2 TOMU-TOMUNDO' 11:14 - KITAB NU TUMPU ALLA LELE MA'IMAI'

¹⁴ Tinoanyo na tomundo' anu sala'je i hangkat aijo' tinjo-tinjo i sabatan nu Laigan nu Tumpu i tampat pinohangkatan ia salaku tomundo', tinikubanmo nu to sulu-suludadu anu toto tangka-tangkas na pangkatnyo ka' anu mompuhi tolompet. Iwi-iwi' na mianda'isan nontaligalaimo kalana binilahimo ka' mule' pinuuhanmo nu aha na tolompet. I Atalya binata-batamo ka' binea-beaknyomo na pakeannyo ka' nolobo'mo “Uesan-Uesan!”

2 TOMU-TOMUNDO' 11:14 ပူးပေါင်းရင်းမြစ်များ

KAJADIAN 37:29

Salatan i Ruben po'ule'mo nokiijo' i bubung aijo' ka' madi'mo tinokannyo na i Yusuf ikiijo', bineaknyomo na baju'nyo kalana talalomo hondo molibos.

KAJADIAN 44:13

To utu-utusnyo tu'a talalomo hondo sinusa' sahingga baju' nu aha binea-beaknyomo. Pinaha posake'mo nu aha na boaon nu aha i keledai ka' po'ule'mo ninsusule' i kota.

1 TOMU-TOMUNDO' 1:25

Sinaa uuka aiya ia nonsombahkonmo manjoo' hondo na domba, sapi' lakinyo ka' anak nu sapi' anu toto lompo-lompo' hondo. Iwi-iwi' na to momo'ane anak nu belento Tomundo' i laganyomo. Ka' suele to tale-talenga' nu suludadu i Tomundo' ka' i Imam Abyatar. Aha tempo' uuka hau-haunyo nombaumo bau-bauon tiba ia ka' lewa'mo binilahi, 'Higahiakon ame na i Tomundo' Adonia!'

2 TOMU-TOMUNDO' 11:15

I Yoyada madi' mompobee' i Atalya opatei koko Laigan nu Tumpu jadi pinoto'inyomo hi suludadunyo anu toto tangka-tangkas na pangkatnyo. “Boa na iasabatakon montulu suludadu anu monjagai ka' opatei maumo pa' ihe na montulungi ia.”

2 TOMU-TOMUNDO' 9:13

To sanga-sangalu i Yehu nalia-lia' na nongukat juba nu aha ka' binoka nu aha i ojan hi ahop i Yehu. Lantas pinuhanmo nu aha na tolompet ka' lewa'mo nolobo'akon, “I Yehu na tomundo'!”

2 TOMU-TOMUNDO' 9:23

“Aiya salaku kalakuan ma'idek, Ahazia!” na tinaloakon daka-daka' i Yoram ka' nombalikmo karetanyo lantas nopalaimo.

1 TAWARIKH 12:40

Aha to tulu-tulunan nu bansa sangga'at anu jojoong i sasu utara maumo majo'on aijo'mo tulunan nu bansa Isakhar, Zebulon tiba Naftali singkapmo mae tinoka na aha nonsake'i mae keledai, unta, bagal, ka' sapi' ka' manjoo' hondo na anu okaan pinaha posake' mae nu aha: labu, buah nu ara, kismis, anggur, ka' lanya' nu zaitun. Aha mule' nomboa mae sapi' ka' domba da o kolot ka' okaan. Iwi-iwi' aijo' bau pomponyata' kalana talalomo hondo sinanang na kinyonyoa nu aha mian Israel iwi-iwi'.

AMSAL 29:2

De bisuannyo mian anu adin na mompalentah, mian da'isan bilahimo. Panyo de bisuannyo mian anu ma'idek na kinyonyoanyo na balakuasa, mian da'isan monta'up kasansala'an.

LUKAS 19:37

Salatan i Yesus malia'mo toka i Yerusalem, i jalan pintuahan nu Bungkutnyo Zaitun, iwi-iwi' na anu mombatuki Ia da'isan hondo aijo', lewa'mo noloboo'akon mompuji' Tumpu Allah ka' montalima kaseh hi Ia, kalana iwi-iwi' na anu okabangangi sinakisianmo nu aha.