2 TESALONIKA 2:2 - KITAB NU TUMPU ALLA LELE MA'IMAI'

² Boli sampa-sampa' bingong kabai madi'mo sanang na kinyonyoa kalana ko lelemo i hongo tukoonyo sinaa po'ule'mo katokaan nu Tumpu Yesus tinokamo. Kugantang lele aijo' nolengkat mae i sa'angu' na lele anu jadi aiya mae i ahop, kabai lengkat mae i sa'angu' na ajalan; kabai ugaat daagi' ko anu notatae, tukoonyo kami toho'mo nontulis anu sumo aijo' i uno nu sala'sa'angu' na sulat mami.

2 TESALONIKA 2:2 ပူးပေါင်းရင်းမြစ်များ

YESAYA 26:3

O, Tumpu Belento nombee'imo mae kadamean ka' mule' kantumuu'an anu ma'ima' hi mian anu mahoson nakinyonyoanyo, kalana ia palesaya hi Belento.

YESAYA 7:2

Salatan tomundo' nu aha Yehuda nohongomo taalu' suludadu nu aha Siria ninsoopmo i daerah nu aha Israel anu monsangaja'i ia, ia ka' bansanyo nabuhukmo hondo, sahinga aha ilakatnyomo sumomo kau' anu ginayu'mo nu mombun.

MIKHA 2:11

Belemiu mongkahanda'i nabi anu mongka'ima'i baleko' ka' mongakali ka' lewa' mongkila-kila tukoonyo belemiu mohumpakmo anggur tiba inumon manjoo' hondo anu molangui.”

MATIUS 24:24

Kalana tokaje mae na anu momposalamat padahan anu madi' totu'u, ka' to nabi-nabi anu madi' totu'u. Aha mombau palabuatan-palabuatan anu o palias, ka' hahan anu okabangangi bau pongakali, de timbali, mau mian anu palesayamo hi Tumpu suele.

MARKUS 13:7

De komiu mohongo lontup nu pahampatean ka' lele mahampate, boli mabuhuk. Han haha aijo' tionyo jadimo, panyo aijo' misa' alati'nyo au'aitu tempo'nyomo na kiamat.

LUKAS 21:19

De komiu moko tahan ka' sabaan, komiu saidi' mae salamat.”

LUKAS 21:9

Boli mule' komiu mabuhuk de komiu mohongo lele nu pahampatean tiba pahantuda'an. Iwi-iwi' aijo' tionyo timbali imoonanyo. Panyo aijo' misa' alati'nyo tempo'nyomo na kiamat.”

YOHANES 14:1

“Boli kinyonyoaum susa',” koonyo i Yesus hi aha. “Palesaya hi Tumpu, ka' palesaya suele na Aku.

YOHANES 14:27

Kabilahian Kupo'una' hi komiu. Posi Kabilahian-Ku na Kubee' hi komiu. Anu kubee' aijo' misa' sumo anu binee' nu dunia hi komiu. Boli susa', boli mabuhuk.

1 KORINTUS 1:8

Posi i Kristus na monjagai komiu sampe i mihinyo; da de tempo'nyomo Ia po'ule'mo toka, komiu otokai mae madi' ko ideknyo.

1 KORINTUS 14:32

Balakat nu Roh da timbali mompotoka lele lengkat mae hi Tumpu timbali o atun nu mian anu mompotoka lele aijo'.

1 KORINTUS 7:26

Monginau' iwi-iwi' kasusa'an anu montokai tempo' uuka, ku oa'i lebe ma'ima' de mian tataapmo mombatuki kantumuu'annyo sumo bau-baunyo anu tempo' uuka.

EFESUS 5:6

Boli komiu nu akali nu to sisi-sisik anu madi' mimbatu. Kalana anu hahan aijo'mo na monsaduakon Tumpu montambuha'i to mia-mian anu madi' tulu-tulutan hi Ia.

1 TESALONIKA 3:3

Tiba jalan anu sumo aijo' madi' ko samian pe'e itina' hi komiu na anu tolo sule' kalana saja' mongoa'i kasansala'an-kasansala'anto anu sumo aiya. Posi komiu monsumbu'mo saba' kasansala'an-kasansala'an anu sumo, aijo' ninsoopmo i uno nu tanga'an nu Tumpu kona hi kita.

1 TESALONIKA 4:15

Mongkona han aijo', aiyamo na ajalan nu Tumpu anu kahanda' opotokakon mami hi komiu: Salatan i Tumpu Yesus tokamo, misa' kita anu daagi' tumuu' na opopohimonakon lantas to mia-mian anu sinilakamo na imihije.

1 TESALONIKA 5:2

Kalana posi komiu monsumbu'mo totu-totu'u te Sinaa Katokaan nu Tumpu aijo', toka sumo anu buling toka pihi.

2 TESALONIKA 2:15

Mokonyo aijo' to Utu-utus tinjomo hoso-hoson ka' saja' toongi na to panga-pangajalan anu binee'mo mami hi komiu mau anu pinoto'i mau pe'e anu tinulis.

2 TESALONIKA 3:17

Salan do'angku i Paulus. Posi aku na nontulis bahagian sangga'at aiya. Aiyamo na tanda anu tinuliskumo iwi-iwi' i sulatku.

ANU PINOTO'I HI YOHANES 19:20

Sahingga binatang aijo' i hakopmo hingga-hinggat tiba to nabi-nabi anu madi' totu'u anu nombaumo hahan anu okabangangi i ahop nu binatang aijo'. (Anu okabangangi haha aijo' atina'mo na binatang haha aijo' anu nongakalimo to mia-mian anu ko tandanyo binatang aijo', ka' to mia-mian anu monsombah patong nu binatang aijo'.) Lantas binatang aijo' ka' to nabi-nabi anu madi' totu'u aijo' ingalinmo tumu-tumuu' i uno nu ndalangon apu anu banyela-nyelak ka' ko belelangnyo.