EFESUS 2:16 - KITAB NU TUMPU ALLA LELE MA'IMAI'

¹⁶ Kalana Ia sinilakamo pinosalib, i Kristus nomposa'angu'mo ohua' na bansa aijo', ka' nompodamemo aha tiba Tumpu, sahingga madi'mo ko po'uwalian aijo'.

EFESUS 2:16 ပူးပေါင်းရင်းမြစ်များ

ROMA 5:10

De tempo'nyo kita nompaha idek ka' Tumpu, kita pinodame-Nyomo nu kinasilakaan nu Anak-Nyo, apaa mule' uuka aiya salatan pompahasumbu'anto ka' Tumpu po'ule'mo na'ima', matantumo kita oposalamat mule' i uno nu kantumuu'an i Kristus.

KOLOSE 2:14

ka' nohapusmo sulat nu samaya' hi kita, anu nompopobuhukmo kita nu atu-atulan anu maboat. Tiba jalan nomposalibmo sulat aijo' i kau' salib, Tumpu nohapusmo iwi-iwi' na kasala'an anu pinokonamo hi kita.

EFESUS 2:15

Atulan nu agama Yahudi tiba to pale-palentah, ka' anu nu atun nu atulan i hapusmo i Kristus da ohua' na bansa aijo' timbalimo sa'angu' na bansa mian bu'ou, anu nosa'angu'mo tiba Ia. Jalan aijo' na binau i Kristus bau pompodame.

GALATIA 2:20

Uuka misa'mo aku na anu tinumuu', panyo i Kristusmo na tinumuu' i uno nu butongku. Kantumuu'an aiya anu ku oa'i uuka aiya aitumo tumuu' palesaya hi Anak nu Tumpu anu mongkalibosi aku ka' anu nongkulubanakonmo butong-Nyo kalana aku.

ROMA 8:3

Apaa na anu madi' opoko bau nu atulan nu agama, kalana kita mian madi' moko ala mombau, aijo' binaumo nu Tumpu. Tumpu nohungku'imo kuasa nu dosa' anu i uno nu sipat nu mian, aijo'mo nonsai posi Anak-Nyo na tinoka nimbalu-balu sumo mian anu baladosa' da mongalini dosa'.

ROMA 8:7

Mian anu pikilannyo kinuasanmo nu sipat nu mian, mian aijo' mompaha bali'mo tiba Tumpu; kalana mian aijo' madi' mohongo-hongo atulan nu Tumpu; ka' memang ia madi' moko ala mohongo-hongo atulan nu Tumpu.

ROMA 6:6

Osumbu'to na kalakuanto anu piniinmo salaku mian sinilakanmo hingga-hinggat tiba i Kristus i kau' salib da kuasa nu kalakuanto anu baladosa' aijo' madi'mo ko kaliangan-Nyo; tiba jalan aijo' kita madi'mo daagi' nubotuani nu dosa'.

1 KORINTUS 10:17

Kalana ola sa'angu' na roti ka' kita iwi-iwi' mongkaanmo te roti anu sa'a-sa'angu'nyomo aijo' suele, sahingga kita anu manjoo' aiya sumo-sumomo sa'a-sa'angu' na butong.

EFESUS 3:6

Lahasia aijo', atina'mo: Montului Lele Ma'ima' aijo', mian anu misa' Yahudi suele mongoa'i to bala-balakat nu Tumpu anu naipuan mae pinotouka ola bau kapentingan nu mian Yahudi. To mia-mian anu misa' Yahudi pinotimbalimo ka' pinosoopmo sambu-sambutong, ka' suele mohumpakmo apaa na anu jinanji'mo nu Tumpu hi Kristus Yesus.

EFESUS 4:4

Ola sa'angu' na butong ka' sa'angu' na Roh. Sumo aitumo mule' na komiu i laga da ola sa'angu' na anu otaha'imani ka' mule' pokakana.

KOLOSE 3:15

Anu oputusi miu, tionyo ahi' anu otantukan nu dame anu binee'mo i Kristus i uno nu kinyonyoa miu. Kalana Tumpu nolagamo komiu da timbali sa'angu' na butong, da komiu tumuu' i uno nu kadamean lengkat mae hi Kristus aijo'. Komiu tionyo ahi' montalima kase.