SISIKON NU TO RASUL-RASUL 6:1 - KITAB NU TUMPU ALLA LELE MA'IMAI'

¹ Anu saja' mombatuki Yesus ko pipinnyo ko pintu-pintuangnyo manjoo'. Tempo'nyo aitu to mia-mian nu Yahudi anu motatae nu basa' Yunani, madi'mo sinanang hi to mia-mian anu daagi' Yahudi totu-totu'u. Anu mobasa' Yunani aijo' notatae, “To bouboune mami anu binalumo madi' sinukup nu pontulungi bau balanja sansina-sinaa anu binagi-bagiakon hi to mia-mian.”

SISIKON NU TO RASUL-RASUL 6:1 ပူးပေါင်းရင်းမြစ်များ

AYUB 29:13

Aku nupuji' nu mian anu talalo hondo susa', ku tulungi na mian anu binalumo sahingga aha madi'mo susa'.

AYUB 31:16

Ma'isa toho' aku madi' nontulungi mian anu kasiasi hondo, kabai ola lewa' nompojohok to balu-balu tumuu' susa' anu madi'mo ko anu nupitaha-taha'imani nu aha.

MAZMUR 110:3

De tokamo na sinaanyo beleyum mongkuasaimo, i bungkutnyo anu susi', layat nu beleyum sanang na mamba mahampate. Sumomo dondu'ok daagi' subu, to oli-olitau tokamo mae hi beleyum.

MAZMUR 72:16

O'amalakon da gandum saja' sida hondo ka' madi' kokamingkotannyo i songko-songko na lipu', ka' iwi-iwi' na puge'nyo kahomo anu mingguna na hasinnyo. O'amalakon da tano'nyo ma'omuk susumo Bungkutnyo nu Libanon, ka' anu monjojoongi kota'nyo ko pintu-pintuangnyomo sumomo hemput i tampat padang anu ewa.

YESAYA 1:17

o'ajan na mombau ka'ima'an. O toongi dodo-dodo na ka'adinan ka' boli obau na mongkabisa'i; bee'akon na hak nu aha anak anu madi'mo kotuumanyo ka'tinanyo ka'otinjohi na palakala nu anu balumo.”

YESAYA 27:6

Tempo' anu aiya mae o, ahopi, bansa Israel pokakanamo susumo kau' mimbakatmo ka' ko pintu-pintuangnyomo ka' mule' monsongkohimo tano' aiya anu koko buanyo.

YEREMIA 30:19

Mian anu jojoong ikiijo' mompuji'mo mae Aku nu nyanyian ka' montaligalaimo kalana lame'mo Ku pojadimo na aha da oholomati ka' madi'mo daagi sola' o'alu ka' konjoo'nyo nu aha mompaka pintuangmo.

YEHEZKIEL 22:7

Madi'mo daagi' ko samiannyo na anu jojoong atina' hi beleyum na moholomati tu'anyo nu aha. Beleyum nongakalimo mian anu lengkat mae isalipu'an ka' nongalamo ka'untungan hi mian anu binalumo ka' mule' anu madi'mo ko tuumanyo tiba tinanyo sisingkapmo sinusa' aijo'.

MALEAKHI 3:5

Notatae na Tumpu Anu Daka' na Kuasanyo, “Aku tokamo mae hi belemiu da momputusimo. Aku malia'mo timbali sakisi de momputusimo to tukang-tukang sihir, to mia-mian anu lewa' masala', anu tinimbali sakisai baleko', hi anu madi' adin na mombee'i gaji kona hi aha mian anu mongala tambo, hi aha anu madi' ko ka'adilannyo kona hi aha to balu-balu, to ana-anak anu madi'mo ko tuumanyo ka' tinanyo, ka' aha mian nu salipu'an mae, ka' mule' kona hi aha mian iwi-iwi' anu madi' mongadati Aku.”

MATIUS 23:13

“Silakamo na komiu to gulu-gulu' agama ka' to mia-mian nu Farisi! Komiu saja' mombau pula-pula. Komiu ola monsaduakon da mian madi' totu-totu'u timbali mian anu palesayamo hi Tumpu Allah. Posi komiu pe'e madi' mongka'oho' mian anu palesayamo hi Tumpu, ka' mian sangga'at anu oka'oho', miu da boli palesaya. [

SISIKON NU TO RASUL-RASUL 11:20

Panyo daagi' ko anu hi aha to mia-mian anu palesayamo aijo', anu nolengkat mae i Siprus ka' i Kirene, daagi' mule' ko to mia-mian anu namba nokiijo' i Antiokhia ka' nompolele Lele Ma'ima' mongkona i Yesus aijo' hi to mia-mian anu madi' bala agama Yahudi.

SISIKON NU TO RASUL-RASUL 11:26

Salatan siningkabotmo i Saulus, ia nomboamo i Saulus nokiijo' i Antiokhia ka' sinataun ahi' na aha nosa'angu' tiba jama'at kiijo' mae ka' nongajan da'isan na mian. Kiijo'mo i Antiokhia na to mia-mian anu palesayamo hi Yesus momonaje hondo sinanggohan to mia-mian Kristen.

SISIKON NU TO RASUL-RASUL 11:29

Sahingga iwi-iwi' anu saja' mombatuki Yesus nomposa'angu'mo tanga'an da mompakatu pontulungi hi to utu-utus anu jojoong i Yudea; toto samian mompakatu yayamo anu nu poko ala.

SISIKON NU TO RASUL-RASUL 2:41

Manjoo' na mian palesaya i anu nu taloakon i Petrus, lantas aha pinalamandikan. Sahingga konjoo' nu mian palesaya i sinaa aitu nintuang mule' totolu' na madala na mian.

SISIKON NU TO RASUL-RASUL 2:45

Aha nompobaluk to bala-balang ka' halata' nu aha, lantas obagi-bagimo nu aha na doinyo aijo' iwi-iwi', otoa i kapalaluan nu aha toto samian.

SISIKON NU TO RASUL-RASUL 2:47

Aha saja' mompuji-puji' Tumpu ka' nuka'ima'i nu mian iwi-iwi'. Toka sansina-sinaa konjoo'nyo nu aha saja' mintuang kalana Tumpu mombee' hi aha to mia-mian anu oposalamat.

SISIKON NU TO RASUL-RASUL 4:35

ka' binee' nu aha hi to rasul-rasul. Lapas aijo' doinyo obagi-bagiakonmo hi toto samian anu mompalalui.

SISIKON NU TO RASUL-RASUL 4:4

Panyo to mia-mian anu nohongomo ajalan nu to rasul-rasul aijo', manjoo'mo na anu pinalesaya. Sahingga konjoo' nu aha nintuangmo sampe tinimbalimo kila-kila olima' na madala na mian.

SISIKON NU TO RASUL-RASUL 5:14

Ka' lebe pin lebe mintuang da'isan na to mia-mian palesaya hi Tumpu – to momo'ane sumo aitu mule' to bouboune.

SISIKON NU TO RASUL-RASUL 5:28

Ia notatae, “Tinewa'mo mami na komiu, da bolimo hondo-hondo mongajan mongkona Mian aijo'. Panyo uuka soba toa pa' apaa na anu binaumo nu belemiu! Komiu nompolelemo pangajalan miu aijo' i songko-songko na Yerusalem, ka' komiu ola mule' monsangka saba' kamimo na anu nonsaduakon kinapatean nu Mian aijo'.”

SISIKON NU TO RASUL-RASUL 6:2

Kalana aitu, aha sampu-sampulu' ka' ohua' na to rasul-rasul aijo' nolimu' iwi-iwi' anu saja' mombatuk ka' notatae hi aha, “Madi' ma'ima' de kami belenti na mompolele potatae nu Tumpu Allah, kalana tionyo mongulus apaa na anu okaan.

SISIKON NU TO RASUL-RASUL 6:7

Sumo aitumo na lele lengkat hi Tumpu nompaka togilelemo ka' anu saja' mombatuki Yesus i Yerusalem nompaka da'isanmo. Ka' da'isan mule' na to ima-imam anu pinalesayamo hi Yesus.

SISIKON NU TO RASUL-RASUL 9:29

Ia notatae ka' pinainggaga tiba to mia-mian Yahudi anu mobasa' Yunani, panyo aha bala usaha mompatei ia.

SISIKON NU TO RASUL-RASUL 9:39

Lau-laus i Petrus tinuminjo ka' nombatuki aha. Potokanyo kiijo' mae, ia binoa i kaman anu i bawonyo. Iwi-iwi' balu anu i kiijo' nontikubi i Petrus galo-galo' humaang ka' nompotoa hi ia to baju-baju'nyo ka' juba-juba' anu kina'utakon i Dorkas hi aha tempo'nyo ia daagi' tumuu'.

SISIKON NU TO RASUL-RASUL 9:41

Lantas i Petrus nontoongi limanyo ka' nontulungi ia tuminjo. Lapas aijo' i Petrus nolaga to mia-mian palesaya anu i kiijo' hingga-hinggat tiba to balu-balu aijo', lantas binee'nyo na i Dorkas anu po'ule'mo tinumuu' aijo' hi aha.

ROMA 12:7

Mian anu ko balakat montulungi mian sangga'at, tionyo totu-totu'u montulungi mian sangga'at. Mian anu ko balakat mompogulu', tionyo totu-totu'u mompogulu'.

1 KORINTUS 10:10

Kita madi' timbali mososon sumo anu binau nu sambagian aijo' hi aha naipuan mae, sahingga aha pinatean nu Malaikat Kapatean.

2 KORINTUS 11:22

Mian nu Ibrani ugaat na aha! Aku singkona mian nu Ibrani. Mian anu Israel ugaat na aha? Aku singkona mian nu Israel. Lee' i Abraham ugaat na aha? Aku singkona sumo aijo'.

PO'ULE' INGULIT 26:12

De tokamo na taun kototolu'nyo, belemiu tionyo ahi' mombee'mo palasombahan, aijo'mo sambagian anu o ala i sampulu' na bagian na isi nu ale' nu belemiu ka' obee' hi mian nu Lewi, mian anu lengkat mae i salipu'an, to ana-anak anu madi'mo ko tuuma ka' tinanyo tiba anu balu, sahingga i kota-kota nu belemiu mohumpak kaanon anu nupalalui nu aha. De lapasmo,

FILIPI 3:5

Aku sinunatmo salatan umun ingialun sinaamo. Aku i hampe sumo mian nu Israel, lengkat mae lee' i Benyamin; aku mian nu Ibrani totu-totu'u. I uno nu han tulu-tulutan i atulan nu agama Yahudi, aku minsoop i tompuk nu Farisi.

1 TIMOTIUS 5:3

O'adati na to balu-balu anu totu-totu'u me mosi tumuu' butong sausa'.

1 TIMOTIUS 5:9

Ola balu anu sosokmo i atulan haha aiya yo, timbali oposoop i uno nu daputan nu to balu-balu: Umunnyo tionyo madi' maga'a lengkat i anompulu' na taun, u'utu mae ola minsan na no'osoa,

IBRANI 13:1

Tionyo ahi' komiu tataap mompaha kali-kalibosi samian ka' samian susumo to mia-mian Kristen anu moto utus.

YAKOBUS 1:27

Tulu-tulutan i agama anu obau sahondo-hondonyo ka' madi' ko sala'nyo, susumo koonyo nu Tumpu Tuumanto aijo'mo: montulungi to ana-anak anu unon madi'mo ko tina ka' tuumanyo, ka' to balu-balu anu sinusa'mo, ka' mombala'ingati butong da boli nu idei nu dunia aiya.

YAKOBUS 4:5

Boli monsangka Kitab nu Tumpu notatae madi' ko sababnyo, “I uno nu butongto Tumpu nompojoongmo roh anu madi' opoko gagakon na pongka'oho'nyo.”

YAKOBUS 5:9

Boli lewa' motusa' ka' mompaha pisa-pisala'i, da komiu madi' o hukum nu Tumpu. O inau'! Mian Kopian ingohanimo, malia'mo toka.