EFESUS 1:7 - KITAB NU TUMPU ALLA LELE MA'IMAI'

⁷ Kalana i Kristus sinilakamo, kita pinobebasmo nu Tumpu Allah, alati'nyo Ia nongampunimo kita i to dosa-dosa'to.

EFESUS 1:7 ပူးပေါင်းရင်းမြစ်များ

AYUB 33:24

Molibos hondo na malaikat aijo' kalana aitu ia notatae, ‘Polapasakonmo na ia, madi' timbali ia mintatau' i dunia nu mian anu silakamo. Aiya na doi bau pontokong, da ia po'ule' pe'e bebas.’

MAZMUR 130:4

Panyo Belento mongampunimo ahi', da mian montulutimo ahi Belento.

MAZMUR 130:7

Tumpumo ahi' na otaha'imani o mian anu pinalesayamo hi Ia, kalana Ia sabole-boleh mongkalibosi, ka' saja' sadia momposalamat.

MAZMUR 86:5

Belento manonong, o, Tumpu, ka' kahanda' mongampuni, mian anu balado'a hi Belento, saja' nukalibosi nu Belento, nukalibosan anu madi' ko kamingkotannyo.

NOSABATMO 34:7

Aku saja' mongkalibosi momada-madala na lee' ka' mongampuni kasala'an tiba dosa'; panyo mian anu ko sala'nyo madi' ko madi'nyo sabole-bole Ku hukum, ka' Ku hukum mule' na to ana-anaknyo ka' to maku-makumpunyo toka-toka i lee' ko totolu'nyo ka' ko opatnyo kalana dosa' nu tu'anyo nu aha.”

YESAYA 43:25

Panyo Aku ahi' Tumpu na nohapusmo dosa' nu beleyum, Aku mongampunimo beleyum kalana sumo aijo'mo nakinyonyoang-Ku; Aku madi'mo daagi' sola' monginau dosa' nu beleyum.

YEREMIA 31:34

Madi'mo daagi' palalu maunyomo ola samian na bubu' aha mongajan sangalunyo da monsumbu' Tumpu. Kalana aha iwi-iwi' anu tu'amo kabai anu daagi' anak saidi' mae monsumbu'mo Aku. Kasala'an-kasala'an nu aha madi'mo lewa' Ku inau', to dosa-dosa' nu aha Ku ampunimo. Aku, Tumpu notataemo.”

DANIEL 9:19

O, Tumpu potombihingakon mae na kami ampuniakon mae na kami ka' palahatikan mae na kami, ka' palia-lia'mo na mombau kaputusan! Bolimo otanda'i pipin da iwi-iwi' na mian monsumbu' talu' Belento ahi' na Tumpu. Kalana Yerusalem tiba mian anu palesayamo hi Belento memang ahi' madi'mo sala', Belentomo na Tumpu-Nyo'.”

DANIEL 9:9

Belento saja' nongampuni ka' mule' nongkalibosi mae, maumo kami saja' panggaga hi belento.

YUNUS 4:2

Lantas ia binalado'amo, “O Tumpu temisa tinaloakonkumo ahi' ma'isa pe'e aku namba lengkat mae ilaiganku u'utu mae, tukoongku Belento tantu mombaumo sumo aiya? Mokonyo aijo' aku nopalaimo namba i Spanyol! Kusumbu' saba' Belentomo na Tumpu anu mongkalibosi ka' manonong ka' talalo sabaan ka' motatae ma'ima' ka'saja' ko tanga'an madi' mohukum.

MIKHA 7:18

Madi' ko Tumpu anu sumo Belento, o, Tumpu anu mongampuni dosa' nu mian anu pinile'anmo nu Belento aijo'mo mian anu daagi' tinontuha'. Madi' sampemo sidu-sidutu' na Belento motambuha'; panyo ola ahi' belento sanang na mompotoa kanonongan nu Belento anu madi' ko batasnyo aijo'.

ZAKHARIA 13:1

Tumpu Anu Daka' na Kuasanyo notatae, “I sinaa aijo' mimpusesemo mae sa'angu' na mata nu uee da momposusi' lee' mae i Daud tiba mian anu jojoong i Yerusalem da madi'mo baladosa' ka' mule' palasombahan hi pilogot anu lewa-lewa'mo binau nu aha.

ZAKHARIA 13:7

Tumpu Anu Daka' na kuasanyo notatae, “Tinjomo mae o, bajak ka' tumbuhimo na polaya' potuu'on anu mokalaja hi beleng-Ku! Pateimo na Ia sahingga to domba-domba mosungke-sungkehetmo. Kutumbuhimo na mian anu palesayamo hi beleng-Ku,

ZAKHARIA 9:11

Tumpu notatae hi mian anu palesayamo hi Ia, “Tiba palajanjian anu binaung-Kumo hi belemiu, palajanjian anu sinela'mo nu baso' nu koloban palasombahan, Ku pobebasmo na aha mian da'isan nu belemiu, anu sinansalamo kiijo' i tampat pinomboan aha susumo mian anu kinulungmo i uno nu bubung anu no'otimo.

MATIUS 20:28

Pokakana sumo Anak nu Mian aijo' suele Ia toka misa' da okalibosi, panyo da mongkalibosi, ka' mombee' nyawa-Nyo bau pompobebas mian da'isan.”

MATIUS 26:28

Kalana aiyamo na baso'-Ku anu mompokododo apaa na anu jinanji'mo nu Tumpu – baso' anu binubusakon bau kapentingan nu mian da'isan da bau pongampuni dosa' nu aha.

MATIUS 6:12

Ampuniakon na kasala'an mami, sumo kami mongampuni mian anu mombau sala' hi kami.

MARKUS 14:24

Lapas aijo' i Yesus notatae, “Aiyamo na baso'-Ku anu mompohoson palajanjian nu Tumpu, baso' anu binubusakon bau kapentingan nu mian da'isan.

LUKAS 1:77

da mompoto'i hi mian anu palesayamo hi Ia tukoonyo aha oposalamatmo, de Tumpu mongampunimo iwi-iwi' na dosa' nu aha.

LUKAS 24:47

Sumo aitu mule' i uno nu sanggo nu Tomundo anu Momposalamat aijo' tionyo ahi' pagala opoto'i hi iwi-iwi' bansa, saba' mian tionyo ahi' balatobat, ka' saba' Tumpu mongampunimo dosa'. Ka' lele aijo' tionyo ahi' pagala opoto'i, otampu'uni lengkat mae i Yerusalem.

YOHANES 20:23

De komiu mongampuni dosa' nu toto samian, Tumpu suele mongampuni ia. De komiu madi' mongampuni dosa' nu toto samian, Tumpu suele madi' mongampuni ia.”

SISIKON NU TO RASUL-RASUL 10:43

Iwi-iwi' to nabi-nabi motatae mongkona Ia. Aha notatae tukoonyo iwi-iwi' mian anu palesaya hi Yesus, o ampunije na dosa'nyo nu kakuasa'an lengkat hi Yesus.”

SISIKON NU TO RASUL-RASUL 2:38

Tinaaman i Petrus, “Balatobatmo, bolimo mombau dosa-dosa' miu. Ka' tionyo komiu toto samian opalamandikan nu sanggo i Yesus Kristus, da dosa-dosa'um o ampuni. Sahingga to Utu-utus montalimaje tambo nu Roh nu Tumpu lengkat hi Tumpu.

SISIKON NU TO RASUL-RASUL 20:28

Tionyo obala ingati na butong miu ka' otoa suele na jama'at iwi-iwi' anu binee'mo nu Roh nu Tumpu hi komiu da otoa; kalana komiu ingangkatmo da montoa jama'at aijo'. Tionyo komiu montoa jama'at nu Tumpu aijo' sumo polaya' montoa dombanyo, kalana Tumpu nompotimbalimo jama'at-Nyo, aijo'mo na sababnyo sahingga i Yesus Anaknyo sinilakamo.

SISIKON NU TO RASUL-RASUL 3:19

Mokonyo aijo' to Utu-utus, balatobatmo i dosa-dosa' miu ka' pinsusule'mo mae hi Tumpu, da Ia mongalinakon dosa-dosa' miu.

ROMA 2:4

Kabai o oa'i miu dengke na kanonongan nu Tumpu tiba ka'ima'an nu kinyonyoa ka' kasabalan-Nyo anu daka' hondo sumo aijo'? Tantu osumbu' miu te Tumpu mompotoa ka'ima'an nu kinyonyoa-Nyo kalana Ia mongkahanda'i da komiu bolimo daagi' mombau to dosa-dosa' miu.

ROMA 3:24

Ola kalana balakat nu Tumpu samata-mata anu i halala'akon, pompahasumbu'an nu Tumpu tiba mian timbali mompo'ule' ma'ima'; baunyo aijo'mo: mian pinobebas i Yesus Kristus.

ROMA 3:25

Tumpu nongkolobanakonmo i Yesus Kristus, da kalana Ia sinilaka aijo' mian natantumo pinobebasmo i kasala'an de aha palesaya hi Ia. Tumpu nombau sumo aijo' da mompotoa ka'adinan-Nyo. Kalana tempo' anu i hikuhakonmo Tumpu nonsabalakonmo dosa-dosa' nu mian, sahingga Ia madi' nohukum aha.

ROMA 9:23

Tumpu mule' ko kahanda' mompotoa hi kita kabilahian anu molabi-labih binee'-Nyo hi kita anu nu Nu kalibosi. Kita tinoukaan-Nyomo mohumpak kabilahian aijo'.

1 KORINTUS 1:30

Posi Tumpu na nompotimbali sahingga kita Utus nosa'angu' tiba i Kristus Yesus. Ola kalana i Kristus, sahingga kita pinotimbali pande. Ka' mule' ola kalana Ia, Tumpu nompotimbalimo kita po'ule' nompaha ima' tiba butong-Nyo, nompotimbali kita samata-mata mian-Nyo anu palesayamo, ka' nompobebas kita.

2 KORINTUS 8:9

Kalana osumbu' miu hondo kita talalo nukalibosi i Yesus Kristus Tumpunto. Ia kaya, panyo Ia nompotimbalimo butong-Nyo kasiasi kalana kapentingan miu da kalana Ia kinasiasimo aijo', komiu timbalimo kaya.

EFESUS 1:14

Roh aijo'na mompohoson saba' kita manau' mae montalimamo apaa na anu jinanji'-Nyomo nu Tumpu hi mian palesayamo hi Ia. Aiya mompokododo kapalesaya'anto kalana Tumpu mompobebasmo mian anu palesayamo hi Ia. O puji' na Tumpu kalana Ia talasanggo.

EFESUS 1:18

Aku nongkakasemo da Tumpu mombuka' pikilan miu, sahingga timbali majingka; da belemiu monsumbu' apaa na anu timbali otaha'imani nu belemiu hi Tumpu anu nolagamo belemiu. Ka' suele da osumbu' miu mosia na balakat anu toto ima-ima' molabi-labi, anu nupotouka nu Tumpu bau bagi nu mian anu palesayamo hi Ia;

EFESUS 1:6

Puji' na Tumpu anu talalo talasanggo kalana palesaya hi Anak-Nyo anu nu nukanonongi hondo, Ia suele nongkalibosimo hondo kita.

EFESUS 1:8

Binau-Nyo na aijo' kalana Ia talalo hondo mongkalibosi kita, ka' pongkalibosi-Nyo aijo' binee'-Nyo hi kita mola-molabi montului jalan anu ko angga'-Nyo, ka' anu minsoop i akan.

EFESUS 2:4

Panyo palias na kodaka'nyo na kanonongan nu kinyonyoa nu Tumpu! Ia nongkalibosimo kita sumo aijo',

EFESUS 2:7

Tumpu nombau sumo aijo' da tempo' anu tokaje aiya mae i ahop, mian montoamo mosia na kodaka'nyo na kalibosan nu Tumpu. Kalibosan aijo' pinonyata'mo nu Tumpu kalana ka'ima'an nu kinyonyoa-Nyo hi kita nontului jalan hi Kristus Yesus.

EFESUS 3:16

Aku balado'a bisa-bisa' Tumpu anu opopodaka' sanang na mompohoson kinyonyoa miu nu Roh-Nyo.

EFESUS 3:8

Iwi-iwi' na mian anu palesayamo hi Tumpu, akumo na anu talalo madi' ko angga'nyo. Panyo Tumpu nombee'imo aku balakat aiya: kalaja da mompolele hi to mia-mian anu misa' Yahudi Lele Ma'ima' mongkona kakaya'an i Kristus anu madi' ko kamingkotannyo;

FILIPI 4:19

Tumpu anu kusombah, anu manjo-manjoo' na kakaya'an hi Kristus Yesus, momposukupakonje kapalaluan miu.

KOLOSE 1:14

Kalana Anak-Nyo aijo', sahingga kita pinobebasmo; alati'nyo dosa'to iwi-iwi' ingampunanmo.

KOLOSE 1:27

Hi mian-Nyo anu palesayamo aijo', Tumpu momponyata'mo palias na ko'ima'nyo ka' na katalasanggoan na lahasia-Nyo aijo' hi mian iwi-iwi'. Lahasia-Nyo aijo' atina'mo: I Kristus i unomo nu butong miu, alati'nyo komiu suele mongoa'imo katalasanggoan nu Tumpu Allah.

KOLOSE 2:13

Naipuan mae komiu natemo na kapalesaya'an kalana komiu binala dosa'mo, ka' kalana komiu madi' sinunat nu adat nu dunia. Panyo uuka aiya Tumpu nompotumuu'mo komiu hingga-hinggat tiba i Kristus. Tumpu nongampunimo iwi-iwi' na dosa'to,

KOLOSE 2:2

Iwi-iwi' aijo' ku bau da kinyonyoa nu aha timbali mahoson ka' aha mompaha kali-kalibosi, sahingga aha mahoson na mosa'angu'. Tiba jalan anu sumo aijo' aha totu-totu'u mangalati'mo ka' palesayamo hondo-hondo ka' monsumbu'mo lahasia nu Tumpu, aijo'mo i Kristus.

1 TIMOTIUS 2:6

Ia samian na manusia anu nombee'mo butong-Nyo da mompobebas iwi-iwi' na mian i to dosa-dosa' nu aha. Tiba jalan aijo' Tumpu Allah nompoto'imo tempo'nyo anu tinantukanmo, kalana Ia mongkahanda'i da iwi-iwi' na mian oposalamat.

TITUS 2:14

Ia nongkulubanakonmo butong-Nyo kalana kahanda' mompobebas kita da iwi-iwi' na anu ma'idek bolimo obaunto, ka' mompotimbalimo kita mian anu binebasmo madi'mo ko dosa'nyo ka' samata-mata iamo na tumpu-Nyo, ka' makekemo na mombau anu ma'ima'.

TITUS 3:6

Tumpu nombee'imo mae Roh-Nyo hi kita kalana pakalaja'an i Yesus Kristus, Tomundo anu Momposalamat kita,

IBRANI 9:22

Memang atulan nu agama Yahudi, gagalan iwi-iwi na apaa oposusi' nu baso': ka' dosa' ola timbali o ampuni de daagi' ko baso' ojujuhakon.

1 PETRUS 2:24

Posi i Kristus na nonsimbu to dosa-dosa'to i butong-Nyo aita' i kau' salib da kita opobebas i kuasa nu dosa', ka' tumuu' mombatuki pongka'oho' nu Tumpu. Iwi-iwi' bela i Kristus na anu mompa'alin belemiu.

1 PETRUS 3:18

Kalana i Kristus sinilaka ola minsan sampe toka sidu-sidutu' kalana dosa' nu manusia – samian anu madi' ko sala'nyo sinilaka kalana monsawani mian anu ko sala'nyo. I Kristus nombau sumo aijo' da Ia timbali molaya' belemiu toka hi Tumpu. Ia sinilakan ola butongnyo biasa, panyo po'ule' pinotumuu' nimbutongmo nu rohani.

1 YOHANES 2:12

Aku nontulismo toka hi belemiu, to Ana-anak, kalana dosa' miu ingampunanmo, aijo' ola kalana i Kristus.

1 YOHANES 2:2

I Yesus Kristus na mombolosakon da iwi-iwi' na dosa'to o ampuni. Ka' misa' ola dosa'to panyo suele tiba dosa' nu iwi-iwi' mian.

1 YOHANES 4:10

Aiyamo na kalibosan: Misa' kita na anu nongkalibosimo Tumpu Allah, panyo Tumpu na anu nongkalibosimo kita, ka' anu nonsaimo mae Anak-Nyo da kalana Ia, dosa'to iwi-iwi' nohumpakmo ka'ampunan.

ANU PINOTO'I HI YOHANES 14:4

Aha aijo' to mia-mian anu saja' belesi' sumo langkoyang anu tumimpasje, kalana ma'isa toho' noduhus tiba boune. Aha mombatuki Anak nu Domba mau mule' pa' moya na Ia mamba. Iwi-iwi' na mian, olamo aha na anu pinobebas salaku anu sinombahkonmo momonanyo hi Tumpu ka' hi Anak nu Domba.

ANU PINOTO'I HI YOHANES 5:9

Aha nonyanyiakonmo sa'angu' na nyanyian anu sala'je aitu na i nyanyi: “Belento pantas mongala kitab aijo' ka' mombeak segen haha aijo'. Kalana Belento pinateanmo, ka' kalana Beleyum sinilakamo, mian i iwi-iwi' na tulunan, sisik, negara, ka' bansa ingolimo nu Belento da timbalimo anu nu Tumpu.