DANIEL 2:11 - KITAB NU TUMPU ALLA LELE MA'IMAI'

¹¹ Belento Tuanku talalo ahi' mongkahanda'i anu talalo susa'. Madi' ko samian pe'e na anu moko ala, beilako' ahi' to pilo-pilogot, panyo aha na madi' ahi' jojoong aiya hi kita mian.”

DANIEL 2:11 ပူးပေါင်းရင်းမြစ်များ

KAJADIAN 41:39

Sahingga i tomundo notataemo hi Yusuf, “Tumpu Allah nompoto'imo iwi-iwi' aiya hi beleyum, jadi nanasamo beleyum lebe pande ka' monsumbu' mongatun molingkudui mau mule' pa' ihe.

KAJADIAN 41:8

Subu-subu mae i tomundo madi'mo sinanang na kinyonyoa, kalana aijo' pinalentahnyomo da olaga mae iwi-iwi' na anu pande montili'i ipion ka' mian anu ko ilimu'nyo i Mesir. Lantas sinisiknyomo na ipionnyo hi aha, panyo madi' ko samian pe'e na noko ala nontalangkan poso'nyo.

1 TOMU-TOMUNDO' 8:27

Panyo' O Tumpu Allah, pa' totu-totu'u ahi sanang na Belento jojoong i dunia aiya? Mau langit songko-songko madi' sampa' na ko ewanyo bau kajojoongan nu Belento apaa mule' ola laigan bau ponsomban anu binaungkumo aiya!

2 TAWARIKH 6:18

Panyo, o Tumpu Allah, pa' totu-totu'u ahi' na belento sanang na jojoong i dunia aiya hi kami manusia? Langit iwi-iwi' ma di' sukup na ko ewanyo bau kajojoongan nu Belento, ka' aiyaje laigan anu kuba-kubau aiya ponsomban belento tantu lebe madi' sukup!

MAZMUR 132:14

Ia notatae, “I aiyamo na kajojoongan-Ku sampe toka sidu-sidutu', Aku kahanda'mo mompalentah i tampat aiya.

MAZMUR 68:18

Pulu'an nu madala na kareta anu otaha'imano; Tumpu tinokamo hi aha, Ia nompotoamo katalasanggoan-Nyo.

NOSABATMO 29:45

Aku jojoongmo hi aha bansa Israel ka' timbalimo Tumpu Allah nu aha.

NOSABATMO 8:19

sahingga anu pa ilimu' haha aijo' notataemo hi tomundo, “Aiya Tumpu Allah na nombau,” panyo tomundo aijo' panggaga, ka' susumo anu tinaloakonmo nu Tumpu, tomundo aijo' madi' mongka'oho' mompajuli potatae i Musa ka' i Harun.

YESAYA 47:12

Kinyonyoaimo ahi' totu-totu'u na do'a-do'a tiba ponsumbu'a nu beleyum iwi-iwi', anu saja'mo nomposibuk beleyum salatanmo pe'e beleyum daagi' ana-anak. Ihe na monsumbu' aijo'memang ahi' mingguna hi beleyum, da bau ponggala-gala sampobali' nu beleyum.

YESAYA 57:15

Kalana sumo uukamo na potatae nu Tumpu Anu Matangkas na Kuasanyo ka' susi', anu balakuasa sampe toka sidu-sidutu', “Kajojoongan-Ku i tampat anu matangkas ka' susi', panyo suele ahi' jojoong hi to mia-mian anu ma'ima' na kinyonyoanyo, ka' anu binalatobatmo isinin na dosa' nu aha, da opo'ule'mo na sumangat nu aha tiba halapan nu aha.

YESAYA 8:18

Aiya na aku tiba to ana-anak anu binee'mo nu Tumpu hi belengku. Tumpu Anu Daka' na Kuasanyo mompalentah i Bungkutnyo nu Sion nonsaimo mae kami da timbali tanda hi aha Israel.

DANIEL 4:4

Aku jojoong tumuu' kopian i uno nu laiganku ka' aku tumuu' sanang.

DANIEL 5:11

Kalana i uno nu kalaja'an nu belento Tuanku daagi' ko samian na mo'ane kinuasanmo nu roh nu to pilo-pilogot anu susui'. Tempo'nyo daagi' tuuma nu belento Tuanku na nompalentah, mian aijo' pande ka' ko bukuti'nyomo, timbali mongalati'i ka' mule' ko kapandean bapikin, anu susumo kapandean bapikin nu to pilo-pilogot. Tuuma nu belento Tuanku i Tomundo' Nebukadnezar nohangkatmo ia tinimbali polaya' nu topo tahi'i tiba anu ko pangatahuan ka' to mia-mian anu ko ilimu'nyo, ka' anu pande na montoa mandala'.

NOMBILANGMO 35:34

Boli mohumimi'i tano' anu ojojoongi nu belemiu, kalana Akumo na Tumpu, ka' Aku jojoongmo atina' hi belemiu bansa Israel.”

MATIUS 19:26

I Yesus nontoa aha lantas notatae, “De mian, aijo' madi' opoko ala! Panyo de hi Tumpu, iwi-iwi' timbali.”

YOHANES 1:14

Potatae nu Tumpu tinimbalimo mian, Ia jinojoongmo aiya hi kita, ka' kita nontoamo katalasanggoan-Nyo. Katalasanggoan-Nyo tinalimanyomo salaku anak sa'a-sa'angu'nyo nu Tuuma. Kalana Ia, sahingga kita nontoamo Tumpu ka' kalibosan-Nyo hi kita.

YOHANES 14:17

Ia aijo' Roh nu Tumpu anu momponyata' kahondoan mongkona Tumpu. Dunia madi' montalima Ia kalana madi' montoa ka' madi' monsumbu' Ia. Panyo komiu monsumbu' Ia, kalana Ia jojoong hingga-hinggat ka' komiu, ka' mosa'angu' tiba komiu.

YOHANES 14:23

I Yesus nontaami, “Mian anu mongkalibosi Aku, tionyo mombatuki pangajalan-Ku. Tuumang-Ku mongkalibosije ia. Tuuma ka' Aku tokaje hi ia ka' jojoong hingga-hinggat ka' ia.

2 KORINTUS 6:16

Apaa na tuusanannyo Laigan nu Tumpu tiba laigan nu pilogot? Kita aiya Laigan nu Tumpu, aijo'mo Tumpu anu tumuu'. Posi Tumpu na notatae, “Aku jojoongmo hi aha, ka' tumuu' hingga-hinggat tiba aha. Aku timbalimo Tumpu nu aha, ka' aha timbalimo mian anu palesayamo hi beleng-Ku.

ANU PINOTO'I HI YOHANES 21:3

Lantas aku nohongomo potatae lengkat mae i kasuhangan aijo' notatae mae daka-daka', “Tempo' uuka tampat kajojoongan nu Tumpu tibamo mian! Ia tumuu'mo tiba aha, ka' aha timbalimo mian anu palesayamo hi Ia. Tumpu jojoongmo tiba aha, ka' timbalimo Tumpu nu aha.