AYUB 12:10 - KITAB NU TUMPU ALLA LELE MA'IMAI'

¹⁰ Ia na mompalentah iwi-iwi' na kantumuu'an nu anu pinotimbali-Nyomo; ia na mongkuasai santuu' nu batu-batu manusia.

AYUB 12:10 ပူးပေါင်းရင်းမြစ်များ

KAJADIAN 2:7

Lapas aijo' Tumpu Allah nongalamo sangkiding na tano', lantas kinompon-Nyomo ka' tinimbalimo samian na manusia, lantas pinuhakon-Nyomo na sawo anu mompotumuu' i uno nu bolo' nu sungnyo; sahingga tinumuu'mo na manusia aijo'.

KAJADIAN 6:17

Aku mompotokamo mae iyaba' bau posilakai toto sa'angu' na anu ko nyawanyo i dunia. Iwi-iwi' na apaa i dunia tionyo ahi' silakamo.

AYUB 27:3

aku basumpa': De daagi' Tumpu Allah mombee'i aku nyawa, de daagi' ko nyawa i uno nu butongku,

AYUB 27:8

Te daagi' mule' ko anu nutaha'imani nu mian anu ma'idek na kinyonyoanyo, de tokamo na tempo'nyo Tumpu Allah mongalamo nyawanyo?

AYUB 33:4

Roh nu Tumpu Allah na nompotimbalimo aku ka' nombee'imo kantumuu'an hi belengku.

MAZMUR 104:29

De Belento molipai madi'mo montonto'i, aha mabuhukmo; de o alamo nu Belento na santuu'nyo nu aha, aha silakamo, ka' po'ule'mo timbali abu' susumo, momonanyo mae.

MAZMUR 104:30

Panyo de aha nubee'imo nu Belento santuu', aha po'ule'mo opotimbali; Belento po'ule'mo, mombee'i kantumuu'an anu bu'ou i dunia.

ANU MOMPOLELE POTATAE NU TUMPU 9:1

Iwi-iwi' aijo' pinopikilakonkumo hondo-hondo. Tumpu na mongatun mian anu ma'ima' na gau'nyo tiba anu pande ka' mule' de mian aijo' mongka ideki kabai mongkalibosi. Madi' ko anu monsumbu' pa apaa na jadi aiya mae imihi.

YESAYA 42:5

Tumpu nompotimbalimo ka' mule' nombokamo langit; Ia nontali'mo dunia ka' mule' iwi-iwi' na anu tumuu' i unonyo. Ia nombee'imo mian santuu' da tumuu' tiba kinyonyoa. Ia nompoto'imo potuunon aiya hi posaihon-Nyo,

YESAYA 57:16

Madi' sampe toka sidu-sidutu'mo na Aku mompisala'i mian anu palesayamo hi beleng-Ku; madi' ahi' saja'mo Aku motambuha', da boli hente na kinyonyoa nu aha, padahan Akumo aiya na mompotumuu' aha.

DANIEL 5:23

Belento Tuanku takabun hi Tumpu anu kiita' i suluga' ka' baani na mompalentah da oboa oposoop na to mangko-mangko' anu ingagoan i Laigan nu Tumpu. Lantas belento Tuanku tiba anu to tangka-tangkas na pangkatnyo, to bengke-bengkele' nu belento tiba to amba-ambahue' nu belento Tuanku nompuji'mo patong haha aijo' anu mosoni' na binau, salaka, tambaga, besak, kau' ka' batu, ka' mule' to pilo-pilogot anu madi' montoa kabai mohongo kabai mangalati' apa-apaa. Belento Tuanku madi' moholomati Tumpu anu montantukan tumuu' kabai silaka na belento Tuanku ka' anu montantukan jalan nu kantumuu'an nu belento Tuanku.

NOMBILANGMO 16:22

Panyo i Musa ka' i Harun tinolodadupu nonsombah ka' notatae, “O Tumpu Allah, Belentomo na anu nombee'i mae kantumuu'an hi iwi-iwi' na anu tumuu'. De ola samian na anu baladosa', pa' Belento montambuha'imo mian iwi-iwi'?”

YOHANES 3:6

Butong nu mian susumo aiya anu kantoan, ohampeakon nu tu'a nyonyo, panyo palesaya hi Tumpu ohampeakon nu Roh nu Tumpu Allah.

SISIKON NU TO RASUL-RASUL 17:25

Ia mule' madi' mompalalui pontulungi nu mian, kalana Iamo na anu mombee'i kantumuu'an ka' santuu' ka' iwi-iwi' na apaa hi mian.

SISIKON NU TO RASUL-RASUL 17:28

Sumo anu tinaloakon nu mian, ‘Kita tumuu' ka' kolalaajang ka' jojoong i dunia aiya, kalana kakuasa'an-Nyo'.’ Pokakana suele tiba anu tinaloakonmo nu to pia-piangkuka na mian anu nontulis pantun miu. Aha notatae, ‘Kita iwi-iwi' te to ana-anak-Nyo.’