EZRA 3:10 - KITAB NU TUMPU ALLA LELE MA'IMAI'

¹⁰ Salatan to mia-mian anu mokalaja i laigan aijo' nontampu'unimo nombau mesen bau pompotinjoan Laigan nu Tumpu, to ima-imam nompusokmo baju' jubah, ka' sika-sika toong na tolompet ka' singkap motinuminjo toto samian. Aha to mia-mian nu Lewi anu sa'anakan mae i Asaf suele tinuminjomo i kiijo' ka' sika-sika toong na gong toto ise-ise'. Aha nompuji-puji'mo Tumpu susumo koonyo nu atulan anu tinantukanmo salatanmo pe'e tempo'nyo i Tomundo Daud.

EZRA 3:10 ပူးပေါင်းရင်းမြစ်များ

1 TAWARIKH 15:27

Tempo'nyo aitu i Daud nompusok jubah hude Lenan anu ma'ima' hondo na kina'ut, sumo aitu mule' an aha anu mahaik musik ka' i Kenanya kapala nu aha ka' aha to mia-mian nu Lewi anu nonsimbu Peti' Palajanjian aijo'. I Daud suele nompusok baju' efod.

1 TAWARIKH 16:37

Lapas aijo' i Tomundo' Daud nombee'imo i Asaf kalaja ka' to mian-mian sangaa'at aha Lewi anu saja' mongulus de monsombahmo i tampat pompo'una'an Peti' Palajanjian nu Tumpu. Sansina-sinaa aha tionyo ahi' mokalaja i kiijo',

1 TAWARIKH 16:42

I Heman tiba i Yedutun suele kalajanyo mompuhi tolompet, simbal ka' pakakas nu musik sangga'at anu opuhi de manyanyimo nyanyian bau pompuji'. To mia-mian aha mae sa'anakan i Yedutun binee'an kalaja bau ponjaga sabatan toto daka-daka' haha aijo'.

1 TAWARIKH 23:5

4.000 na mian binee'an kalaja monjaga, ka' 4.000 na mian mule' mompuji' Tumpu mompake pakakas musik anu pinotoukamo.

2 TAWARIKH 35:14

Lapas aijo' aha mian nu Lewi nombagi-bagije anu bahagianmo nu aha ka' anu nu to ima-imam lee' mae i Harun. Kalana sangkutnyo pinihi na to ima-imam haha aijo' nokalaja nonsombahkon binatang salaku koloban anu opotunu, ka' nompapui lompo'nyo nu koloban haha aijo'.

2 TAWARIKH 35:15

To mia-mian anu pande na mahaik musik aha sa'anakan mae i Asaf anu minsoop tulunan mae nu bansa Lewi, jojoong i tampat anu tinantukanmo i Tomundo Daud hi aha. Aiya na sanggo nu aha: i Asaf, i Heman tiba i Yedutun ka' samian na nabi anu mokalaja hi tomundo. To mia-mian anu monjaga iwi-iwi' sabatan daka' madi' timbali mompala'i ponjaga'an nu aha, kalana aha timbali molame'akon Paskah i tampat ponjaga'an nu aha nu boaije nu aha mian nu Lewi sangga'at nabagi nu aha.

EZRA 5:16

Lantas tinokamo na i Sesbazar i Yerusalem ka' ia nompotimpasmo mesen anu momona binau, da bau pompotinjoan Laigan nu Tumpu aijo'. Salatan pe'e aitu sampe uuka aiya madi'mo kino tetompo na nombau Laigan aijo' panyo ma'isa tinimbali.’

MAZMUR 150:5

Opuji' na Ia nu ceracap anu polinsing, opuji' na Ia nu gong ise-ise' anu selelegan.

HAGAI 2:15

Tumpu notatae, “Soba, palahatikan apaa na anu jinadimo ma'isa pe'e tinoka isinaa aiya, aijo'mo ma'isa pe'e Laigan-Ku aiya pinoko ima'an! Mosiamo ahi' na ka'ada'an nu belemiu tempo'nyo aitu?

ZAKHARIA 4:6

Malaekat aijo' nonsaimo aku da mamba mompotokakon hi Zerubabel potuunon nu Tumpu sumo uuka, “Misa' kalana kahosonan nu suludadu ka' mule' misa' posi kahosonan nu beleyum sahingga binala hasinmo, panyo ola ahi' kalana roh-Ku.

ZAKHARIA 4:7

Maumo ko anu molewot anu ko daka'nyo sumo bungkutnyo timbali molinggin da madi'mo ko anu atina i ahop nu beleyum. Beleyum po ule'mo mombau Laigan-Ku, ka' de beleyum mompotimpasmo batu pundasi i tampatnyo to mia-mian motataemo, ‘Ebeh na kino ima'nyo!’ ”

ZAKHARIA 6:12

Poto'iakon hi ia, saba' Akumo na Tumpu Anu Daka' na Kuasanyo nonotataemo, ‘Mian anu osanggohi Sang Tunas na saidi' mae balahasin i tampat kajojoonganyo ka' ia po ule'mo mombau Laigan nu Tumpu.

ZAKHARIA 7:3

Aha mule' ahi' sinai da mompokilawakon hi to ima-imam ka' hi to nabi-nabi sumo uuka, “Pa daagi' palalu na kami mohangi Laigan nu Tumpu iha-ihansunmo ka' opuasa'akon de kakonamo i bitu'on ko olima'nyomo susumo anu saja'mo obau mami nonotau-taunmo na kopinnyo?”

1 SAMUEL 22:18

Kalana aijo' notataemo na i Saul hi Do'eg, “Donganmo lia-lia'! Beleyumo na mompatei aha!” Sahingga nokiijo'mo na i Do'eg ka' pinateannyo na imam haha aijo'. Sinaa aijo' pinateannyo aha ualumpulu' ka' olima' na imam anu kohaknyo mompusok baju' nu imam.