SISIKON NU TO RASUL-RASUL 15:32 - KITAB NU TUMPU ALLA LELE MA'IMAI'

³² I Yudas ka' i Silas anu suele nabi, pinin na notatae tiba to Utu-utus anu palesayamo kiijo' i Antiokhia kalana mongkakeha'i da baani na aha.

SISIKON NU TO RASUL-RASUL 15:32 ပူးပေါင်းရင်းမြစ်များ

DANIEL 11:1

Lamo ia na anu binee'anmo pakalaja'an nontulungi ka' nontinjohimo mae aku i taun anu momonanyo salatan i Darius mian nu Media aijo' tinimbalimo pamalentah.

MATIUS 23:34

Hongo ima-ima': Aku monsaije hi komiu to nabi-nabi, to mia-mian pande, ka' to gulu-gulu'; sambahagian lengkat hi aha o pateije miu, ka' sambahagian anu sangga'at o salibje miu. Daagi' ko anu o sakisaje miu i uno nu laigan pogalejaan, ka' komiu mahantumput lengkat i sa'angu' na kota mokiijo' i kota sangga'at.

LUKAS 11:49

Aijo' na sababnyo Kapandean nu Tumpu notatae, ‘Ku saije mamba hi aha na to nabi-nabi ka' to posa-posaihon-Ku; sambagian o patei ka' sambagian o sakisa!’

SISIKON NU TO RASUL-RASUL 11:23

Ka' salatan i Barnabas tinokamo kiijo' mae, ka' nontoa mosia na Tumpu nombalakatimo to mia-mian aijo', ia ilame' hondo. Lantas ia nompoita da aha totu-totu'u mohongo-hongo Tumpu nu iwi-iwi' na kinyonyoa.

SISIKON NU TO RASUL-RASUL 11:27

Tempo'nyo aitu daagi' ko to pia-piangkuka na nabi lengkat mae i Yerusalem nokiijo' i Antiokhia.

SISIKON NU TO RASUL-RASUL 13:1

I uno nu jama'at Antiokhia, daagi' ko nabi-nabi ka' to gulu-gulu', aitumo i Barnabas ka' i Simeon, anu o sanggohi mule' Si Hitam, i Lukius lengkat mae i Kirene, i Menahem anu pinotuu' hingga-hinggat i Tomundo Herodes, ka' i Saulus.

SISIKON NU TO RASUL-RASUL 14:22

I kota-kota aijo' aha nompaka pohoson kinyonyoa nu anu saja' mombatuki Yesus ka' nompokinde'i anu saja' mombatuki aijo' da tataap palesaya hi Yesus. “Kita tionyo manjoo' na mongoa'i sansala i moonanyo, atina'je ka' kita mongoa'i ka'ima'an nu Dunia Bu'ou nu Tumpu,” sumo aitumo na to rasul-rasul aijo' mongajanakon hi anu saja' mombatuki Yesus i to kota-kota haha aijo'.

SISIKON NU TO RASUL-RASUL 15:1

To pia-piangkuka na mian lengkat i Yudea tinoka kiijo' mae i Antiokhia ka' nongajan to mia-mian palesaya i Antiokhia aijo' tukoonyo de aha madi' o sunat susumo atulan i Musa, aha madi' timbali o posalamat.

SISIKON NU TO RASUL-RASUL 15:22

To rasul-rasul ka' to pola-polaya', nohingga-hinggat tiba iwi-iwi' mian anu ninsoopmo jama'at aijo' nomputusimo da mompile'imo to pia-piangkuka na mian anu kiijo' hi aha anu osai mamba mokiijo' i Antiokhia mohingga-hinggat tiba i Paulus ka' i Barnabas. Sahingga aha nompile'imo i Silas ka' i Yudas anu o sanggohi i Barsabas. Ua'aha na mian aiya, aitumo to mia-mian anu talasanggo ka' mian anu palesayamo kiijo' i Yerusalem.

SISIKON NU TO RASUL-RASUL 15:27

Jadi, kami monsai i Yudas ka' i Silas mamba hi to Utu-utus. Posi ahamo na mompotokakon lele hi komiu anu suele tinulis i uno nu sulat aiya.

SISIKON NU TO RASUL-RASUL 15:3

Jama'at i Antiokhia nolaya' aha tinoka i sambiha' nu kota, lapas aijo' aha namba notulu i Fenisia ka' i Samaria. I kiijo' mae aha nonsisikakon mosia na to mia-mian anu misa' Yahudi nombee'mo butongnyo hi Tumpu. Lele aijo' talalo nompolame' to mia-mian anu palesaya i kiijo'.

SISIKON NU TO RASUL-RASUL 15:31

Salatan to mia-mian anu ninsoopmo i jama'at aijo' nombasa' sulat aijo', aha sinanang hondo i isi nu sulat aijo' anu nomposanangmo kinyonyoa nu aha.

SISIKON NU TO RASUL-RASUL 15:41

Aha nontikubi Siria ka' Kilikia; i kiijo' mae aha nompokododomo to jama-jama'at.

SISIKON NU TO RASUL-RASUL 18:23

Salatan jinojoong i kiijo' tino pia-piamangamo na kinopinnyo, ia namba mule' nolenga tano' nu Galatia ka' Frigia da mompokododo kapalesaya'an anu totu-totu'u nu to mia-mian anu palesayamo.

SISIKON NU TO RASUL-RASUL 2:40

Sumo aitumo na i Petrus nompotalangakon hi aha. Ka' manjoo' na potatae sangga'at, suele pinoto'inyo hi aha da butong nu aha boli maninggalo' i bansa anu ma'idek aiya, anu nu hukumje nu Tumpu.

SISIKON NU TO RASUL-RASUL 20:2

Ia namba molenga to lipu-lipu kiijo' mae i Makedonia ka' nombee'i manjoo' na pokinde' hi to mia-mian anu palesayamo hi Yesus kiijo' mae salaku bau pongkakeha aha. Lapas aitu ia namba nokiijo' i Yunani.

ROMA 12:6

Kita toto samian daagi' ko balakat mombau apa-apaa madi' pokakana. Balakat haha aijo' binee' nu Tumpu hi kita samata-mata kalana kalibosan-Nyo. Mokonyo aitu tionyo ogunakonto na balakat haha aijo'. Mian anu ko balakat mompolele lele lengkat mae hi Tumpu, tionyo mompolele lele lengkat mae hi Tumpu Allah aijo' iya na anu nupoko ala.

ROMA 12:8

Mian anu ko balakat mongkakeha'i mian sangga'at, tionyo totu-totu'u mongkakeha'i mian sangga'at. Mian anu ko balakat mombee'i mian sangga'at apaa na anu daagi' hi ia, tionyo obau na aijo' nu kinyonyoa manonong ka' pantas. Mian anu ko balakat mongatun, tionyo totu-totu'u mongatun. Mian anu ko balakat mompotoa kalibosan hi mian sangga'at, tionyo obau nu kinyonyoa sanang.

1 KORINTUS 1:8

Posi i Kristus na monjagai komiu sampe i mihinyo; da de tempo'nyomo Ia po'ule'mo toka, komiu otokai mae madi' ko ideknyo.

1 KORINTUS 14:29

Ua'aha kabai totolu' na mian anu ko lele lengkat mae hi Tumpu tionyo ahi' mompotoka lele aijo' hau-haunyo sangga'at mompopikilakon apaa na anu tinaloakonnyo aijo'.

1 KORINTUS 14:3

Panyo mule' mian anu mompotokakon lele lengkat mae hi Tumpu Allah, mompotoka hi mian da bau pompohoson aha, da bau pongkakeha aha, ka' da bau pomposanang kinyonyoa nu aha.

1 KORINTUS 14:32

Balakat nu Roh da timbali mompotoka lele lengkat mae hi Tumpu timbali o atun nu mian anu mompotoka lele aijo'.

EFESUS 3:5

Naipuan mae lahasia aijo' madi' toho' pinosumbu' hi mian, panyo uuka Roh nu Tumpu nomponyata'mo hi to rasul-rasul ka' hi to nabi-nabi-Nyo.

1 TESALONIKA 2:11

Komiu monsumbu' saba' kami mombau apa-apaa hi komiu sumomo samian na tuuma kona hi to ana-anaknyo.

1 TESALONIKA 3:2

hau-haunyo aijo' kami nonsaimo utusto i Timotius. Ia samian na posaihon nu Tumpu anu bakalaja tiba kami, da mompolele Lele Ma'ima' mongkona i Kristus. Kami nonsai i Timotius hi komiu, da ia mompohosonakon komiu ka' mongkakeha' komiu da lebe palesaya mule' hi Kristus.

1 TESALONIKA 4:1

Ahennyo to Utu-utus kami nombee'imo sonto' hi komiu, mosia na komiu tionyo tumuu' da momposanang kinyonyoa nu Tumpu. Memang komiu tinumuu'mo sumo aijo'. Panyo uuka aiya kalana kuasa nu Tumpu Yesus opoita mami totu-totu'u hi komiu da mompaka bala usaha mule' i han anu sumo aijo'!

1 TESALONIKA 5:14

Opoita mami mule' hi to Utu-utus, pokinde'i ma'i-ma'ima' na mian anu madi' mongka'oho' mokalaja; posanang na kinyonyoa nu mian anu mabuhuk; tulungi na mian anu palalu otulungi, ka' sabaan kona hi mian iwi-iwi'.

1 TESALONIKA 5:20

Boli osangka dengke na lele anu binee'mo nu Roh nu Tumpu Allah.

2 TESALONIKA 3:12

Kalana kuasa nu Tumpu Yesus Kristus, sahingga kami mompalentahmo mian haha aijo' da mombee'i pokinde' da aha mokalaja ma'i-ma'ima' ka' molio anu bau pontumuu' nu aha.

1 TIMOTIUS 2:1

Momonanyo, kupoita totu-totu'u da apaa na anu opoita, sambayang, ka' mondo'akon mian da'isan, ka' mule' mompoita talima kase anu opotoka hi Tumpu kona hi mian iwi-iwi';

2 TIMOTIUS 4:2

Tionyo ahi' beleyum saja' mompolele lele lengkat mae hi Tumpu Allah aijo', ka' sabole-bole opoita da mian mohongo pa' aha mongka'oho', kabai madi'. Tionyo ahi' beleyum bala usaha da mian palesaya totu-totu'u, mompoto'i kasala'an ka' mongkakeha'i aha. Pagala osabalakon na mongajan mian.

1 PETRUS 5:1

Ku poita da okalesang hondo-hondo nu to pola-polaya' nu jama'at miu. Aku nontulis aiya salaku sangalu bubuu' polaya' ka' salaku mian anu nonsakisimo kasansala'an anu ingoa'anmo i Kristus, ka' anu saidi' mae suele opopodaka', de maluannyo katalasanggoan i Kristus opotoamo hi manusia. Ku poita sabole-bole,

1 PETRUS 5:10

Panyo salatan lapasmo na komiu mongoa'i kasansala'an, Tumpu Allah na saidi' mae mompotimbali belemiu talakana'. Ia na mompotinjo ka' mompohoson belemiu ka' mule' mompotantu belemiu. Kalana Iamo na Tumpu anu manonong hondo, anu nolagamo belemiu da suele mongoa'i katalasanggoan-Nyo anu sampe toka sidu-sidutu' kalana i Kristus.

1 PETRUS 5:12

Sulatku anu ola kodo-kodo' aiya tinulisku toka hi belemiu tinulungan i Silas, anu ku anggap samian na utus Kristen, anu mohongo-hongo. Aku kahanda' mongkakeha' belemiu, ka' mompohoson kinyonyoa nu belemiu, kalana apaa na anu tinuliskumo aiya lele anu totu'u aijo'mo balakat nu Tumpu. Opai-pai lio da komiu mintoong ahi' hoso-hoson i balakat aijo'.