2 TIMOTIUS 2:25 - KITAB NU TUMPU ALLA LELE MA'IMAI'

²⁵ Ia madi' ko sega-sega na mongajan mian anu ka'oho' monggagakon; o'amalakon da Tumpu mombee'i kasampatan hi mian haha aijo' da balatobat mombabali'i dosa-dosa' nu aha, ka' monsumbu' pangajalan anu totu'u.

2 TIMOTIUS 2:25 ပူးပေါင်းရင်းမြစ်များ

YEREMIA 31:33

Sumo uuka na palajanjian anu Ku bauje tiba aha mian nu Israel; Atulan-atulan-Ku, Ku po una'mo i uno nu kinyonyoa nu aha, ka' mule' Ku tulismo i uno nu kinyonyoa nu aha. Aku timbalimo Tumpu Allah nu aha ka' mule' aha timbalimo mian anu palesayamo hi beleng-Ku.

YEHEZKIEL 11:19

Aha Ku bee'ije kinyonyoa anu sangalasan ka' mule' pikilan anu sangalasan, madi'mo pokakana sumo anu ihikuhakonmo. Kinyonyoa nu aha anu nokuutmo susumo batu Ku alamo ka' Ku bolosimo nu kinyonyoa anu tulu-tulutan hi beleng-Ku.

YEHEZKIEL 12:3

Kalana aijo' o, manusia anu madi' tumuu' batu. Bau na uuka, panyo obau sinaa potouka na bala-balang nu beleyum ka' obaluni isa'angu' na balunan susumo anu saja' nu bau nu aha anu oboamo ka' opojoongmo ilipu' sangga'at. Ka' ma'isa pe'e pihi pala'imo na laigan nu beleyum panyo boli ahi' matikohowini hi mian susumo ahi' mian anu oboamo itampat pompojoongan. Bolo'i na pimpi' nu laigan nu beleyum panyo nu toa ahi' nu mian anu sasaja' motomuhuk haha aijo', ka' boamo na balunan anu ko isinyo nu balang nu beleyum ka' posabatmo montulu bolo' ai-aijo'. Ka' simbumo na balunan atina ibekoang nu beleyum. Ka' lambamo panyo pihije ahi'; kukubi na mata nu beleyum sahingga madi' nu toa-toa na jalan anu nu tului. Pobakas da iwi-iwi' na bansa Israel montoa iwi-iwi' apaa na anu binaumo nu beleyum, da baumo salaku pokinde' hi aha. Da ihe na monsumbu' ugaat tiba jalan anu sumo aijo' aha mangalati'je taalu' aijo'mo aha na anu saja' motomuhuk.”

YEHEZKIEL 36:26

Jadi belemiu Ku bee'imo kinyonyoa anu bu'ou ka' mule' pikilan anu bu'ou. Kinyonyoa nu beleyum anu nokutmo susumo batu aijo' Ku bolosimo nu kinyonyoa anu tulu-tulutan.

YEHEZKIEL 36:31

Belemiu tonginau'mo anu u'utu mae i kalakuan nu belemiu anu ma'i-ma'idek ka' palabuatan nu belemiu anu madi' pantas aijo', lantas oposi kahegatimo nu belemiu na butong nu belemiu kalana nu saduakon nu dosa-dosa' ka' palabuatan anu ma'idek nu belemiu aijo'.

ZAKHARIA 12:10

Lapas aijo' lee' mae i Daud tiba mian anu jojoong i Yerusalem Ku bee'imo kinyonyoa anu mongka'ima'i mongkalibosi ka' mule' mongka'ima'i balado'a. Aha saidi' mae montoamo ia jijinalo'mo nu aha ka' montando'imo susumo mian anu montando'imo anak anu sa'a-sa'angu'nyomo na sinilaka. Aha tumando'mo ka' susa'mo hondo na kinyonyoa nu aha susumo mian anu nolapusmo na anaknyo tumpe.

MATIUS 11:29

Batuki na palentang-Ku, ka' balajan pe'e hi beleng-Ku. Sabab Aku aiya madi' bohipusaon, ka' madi' ko kinti-kinti, sahingga komiu tompilawe.

MATIUS 21:32

Kalana i Yohanes anu Mompalamandikan tinoka, ka' nompotiju' hi komiu mosia na tumuu' anu nu kahanda'i nu Tumpu, panyo komiu madi' mongka'oho' palesaya i pangajalannyo; panyo anu saja' montage hasin ka' to bou-boune masala' palesaya hi ia. Panyo mau mule' komiu nontoamo iwi-iwi' aijo', komiu madi' ahi' mombali'i pikilan miu ka' madi' palesaya hi Tumpu.”

MARKUS 1:15

Koo-Nyo, “Tumpu malia'mo montampu'uni mompalentah. Balatobatmo bolimo mombau dosa-dosa'um, ka' opalesayamo na Lele Ma'ima' anu lengkat mae hi Tumpu!”

YOHANES 5:34

Han aijo' pinoto'ing-Ku, misa' kalana Aku mompalalui katalangan lengkat hi mian, panyo da komiu oposalamat.

SISIKON NU TO RASUL-RASUL 11:18

Lapas nohongo aijo', aha madi'mo daagi' nonggagakon. Lantas aha nompuji'mo Tumpu. Aha notatae, “Desumo atina', to mia-mian misa' Yahudi suele obee'i tempo' nu Tumpu da balatobat bolimo mombau to dosa-dosa'nyo ka' mongoa'i kantumuu'an ma'ima'!”

SISIKON NU TO RASUL-RASUL 2:38

Tinaaman i Petrus, “Balatobatmo, bolimo mombau dosa-dosa' miu. Ka' tionyo komiu toto samian opalamandikan nu sanggo i Yesus Kristus, da dosa-dosa'um o ampuni. Sahingga to Utu-utus montalimaje tambo nu Roh nu Tumpu lengkat hi Tumpu.

SISIKON NU TO RASUL-RASUL 20:21

Mau hi to mia-mian Yahudi kabai hi to mia-mian bansa sangga'at aku saja' mompokinde'i da aha bolimo mombau to dosa-dosa' nu aha ka' tokamo hi Tumpu, tiba palesaya hi Tumpu Yesus.

SISIKON NU TO RASUL-RASUL 5:21

Sahingga to rasul-rasul aijo' nombatukimo potuunon nu Malaikat aijo'. Daagi' subu-subu hondo aha nambamo nokiijo' i Laigan nu Tumpu ka' mulai nongajan i kiijo'. Hau-haunyo aitu imam daka' ka' anu saja' mombatuki ia tinokamo, lantas nombaumo putusan na Mian Kopian Daka' nu Agama tiba to pola-polaya' nu Yahudi. Lapas aijo' aha nonsaimo mian mamba mongala to rasul-rasul aijo' i uno nu talungku' da oboa mangadap hi aha.

SISIKON NU TO RASUL-RASUL 5:31

Ka' Tumpu nombee'mo hi Ia kapalentahan ka' kakuasa'an anu matangkas sumo Polaya' ka' Pomposalamat; da bansa Israel obee'i tempo' da balatobat bolimo mombau to dosa-dosa'nyo ka' mohumpak'je ka'ampunan.

SISIKON NU TO RASUL-RASUL 8:22

Kalana aijo' pala'imo na tanga'anum anu ma'idek aijo', ka' poita hi Tumpu da Nu ampuni na pikilanum anu ma'idek aijo'!

GALATIA 6:1

To Utu-utus! De daagi' ko samian o humpak mombau dosa', sahanyo komiu anu tumuu' mombatuki Roh nu Tumpu mompotiju' mian aijo' minsusule' i jalan anu totu'u. Panyo komiu mompotiju' aijo' boli kopesa-pesa ka' jaga da boli sampe posi komiu tagoda mule'.

1 TIMOTIUS 2:4

Ia mongka'oho' da iwi-iwi' na mian oposalamat, ka' monsumbu' anu totu'u.

1 TIMOTIUS 6:11

Panyo beleyum atina' anumo nu Tumpu, jadi beleyum tionyo matikojo'on i han iwi-iwi' aijo'. O'usahakon da timbali mian anu totu'u i mata nu Tumpu, anu tulut hi Tumpu, palesaya hi Kristus, mongkalibosi sangko mian, sabaan i uno nu mongoa'i sansala, ka' mingkalakuan ma'ima' na kinyonyoa.

2 TIMOTIUS 3:7

To bou-boune haha aijo' sapoi-poitanyo da o ajan, panyo madi' moko ala monsumbu' ajalan anu totu'u, anu lengkat mae hi Tumpu.

TITUS 1:1

Anakku i Titus! Aku i Paulus nontulis sulat aiya salaku posaihon nu Tumpu ka' rasul i Yesus Kristus. Aku pinile'anmo ka' sinai da montulungi to mia-mian anu pinile'anmo nu Tumpu da timbali mahoson i kapalesaya'an nu aha. Aku mule' tionyo molaya' aha da monsumbu' pangajalan anu totu'u, anu ingajalakonmo nu agamanto.

TITUS 3:2

Taloakon hi aha da boli mompitana' kabai painggaga mau mule' pa' hi he, panyo mingkalakuan manonong na kinyonyoa. Tionyo ahi' aha saja' tobos hi iwi-iwi' na mian.

YAKOBUS 1:17

Batu-batu taju anu ma'ima' ka' palasen anu ma'ima' pinolengkatannyo mae i suluga', tinau'akon nu Tumpu, anu Nompotimbali iwi-iwi na anu ma jingka i langit. Iamo na Tumpu anu madi' mongabali' ka' madi' mule' monsaduakon kapintungan mau mule' pa' mosiamo.

1 PETRUS 3:15

Panyo i uno nu kinyonyoa miu, tionyo ahi' belemiu mongadati i Kristus anu samata-mata opotoka hi Ia, anu sitimbang tiba kakuasa'an-Nyo salaku Tumpu. Ka' tionyo ahi' belemiu saja' mosadia bau potaam hi batu-batu mian anu mompokilawa mongkona anu otaha'imani nu belemiu, anu itina'mo hi belemiu.

1 YOHANES 5:16

De komiu montoa sala'samian sangko kita mian Kristen mombau dosa' anu madi' mongahenakon mian aijo' talakangkanan i kantumuu'an kopian ka' sampe toka sidu-sidutu', tionyo ahi' komiu mondo'akon hi Tumpu; ka' Tumpu mombee'je kantumuu'an aijo' hi ia. Aiya kona hi aha anu dosa'nyo madi' mongahenakon aha talakangkanan i kantumuu'an aijo'. Panyo daagi' ko dosa' anu mongahenakon mian talakangkanan i kantumuu'an aijo'. Mongkona han aijo' aku madi' notatae tukoongku komiu tionyo mondo'akon hi Tumpu.