EZRA 1:7 - KITAB NU TUMPU ALLA LELE MA'IMAI'

⁷ I Kores nonsabatakonmo to mangko-mangko' ka' to gala-galas anu u'utu mae opake i Laigan nu Tumpu kiijo' mae i Yerusalem. Balang haha aijo' ingatomo mae i Tomundo Nebukadnezar ka' pino'una'nyomo i laigan nu pilogotnyo, aijo'mo posi pilogotnyo.

EZRA 1:7 ပူးပေါင်းရင်းမြစ်များ

2 TOMU-TOMUNDO' 24:13

Iwi-iwi' na mosoni' anu binau i tomundo' Salomo anu opake i Laigan nu Tumpu ingideanmo i tomundo' Nebukadnezar Lantas iwi-iwi' na pakakas anu ko angga'nyo anu kiijo' i Laigan nu Tumpu ka' anu kiijo' i laigan nu tomundo' binoanyomo i Babel. Iwi-iwi' aijo' jinadimo susumo anu polo'mo pinoto'i nu Tumpu ma'isa pe'e han aijo' jinadi.

2 TAWARIKH 36:10

Tempo'nyo taun bu'ou tinokamo mule' i Tomundo Nebukadnezar nomboamo i Yoyakim namba i Babel salaku mian anu i hakop, ka' to bala-balang anu mahan na olinyo i Laigan nu Tumpu suele binoanyomo. Lapas aijo' i Nebukadnezar nohangkatmo i Zedekia baabo' i Yoyakhin, binaumo tomundo nu Yehuda ka' Yerusalem.

2 TAWARIKH 36:18

To paka-pakakas i Laigan nu Tumpu, ka' to bala-balangnya anu mahan na olinyo, ka' suele balang kakaya'an nu tomundo, ka' anu nu to mia-mian anu ko pangkatnyo mokalaja hi tomundo, iwi-iwi' pinahuhuakonmo i tomundo Babel aijo' lantas binoanyomo i Babel.

2 TAWARIKH 36:7

Sambagian na to bala-balang anu mahan na olinyo i uno nu Laigan nu Tumpu binoamo i Nebukadnezar ka' pino'una'nyomo i laigan nu tomundo kajo-kajojoongannyo kiijo' i Babel.

EZRA 5:14

Ka' mule' pinahasule'akonnyomo na pakakasnyo aijo'mo pakakas mosoni', ka' salaka anu opake i Laigan nu Tumpu ka' anu ingalamo i Nebukadnezar i Yerusalem lantas pino'una'nyomo i laigan nu pilogot kiijo' i Babel. Pakakas haha aijo' binee'mo i Tomundo Kores hi mian sanggonyo i Sesbazar, anu i hangkatnyomo binau gubernur nu Yehuda.

EZRA 6:5

Ka' mule' pakakasnyo mosoni' ka' salaka anu opake i Laigan nu Tumpu anu ingalamo i Tomundo Nebukadnezar kiijo' i Yerusalem ka' binoanyomo i Babel, tionyo ahi' po'ule' osule'akon i tampatnyo momona.”

YEREMIA 51:44

Bel, pilogot nu lipu' Babel Ku hukumo. Ku kakeha'mo na ia da monsule'akon apaa na anu ingagoannyomo. Bansa-bansa madi'mo daagi' monsombah ia. Pagan mesen nu Babel nohobo'mo iwi-iwi'.

DANIEL 1:2

Tumpu nom poloasmo ia nompatundu' i Tomundo Yoyakim ka'nompahuhuakonmo sambahagian na to bala-balang anu mahan na olinyo i Laigan nu Tumpu. To mia-mian anu ihakop binoanyomo i kuil poponsombannyo pilogot i Babel ka' mule' to bala-balang anu mahan na olinyo pipinahuhuakonnyo, pino una'mo i uno nu gudang nu kuil haha aijo'.

DANIEL 5:23

Belento Tuanku takabun hi Tumpu anu kiita' i suluga' ka' baani na mompalentah da oboa oposoop na to mangko-mangko' anu ingagoan i Laigan nu Tumpu. Lantas belento Tuanku tiba anu to tangka-tangkas na pangkatnyo, to bengke-bengkele' nu belento tiba to amba-ambahue' nu belento Tuanku nompuji'mo patong haha aijo' anu mosoni' na binau, salaka, tambaga, besak, kau' ka' batu, ka' mule' to pilo-pilogot anu madi' montoa kabai mohongo kabai mangalati' apa-apaa. Belento Tuanku madi' moholomati Tumpu anu montantukan tumuu' kabai silaka na belento Tuanku ka' anu montantukan jalan nu kantumuu'an nu belento Tuanku.