DANIEL 9:13 - KITAB NU TUMPU ALLA LELE MA'IMAI'

¹³ Iwi-iwi' na balaa' anu tinulismo i uno nu atulan i Musa binee'mo mae nu belento hi kami. Panyo maumo ahi' sumo aijo' o, Tumpu mami daagi' ahi' saja' kami madi' mombau anu momposanang kinyonyoa nu Belento. Kami daagi' sabole-bole madi' mongka'oho' mompala'i iwi-iwi na dosa' mami ka' madi mule' mongka'oho' mompalahatikan to panga-pangajalan nu Belento.

DANIEL 9:13 ပူးပေါင်းရင်းမြစ်များ

2 TOMU-TOMUNDO' 22:16

potatae nu Tumpu sumo uuka: “Ku hukummo na Yerusalem ka' iwi-iwi' na mian anu i kiijo' susumo anu tinulismo i kitab anu sala-sala'je binasa' i tomundo'.

AYUB 36:13

Mian anu madi' palesaya Tumpu saja' motambuha' i uno nu kinyonyoanyo; mau nuhukumo nu Tumpu, madi' mongka'oho' na aha momoita tulung.

MAZMUR 119:18

Buka'akon mae na matangku da aku montoa pangajalan anu okabangangi hi atulan nu Belento.

MAZMUR 119:27

Tulungiakon mae na aku da monsumbu' atulan nu Belento iwi-iwi', pangajalan nu Belento anu mompobangang hondo ku potutugakonmo.

MAZMUR 119:73

Belentomo na nompotimbali ka' nontali' aku, popangalati' mae na aku monggului' iwi-iwi' na palentah nu Belento.

MAZMUR 85:4

Aha madi'mo tinambuha'an nu Belento; tambuha' nu Belento anu taha-tahahumo po'ule'mo ingampunan nu Belento.

YESAYA 31:1

Silakamo na aha mian anu nambamo i Mesir nomoita da nu bantui mae nu aha! Aha montakabunakonmo kahosonan nu suludadu nu aha Mesir tiba gombuan nu suludadu nu aha anu monsake'i ajahan ka' mule' kuda nu aha anu toto hoso-hoson ka' mule' kareta nu aha manjo-manjoo' aijo'. Panyo aha madi' palesaya hi Tumpu, Tumpu nu Israel anu susi' ka' madi' aha nomoita da nu bantui.

YESAYA 42:9

Uuka aiya anu lewa' kinila-kilang-Ku memang jinadimo; Aku kahanda'mo mompoto'i hahan anu ma'isa toho' jinadi; ma'isa pe'e han aijo' jadi polo'mo Ku poto'i hi beleyum.”

YESAYA 43:22

Tumpu notatae, “Panyo beleyum Israel madi'mo nonsombah Aku, ka' madi'mo tulu-tulutan hi beleng-Ku.

YESAYA 64:6

Kami iwi-iwi' mian anu nahenyumo, ka' mule' palabuatan mami anu ma'ima' na'idekmo ka' kinotonmo. Kami mingkotmo kalana palabuatan mami anu na'idekmo susumo hon anu nagayoumo nu lahabakonmo nu mombun.

YESAYA 64:7

Madi'mo ko anu balado'a hi Belento, kabai mongkakase da otulungi nu Belento kalana pinosulukmo nu Belento na ohup nu Belento da madi' otoa mami, ka' mule' nompojohokmo kami da osilakaimo nu dosa' mami.

YESAYA 9:13

Kalana aijo' i uno nu sansinaa Tumpu nohukumo to pola-polaya' nu aha Israel tiba aha mian da'isan. Kinolong-Nyomo ka' ingalin-Nyomo na ubaknyo tiba ikunyo.

YEREMIA 2:30

Ola palasuma' na belemiu Ku hukum, kalana belemiu madi' mongka'oho' montalima pokinde'. Pokakana susumo singa anu nangamu'mo, sumo aijo'mo na belemiu nompateimo to nabi-nabi nu belemiu.

YEREMIA 30:14

Iwi-iwi' na anu mongka'ima'i beleyum nongkolilimimo beleyum; aha madi'mo daagi' mompotutugakon beleyum. Susumo sampobali' tinumbuhan-Kumo ka' nohukumo belemiu pinosansala hondo. Kalana nanjoo'mo na dosa' nu belemiu ka' dinakamo hondo na kasala'an nu belemiu.

YEREMIA 31:18

Ihongong-Kumo na mian nu Israel notatae kahomo i uno nu kasusa'an na kinyonyoa, ‘O Tumpu, kami sumomo ahi' binatang anu ma'isa pininyaman panyo ingajan mo nu Belento na kami da tulu-tulutan, ka' uuka aiya kami kahanda'mo minsusule' mae hi Belento. Jadi, boamo mae na kami da minsusule'mo o Tumpu, Tumpu Allah mami.

YEREMIA 44:27

Aku bala usahamo da belemiu silakamo ka' madi'mo mohumpak ka'ima'an i uno nu kantumuu'an, sampe belemiu silakamo iwi-iwi' mau pa' kalana pahampatean kabai kalana panyakit anu molele.

YEREMIA 5:3

Anu sahondo-hondonyo ahi' nu tuntut nu Tumpu aijo'mo tulu-tulutan. Tumpu nondokemo belemiu panyo madi' ahi' opajuli nu belemiu. Ia nohansunimo belemiu panyo belemiu madi' mongka'oho' opokinde'i. Belemiu panggaga hondo ka' madi' mongka'oho' balatobat mompala'i dosa-dosa' nu belemiu.

MOHAANGI 5:21

O Tumpu, boa na kami po'ule' minsusule' hi Belento; kami po'ule'mo minsusule' hi Belento! Po'ule'akonmo mae na ka'ada'an mami susumo naipuan mae.

YEHEZKIEL 16:43

Aku mohukumo beleyum kalana beleyum madi'mo daagi' nonginau'mae mosia na Aku nompalakaimo beleyum tempo'nyo nai puan mae daagi' ise'. Palabuatan nu beleyum ma'i-ma'idek atina' na nonsabapi Aku nontambuha'i beleyum. Kadaka' palabuatan nu beleyum anu oka-okahegati atina' iwi-iwi' daagi' mule' nu paka tuangi nu palabuatan masala'? Aku Tumpu Anu Matangkas na Kuasanyo notataemo.”

DANIEL 9:11

Songko-songko na Israel nolanggaimo iwi-iwi' na atulan nu Belento ka' madi' mongka'oho' mompotombihing potatae nu Belento. Kami binaladosa'mo hi Belento kalana aijo' binee'anmo mae nu belento kutuk na kami susumo anu tinulismo i Kitab i Musa posaihon nu Belento.

HOSEA 7:10

Katabuulan nu aha mian Israel nanasamo hondo na otoa ka' tinimbalimo bukuti' nu kasala'an nu aha. Maumo iwi-iwi' aijo' jinadimo panyo aha madi' ahi' molio Aku kabai minsusule' mae hi beleng-Ku Tumpu Allah nu aha.

HOSEA 7:14

Aha madi totu tou na balado'a hi edeng-Ku. Kalu aha balado'a aha matimaleo, i tampat kahoyotan, ka tumando susumo anu binau nu mian anu madi palesaya hi beleng-Ku. Kalu aha balado'a mompoita gandum, ka anggur, aha momboyo boyoto butong susumo anu lewa nu bau nu mian anu lewa monsombah pilogot. Aha memang ahi totu touu molawan Aku!

HOSEA 7:7

I uno nu napisu nu pusa nu aha, aha nompateimo to pola-polaya' nu aha. Iwi-iwi' na tomundo' nu aha pinateanmo toto samian. Panyo maumo sumo aijo' na ka ada'an nu aha madi'mo tinalakana' madi' ahi' ko samian pe'e na balado'a mae hi beleng-Ku momoita tulung.”

LUKAS 24:45

Lapas aijo' i Yesus nombukamo pikilan nu aha da monsumbu' apaa na koonyo nu Kitab nu Tumpu.

YOHANES 10:35

Osumbu'to apaa na anu tinulis i uno nu Kitab nu Tumpu opake sidu-sidutu'. Jadi de Tumpu monsanggohi ‘tumpu’ hi to mia-mian anu montalima potatae-Nyo,

YOHANES 6:45

I Uno nu Kitab nu to Nabi-nabi tinulis sumo uuka, ‘Iwi-iwi' na mian nu pogulu' nu Tumpu.’ Jadi iwi-iwi' na mian anu mohongo Tuuma ka' balagulu' hi Ia, toka mae hi beleng-Ku.

YOHANES 8:32

Sahingga komiu monsumbu' Tumpu anu totu'u, ka' kalana aijo' komiu o pobebasje.”

EFESUS 4:21

Komiu nohongomo mongkona Ia! Ka' salaku anu saja' mombatuki Ia, komiu pinogulu'mo singkona mongkona sipat-sipat nu Tumpu anu daagi' hi Ia!

PO'ULE' INGULIT 29:4

Panyo sampe sinaa aiya Ia ma'isa nompobee' belemiu da monsumbu' iwi-iwi' apaa na anu ingoa'anmo miu aijo'.

YAKOBUS 1:5

De daagi' ko samian itina' hi komiu anu madi' talalo pande, tionyo ahi' ia mongkakase hi Tumpu, sahingga Tumpu mombee'i kapandean hi ia; kalana toto samian sanang na Tumpu Allah mombee'i kalana kanonongannyo ka' kalana kalibosannyo.