EFESUS 2:5 - KITAB NU TUMPU ALLA LELE MA'IMAI'

⁵ sahingga tempo'nyo kita daagi' nate na rohaninto kalana kita saja' mombau kasala'an, Ia po'ule'mo nompotumuu' kita hingga-hinggat tiba i Kristus. Jadi, ola kalana ka'ima'an nu kinyonyoa nu Tumpu sahingga komiu pinosalamat-Nyomo.

EFESUS 2:5 ပူးပေါင်းရင်းမြစ်များ

LUKAS 15:24

Kalana anakku aiya i natemo, aiya tinumuu'mo mule'; ia nolapusmo, uuka i humpakkumo mule'.’ Balo aha nombau bau-bauon.

YOHANES 5:21

Tuuma aijo' po'ule' mompotumuu' mian mate, ka' mombee'i aha kantumuu'an anu talakana' ka' toka sidu-sidutu'; sumo aitu mule' Anak mombee'i kantumuu'an sidu-sidutu' hi mian anu nuka'oho' Nubee'i kantumuu'an.

YOHANES 6:63

Anu nompotimbali mian tumuu' aijo'mo Roh nu Tumpu. Kahosonan nu mian madi' ko kaliangannyo. Potatae anu Ku taloakon hi komiu aiya, aijo'mo na potatae nu Roh nu Tumpu ka' potatae anu mombee'i kantumuu'an.

SISIKON NU TO RASUL-RASUL 15:11

Panyo ola ahi' kita palesaya da kita nu posalamat kalana kalibosan nu Tumpu Yesus; sumo aitu mule' na aha.”

ROMA 16:20

Tumpu anu mombee'i ka'ima'an hi mian, malia'mo mompotundu' Ibilis i aluk nu kakuasa'anum, ka' mohopu'imo ia. O amalakon da to Utu-utus saja' Nubalakati Yesus Kristus Tumpunto!

ROMA 3:24

Ola kalana balakat nu Tumpu samata-mata anu i halala'akon, pompahasumbu'an nu Tumpu tiba mian timbali mompo'ule' ma'ima'; baunyo aijo'mo: mian pinobebas i Yesus Kristus.

ROMA 4:16

Jadi janji' nu Tumpu aijo' mimpu'u i palesayanyo nu mian hi Tumpu. Aijo' na timbali sa'angu' bau pintoongan hi iwi-iwi' lee' i Abraham, taalu' janji' aijo' obee' hi aha salaku sa'angu' na taju anu halala' lengkat mae hi Tumpu; misa' ola hi aha anu tulu-tulutan i atulan nu agama Yahudi, panyo suele hi aha anu palesaya hi Tumpu pokakana sumo i Abraham palesaya hi Ia. Kalana i Abraham aijo' tuumanto, kita ingko-ingkot i uno nu kapalesaya'an.

ROMA 5:10

De tempo'nyo kita nompaha idek ka' Tumpu, kita pinodame-Nyomo nu kinasilakaan nu Anak-Nyo, apaa mule' uuka aiya salatan pompahasumbu'anto ka' Tumpu po'ule'mo na'ima', matantumo kita oposalamat mule' i uno nu kantumuu'an i Kristus.

ROMA 5:6

Tempo'nyo kita i uno nu madi'mo moko ala, i Kristus sinilakamo pontokong kita i tempo' anu tinantukanmo nu Tumpu; padahan kita to mia-mian anu najo'onmo hi Tumpu.

ROMA 5:8

Panyo Tumpu mompotoa liibos-Nyo hi kita tempo'nyo i Kristus sinilaka pontokong kita tempo'nyo kita daagi' baladosa'.

ROMA 8:2

Kalana atulan nu Roh nu Tumpu na mombau kita tumuu' mosa'angu' tiba i Kristus Yesus nompobebasmo aku lengkat i atulan anu monsaduakon dosa' ka' kapatean.

EFESUS 2:1

Naipuan mae rohani miu i natemo kalana komiu binala dosa'mo ka' nolanggaimo to pale-palentah nu Tumpu.

EFESUS 2:8

Tumpu mongkalibosi komiu, aijo' na sababnyo Ia momposalamat komiu kalana komiu pinalesayamo hi Yesus. Kasalamatan miu atina' misa' posi hasin nu usaha miu. Aijo' te balakat nu Tumpu. Jadi, madi' ko samian pe'e na anu timbali mongkabubuulakon posi butongnyo mongkona han aijo'.

EFESUS 5:14

Kalana iwi-iwi' anu manasamo na otoa, aijo' majingka. Mokonyo aijo' tinaloakonmo, “Hee pobulamo na beleyum anu hoyot, ka' anu sinilakamo, po'ule'mo tumuu'! I Kristus monjingkaimo beleyum.”

KOLOSE 2:13

Naipuan mae komiu natemo na kapalesaya'an kalana komiu binala dosa'mo, ka' kalana komiu madi' sinunat nu adat nu dunia. Panyo uuka aiya Tumpu nompotumuu'mo komiu hingga-hinggat tiba i Kristus. Tumpu nongampunimo iwi-iwi' na dosa'to,

TITUS 2:11

Kalana Tumpu nompotoamo balakat-Nyo kalana kahanda' momposalamat iwi-iwi' mian.

TITUS 3:5

Ia momposalamat kita, misa' kalana kita nombaumo anu ma'ima', panyo kalana Ia ahi' na nongkalibosimo kita. Ia momposalamat kita kalana pakalaja'an nu Roh nu Tumpu, anu nombee'imo kita kantumuu'an bu'ou susumo anu po'ule'mo i hampeakon, ka' kantumuu'an anu bu'ou, aijo'mo kita pinobelesimo.

ANU PINOTO'I HI YOHANES 22:21

O'amalakon da i Tumpu Yesus mombalakati iwi-iwi' mian anu pinalesayamo hi Tumpu! 53