SISIKON NU TO RASUL-RASUL 13:43 - KITAB NU TUMPU ALLA LELE MA'IMAI'

⁴³ Ilapas to mia-mian nosabat lengkat i laigan pogalejaan aijo', i Paulus ka' i Barnabas binatukanmo nu mian da'isan Yahudi ka' bansa sangga'at anu ninsoopmo agama Yahudi. Sahingga to rasul-rasul aijo' nompokinde'imo aha, da aha tionyo saja' montaha'imani balakat nu Tumpu.

SISIKON NU TO RASUL-RASUL 13:43 ပူးပေါင်းရင်းမြစ်များ

MATIUS 23:15

Silakamo na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! Komiu mamba majo-majo'on motaap i ambai, ka' lumajang monsongkohi katano'an ola ahi' mombau samian da minsoop i agamaum. Ka' salatan mian aijo' ninsoopmo i agamaum, komiu monsaduakonmo ia salon nu nalaka. Lipat pinduan lebe ma'idek molingkudui komiu!

SISIKON NU TO RASUL-RASUL 11:23

Ka' salatan i Barnabas tinokamo kiijo' mae, ka' nontoa mosia na Tumpu nombalakatimo to mia-mian aijo', ia ilame' hondo. Lantas ia nompoita da aha totu-totu'u mohongo-hongo Tumpu nu iwi-iwi' na kinyonyoa.

SISIKON NU TO RASUL-RASUL 13:50

Panyo to pangka-pangkat daka' i kota aijo', ka' to bouboune gampa nu aha to mia-mian anu ko pangkat matangkas anu mabuhuk hi Tumpu, sinale'anmo nu to mia-mian Yahudi. Aha nonsabapi da mo'uwali tiba hi Paulus ka' i Barnabas, ka' nolaa' ua-ua'aha mompala'i tano' aijo'.

SISIKON NU TO RASUL-RASUL 14:22

I kota-kota aijo' aha nompaka pohoson kinyonyoa nu anu saja' mombatuki Yesus ka' nompokinde'i anu saja' mombatuki aijo' da tataap palesaya hi Yesus. “Kita tionyo manjoo' na mongoa'i sansala i moonanyo, atina'je ka' kita mongoa'i ka'ima'an nu Dunia Bu'ou nu Tumpu,” sumo aitumo na to rasul-rasul aijo' mongajanakon hi anu saja' mombatuki Yesus i to kota-kota haha aijo'.

SISIKON NU TO RASUL-RASUL 14:3

Kalana aijo' i Paulus ka' i Barnabas jinojoongmo pinin i kiijo'. Ka' binaanimo na aha notatae mongkona Tumpu. Sahingga Tumpu mule' nompotoamo bukuti', saba' lele anu pinotokamo nu aha mongkona liibos-Nyo aijo' memang totu'u; Ia nombee'i kuasa hi aha da mombau anu okabangangi ka' hahan anu ma'isa toho' tinimbali.

SISIKON NU TO RASUL-RASUL 16:14

Samian anu lengkat aijo' hi aha, aijo'mo na anu lewa' mompobaluk hude mingkamumu', sanggonyo i Lidia nolengkat mae i Tiatira. Ia mongkalibosi Tumpu, sahingga Tumpu nohenggoakon kinyonyoanyo da ia montalima apaa na anu no ajanakon i Paulus hi ia.

SISIKON NU TO RASUL-RASUL 17:17

Mokonyo aijo' i laigan pogalejaan, i Paulus nompaha buka-buka pikilan tiba to mia-mian nu Yahudi ka' to mia-mian sangga'atannyo anu monsombah Tumpu i kiijo'. Sumo aitu mule' i to pasar-pasar toka nu sansina-sinaa ia mompaha buka-buka' pikilan tiba batu-batu mian anu i kiijo'.

SISIKON NU TO RASUL-RASUL 17:34

Panyo daagi' ko anu aijo' hi aha na mosambiha' hi Paulus ka' palesaya hi Yesus, aijo' hi aha: I Dionisius mian anu ko pangkat mokalaja i Areopagus, ka' samian na boune sanggonyo i Damaris, ka' to pia-piangkuka mule' na mian.

SISIKON NU TO RASUL-RASUL 17:4

To pia-piangkuka na mian pinalesayamo lantas mombatukimo i Paulus ka' i Silas; sumo aitu mule' manjoo' hondo na to mia-mian Yunani anu mabuhuk hi Tumpu, ka' da'isan suele na to bouboune anu talasanggo.

SISIKON NU TO RASUL-RASUL 18:7

Lantas i Paulus nompala'i aha ka' namba jinojoong i laigan anu i sambiha' nu laigan pogalejaan aijo'. Laigan aijo' laigan nu samian anu misa' Yahudi, panyo ia monsombah Tumpu. Sanggo nu mian aijo' i Titius Yustus.

SISIKON NU TO RASUL-RASUL 2:10

lengkat i Frigia ka' i Familia, lengkat i Mesir ka' i da'erah-da'erah Libia koko Kirene; daagi' ko anu aiya hi kita anu tinoka lengkat mae i Roma,

SISIKON NU TO RASUL-RASUL 28:23

Sahingga aha ka' i Paulus nontantukanmo sa'angu' na sinaa da bau pompahakabotan. I sinaa aijo' dina'isan na mian tinoka nokiijo' i kajojoongan i Paulus. Lengkat pe'e subu tinoka mamalom, na i Paulus nontalangkan nompotoka hi aha lele mongkona mosia na Tumpu mompalentah sumo Tomundo'. To ayat-ayat lengkat i Kitab i Musa ka' Kitab nu to Nabi-nabi, na pinake i Paulus, ia mompagala da aha palesaya hi Yesus.

SISIKON NU TO RASUL-RASUL 6:5

Iwi-iwi' na mian aijo' situju tiba pongka'oho' nu to rasul-rasul aijo'. Lantas aha nompile'i i Stefanus, samian na anu palesaya hondo hi Yesus ka' nukuasai nu Roh nu Tumpu. Suele tinompile'i: i Filipus, i Prokhorus, i Nikanor, i Timon, i Parmenas, ka' i Nikolaus lengkat i Antiokhia; ia misa' mian nu Yahudi, panyo ninsoopmo agama nu Yahudi.

ROMA 11:6

Ia nompile'i aha kalana balakat-Nyo, ka' misa' mimpu'u i ka'ima'an nu kinyonyoa nu aha. Kalana de pompile'i nu Tumpu aijo' mimpu'u i ka'ima'an nu kinyonyoa nu mian, nyata' balakat nu Tumpu aijo' misa'mo balakat anu totu-totu'u.

ROMA 3:24

Ola kalana balakat nu Tumpu samata-mata anu i halala'akon, pompahasumbu'an nu Tumpu tiba mian timbali mompo'ule' ma'ima'; baunyo aijo'mo: mian pinobebas i Yesus Kristus.

ROMA 5:2

Kalana kita palesaya hi Yesus, sahingga Ia nompotimbali kita moko ala mongoa'i liibos nu Tumpu, ka' kalana liibos aijo' kita tumuu' uuka aiya. Kalana aijo' kita lame' na kinyonyoa, kalana kita ko anu otaha'imani aijo'mo kita mongoa'ije tumuu' ma'ima' anu binee' nu Tumpu!

ROMA 5:21

Jadi, kita tionyo mate kalana kita nombaumo dosa'. Panyo Tumpu mongkalibosi kita mombee'i jalan hi kita da mompaha ima' tiba Ia. Ka kalana pompahasumbu'anto tiba Tumpu po'ule'mo na'ima', Ia mule' mombee'i kantumuu'an kopian ka' sampe toka sidu-sidutu' hi kita kalana i Yesus Kristus, Tumpunto.

2 KORINTUS 5:11

Osumbu' mami apaa na alati'nyo mabuhuk hi Tumpu; mokonyo aijo' kami bala usaha da mian monsumbu' hondo-hondo butong mami. Tumpu monsumbu' hondo kami, ka' suele ku poita na komiu da monsumbu' kami i uno nu kinyonyoa miu.

2 KORINTUS 6:1

Kalana kami mokalaja hingga-hinggat tiba Tumpu, mokonyo aijo' opoita mami sabole-bole boli komiu monsia-siakon ka'ima'an nu kinyonyoa nu Tumpu aijo'.

GALATIA 5:1

Kita uuka aiya binebasmo kalana i Kristus nompobebasmo kita! Kalana aijo' otoongi dodo-dodo na kabebasan miu, ka' bolimo mongka'oho' obotuani mule'.

GALATIA 5:4

De komiu ko usaha da mompo'ule'mo ma'ima' tiba Tumpu olio ihan mombatuki atulan nu agama, aijo' alati'nyo pompahasumbu'an miu tiba i Kristus mobotu'mo. Desumo aitu komiu tumuu' i sambiha'nyomo nu balakat nu Tumpu.

EFESUS 2:8

Tumpu mongkalibosi komiu, aijo' na sababnyo Ia momposalamat komiu kalana komiu pinalesayamo hi Yesus. Kasalamatan miu atina' misa' posi hasin nu usaha miu. Aijo' te balakat nu Tumpu. Jadi, madi' ko samian pe'e na anu timbali mongkabubuulakon posi butongnyo mongkona han aijo'.

FILIPI 3:16

Panyo han aiya tionyo ahi' opalahatikan: Kita tionyo tataap tumuu' mombatuki atulan anu binatuktomo sangkutnyo tempo' uuka aiya.

FILIPI 4:1

Mokonyo aijo', to Utu-utusku anu kuku kanonongi, sumo aitumo na komiu tionyo ahi' totu-totu'u palesaya hi Tumpu. Kinyonyoangku saja' montutugi hi komiu! Komiumo na anu kuku kabilahiakon ka' anu nompolame'mo aku.

KOLOSE 1:23

Panyo tantu komiu tataap ahi' saja' palesaya, ka' tuminjo hoso-hoson i kapalesaya'an miu. Boli saidi' mae komiu molapasakonmo anu otaha'imani, anu binee'mo hi komiu salatan komiu nontalimamo Lele Ma'ima' lengkat mae hi Tumpu. Lele aijo' pinokalebamo hi toto samian i songko-songko na dunia. Ka' kalana aijo' suele aku, i Paulus, tinimbalimo posaihon.

KOLOSE 1:28

I Kristusmo atina' na anu opolele mami toka hi toto samian. Kami mompotuka' ka' mompagala hondo-hondo mompogulu' aha iwi-iwi'. Kahanda' mami aijo'mo da batu-batu mian timbali oboa hi Tumpu Allah, sumo mian anu motu'amo na pikilan i uno nu hahan rohani, kalana nosa'angu'mo tiba i Kristus.

TITUS 2:11

Kalana Tumpu nompotoamo balakat-Nyo kalana kahanda' momposalamat iwi-iwi' mian.

IBRANI 12:15

Obala'ingati da boli ko samian na anu mosabat mompala'imo kalibosan nu Tumpu, da boli ko samian na anu timbalimo sumo hemput anu ko lasungnyo itina' hi komiu, sahingga monsaduakonmo kasusa'an ka' mongideimo mian da'isan nu lasungnyo.

IBRANI 13:9

Boli mompojohok iwi-iwi na ngahan nu pangajalan anu madi' minsoop i akan aijo' ola mompokalilu komiu. Kinyonyoanto tionyo ahi' opohoson nu kanonongan nu Tumpu, aijo' na ma'ima'; boli ola kalana atulan haha aijo' mongkona anu o kaan. To mia-mian anu naipuan mae nombatukimo totu-totu'u atulan haha aijo' madi' nohumpak apa-apaa anu ko gunanyo.

1 PETRUS 5:12

Sulatku anu ola kodo-kodo' aiya tinulisku toka hi belemiu tinulungan i Silas, anu ku anggap samian na utus Kristen, anu mohongo-hongo. Aku kahanda' mongkakeha' belemiu, ka' mompohoson kinyonyoa nu belemiu, kalana apaa na anu tinuliskumo aiya lele anu totu'u aijo'mo balakat nu Tumpu. Opai-pai lio da komiu mintoong ahi' hoso-hoson i balakat aijo'.

2 PETRUS 3:14

Kalana aijo', to utu-utus anu okanonongi, hau-haunyo belemiu montanda'imo Sinaa aijo', bala usaha totu-totu'u da tumuu' susi' ka' madi' ko alunyo i ahop nu Tumpu. Ka' opokopiani ima-ima' na pompahasumbu'an tiba Tumpu.

1 YOHANES 2:28

Jadi to ana-anakku, saja' ahi' tumuu' mosa'angu' tiba i Kristus, da saidi' mae de tempo'nyomo Ia toka, kita buke-buke' nu kabaanian na mangadap hi Ia, ka' madi' maninsuluk kalana ma'ambang.

2 YOHANES 1:9

Mian anu madi' montoongi pangajalan i Kristus, ka' ola mule' monggeo-geoakon apaa na ingajanakonmo i Kristus, mian aijo' madi' ko Tumpunyo. Mian anu tataap i uno nu pangajalan i Kristus, alati'nyo daagi'mo ko Tumpu Tuuma ka' mule' Anak.