aijo'. Ola ahi' montalima kase hi Tumpu, kalana komiu momboa sanggo i Kristus.

1 YOHANES 2:28

Jadi to ana-anakku, saja' ahi' tumuu' mosa'angu' tiba i Kristus, da saidi' mae de tempo'nyomo Ia toka, kita buke-buke' nu kabaanian na mangadap hi Ia, ka' madi' maninsuluk kalana ma'ambang.