DANIEL 2:5 - KITAB NU TUMPU ALLA LELE MA'IMAI'

⁵ Tinaaman i tomundo', “Aku nombaumo katanduan sumo uuka; Belemiu tionyo ahi' mompoto'i mae ipion aijo' hi belengku, sumo aitu mule' alati'nyo. De belemiu madi' moko ala, belemiu opado-padotmo ka' mule' laigan nu belemiu ohobo'akonmo.

DANIEL 2:5 ပူးပေါင်းရင်းမြစ်များ

2 TOMU-TOMUNDO' 10:27

Patong aijo' i hansunan nu aha tiba laigannyo, lantas tampat aijo' binaumo nu aha pibodo'an nu aha sampe sinaa aiya.

EZRA 6:11

Ku palentah sumo aiya da ihe na madi' mohongo-hongo palentah aiya, saba' obubut na ohi' nu laigannyo sangkau, otajomi na puusnyo lantas osusukakonmo i butongnyo nu mian aijo' sampe lampasan. Laigannyo tionyo ahi' otataki ka' ohunyo baumo pongalinan duhehe.

MAZMUR 50:22

Soba palahatikan, belemiu anu mongkolilimi Tumpu; bala ingati mae dumo belemiu Ku silakai, ka' madi' ko anu momposalamat.

MAZMUR 58:7

O, Tumpu, pato'i iwi-iwi' na bese' nu aha, gautakon na sae nu singa haha aijo' anu daagi' bata'nyo, o, Tumpu.

DANIEL 2:12

Nohongo aijo' i tomundo' notambuha'mo hondo sahingga pinalentahnyomo da opateimo iwi-iwi' na anu toto pande-pande kiijo' mae i Babel.

DANIEL 3:29

Kalana aijo' ku palentah da batu-batu mian i sa'angu' na bansa, tulunan nu bansa kabai basa' iyayamae anu mongalu Tumpu anu nu sombah i Sadrakh, i Mesakh, tiba i Abednego, opado-padot ka' mule' laigannyo ohobo'akon ka' opojadimo tambulan nu anu nopapumo na laigannyo aijo'. Kalana madi' ko pilogot anu moko ala mombau apaa na anu binaumo nu Tumpu aijo'.”

DANIEL 4:9

“O Beltsazar, polaya' nu to mia-mian anu ko ilimu' ku sumbu' na beleyum kinuasanmo nu roh nu to pilo-pilogot anu susi, sahingga madi' ko lahasia anu opohowini hi beleyum. Potombihing mae na ipionku uuka ka' talangkan mae na alati'nyo.

PO'ULE' INGULIT 13:16

Iwi-iwi' na halata' nu anu jojoong i kota aijo' tionyo ahi' otoluki ka' opotambun i tanalapang, lantas iwi-iwi' na halata'nyo tionyo ahi' opapui salaku koloban anu osombahkon hi Tumpu Allah nu belemiu. Lapas aijo' opala'imo nu belemiu da timbalimo tampat salaku bau tanda pinompapuan ka' madi'mo timbali daagi' po'ule' opotinjo.

YOSUA 6:26

Tempo'nyo aijo' i Yosua nompoto'imo palentah madi' mompobee' sumo uuka, “Maumo pa' ihe na ko kahanda' po'ule' mombau kota aiya, mohumpak kutuk nu Tumpu. Ihe na mombau mesennyo bau pompotinjoan kota aiya anaknyo tumpe sila kamo; ka' ihe na mombau sabatannyo anu to daka-daka', anaknyo tampalui' silakamo.”

1 SAMUEL 15:33

Lantas i Samuel notataemo, “Susumo bajak nu beleyum nombaumo manjoo' na tina nu anak amdi'mo ko anaknyo, sumo aitumo na beleyum saidi' mae madi'mo ko anaknyo.” Lantas pinahantabasakonmo i Samuel na i Agag i ahop nu mezbah ikiijo' i Gilgal.