2 TAWARIKH 8:14 - KITAB NU TUMPU ALLA LELE MA'IMAI'

¹⁴ Susumo koonyo nu atulan i Daud tuumanyo, i Salomo nongatunmo anu obau sansina-sinaa nu aha to ima-imam ka' aha mian nu Lewi anu tionyo ahi monyanyiakon nyanyian pompuji-puji' Tumpu ka' montulungi to ima-imam de mokalajamo monsombah Tumpu. Ka' suele to mia-mian anu monjagai Laigan nu Tumpu binaginyomo toto santompuk na anu monjagai sa'angu' na sabatan daka' susumo anu tinantukanmo i Daud posaihon nu Tumpu Allah.

2 TAWARIKH 8:14 ပူးပေါင်းရင်းမြစ်များ

2 SAMUEL 23:2

Roh nu Tumpu Allah notataemo hi belengku da opotokakon; potuunon tiba palentah-Nyo aiya i biwingku.

1 TOMU-TOMUNDO' 13:1

Tempo'nyo aitu daagi' ko nabi samian kiijo' i Yehuda. Ia pinokau nu Tumpu da mamba i Betel. Nabi aijo' tinoka i kiijo' tempo'nyo i Yerobeam hau-haunyo tinjo-tinjo i ahop nu mezbah monsombahkon koloban.

1 TAWARIKH 16:37

Lapas aijo' i Tomundo' Daud nombee'imo i Asaf kalaja ka' to mian-mian sangaa'at aha Lewi anu saja' mongulus de monsombahmo i tampat pompo'una'an Peti' Palajanjian nu Tumpu. Sansina-sinaa aha tionyo ahi' mokalaja i kiijo',

1 TAWARIKH 16:42

I Heman tiba i Yedutun suele kalajanyo mompuhi tolompet, simbal ka' pakakas nu musik sangga'at anu opuhi de manyanyimo nyanyian bau pompuji'. To mia-mian aha mae sa'anakan i Yedutun binee'an kalaja bau ponjaga sabatan toto daka-daka' haha aijo'.

1 TAWARIKH 23:1

Salatan i Tomundo' Daud i langkai'mo hondo ia nohangkatmo i Salomo binaumo tomundo' nu Israel.

1 TAWARIKH 24:1

I Harun kino anak mo'ane aha opat; i Nadab, i Abihu, i Eleazar, tiba i Itamar. I Nadab tiba i Abihu sinilakamo momona nompala'imo tuuma nu aha, ka' mule' madi' kino anak. Kalana aitu i Eleazar tiba i Itamar to utu-utus nu aha i hangkatmo binau Imam. I Daud nombagimo lee' mae i Harun tinompu-tompuknyomo na mian ka' pinosi bee'anmo kalaja apaa na, hi santompuk obau. Nombagi tompukan haha aijo' i Daud tinulungan i Zadok lee' mae i Eleazar ka' i Ahimelekh lee' mae i Itamar.

1 TAWARIKH 25:1

Anu mongatun de monsombahmo Tumpu, i Tomundo' Daud ka' to pola-polaya' nu aha mian nu Lewi nompile'imo sa'anakan mae i Lewi aijo'mo: i Asaf, i Heman, tiba i Yedutun. Aha binee'an kalaja mompotoka potuunon nu Tumpu Allah ka' okuti'akon kasapi', gambus ka' simbal. Anu molaya' aha de monsombahmo Tumpu ka' mosia na atulannyo toto sangahan pinile'anmo ka' tinompu-tompukmo na mian sumo uuka:

1 TAWARIKH 26:1

Aiya na pombagian nu aha mian Lewi anu monjagai Laigan nu Tumpu. Anu lengkat mae hi aha sa'anakan i Korah, i Meselemya na tiniju' anak i Korah lengkat mae hi auwan i Ebyasaf. Ia kino anak aha 7 na mo'ane anu tinulismo i daputan ka' binatukakon i tatusan nu umun nu aha: i Zakharia, i Yediael, i Zebaja, i Yatniel, i Elam, i Yohanan, i Elyo'enai.

1 TAWARIKH 28:19

Lantas pinoto'imo i tomundo' Daud, “Iwi-iwi' aijo' i unomo nu tanga'an anu tinulismo susumo anu pinoto'imo nu Tumpu na sonto'nyo hi belengku da obau.”

1 TAWARIKH 9:17

To mia-mian anu monjagai Laigan nu Tumpu jojoong i Yerusalem tibamo auwan nu aha aijo'mo: i Akub, i Talmon, i Ahiman, tiba i Salum anu mongkapalai ponjaga nu Laigan nu Tumpu.

1 TAWARIKH 9:24

Opat na sabatan: sa'angu' sasu utara, sa'angu' sasu Selatan, sa'angu' sasu kabete'an ka' sa'angu' sasu kinsoban. Toto sa'angu' na sabatan haha aijo' samian na aha mian nu Lewi anu mongkapalai aha anu monjagai aijo'.

2 TAWARIKH 23:19

I sabatan daka' haha aijo' i Laigan nu Tumpu, pinaha pojoongmo i Yoyada na mian da monjaga mian anu madi' pantas monsombah Tumpu madi' timbali minsoop.

2 TAWARIKH 23:4

Aiyamo na anu tionyo ahi' obaunto. De to ima-imam ka' mian nu Lewi lapasmo na kalaja nu aha i sinaa nu Sabat, aha madi'mo timbali minsusule'. Aha obagi totolu' sambagian na aha, monjaga i to saba-sabatan daka' i Laigan nu Tumpu,

2 TAWARIKH 29:25

Susumo apaa na anu pinoto'imo nu Tumpu hi Daud anu pinotokakon i Nabi Gad, anu mokalaja hi tomundo, ka' anu pinotokakonmo i Nabi Natan, i tomundo nombee'imo kalaja i Laigan nu Tumpu na aha mian nu Lewi mongkuti' kasapi ka' gambuus,

2 TAWARIKH 31:2

I Tomundo Hizkia po'ule'mo nohangkat gombuan nu to ima-imam ka' mian nu Lewi ka' pinosi bebee'an kalaja na aha. Anu nu kalaja nu aha aijo'mo: monsombahkon koloban anu opotunu, ka' koloban anu bau pompodame, mongatun anu monsombah i Laigan nu Tumpu, ka' mompuji' ka' mule' montalima kase hi Tumpu iyaya mae na tampat anu kiijo' i Laigan nu Tumpu.

2 TAWARIKH 35:10

Salatan sinadiamo iwi-iwi' na anu opake i lamean Paskah aijo', to ima-imam ka' gombuan haha aijo' nu aha mian nu Lewi nongalamo tampat nuaha toto sanggombu susumo anu pinalentahkonmo i tomundo.

2 TAWARIKH 35:15

To mia-mian anu pande na mahaik musik aha sa'anakan mae i Asaf anu minsoop tulunan mae nu bansa Lewi, jojoong i tampat anu tinantukanmo i Tomundo Daud hi aha. Aiya na sanggo nu aha: i Asaf, i Heman tiba i Yedutun ka' samian na nabi anu mokalaja hi tomundo. To mia-mian anu monjaga iwi-iwi' sabatan daka' madi' timbali mompala'i ponjaga'an nu aha, kalana aha timbali molame'akon Paskah i tampat ponjaga'an nu aha nu boaije nu aha mian nu Lewi sangga'at nabagi nu aha.

2 TAWARIKH 35:4

Posadiamo na gombuan nu belemiu i Laigan nu Tumpu ka' toongi na kalaja anu binagi-bagimo anu tinantukanmo hi belemiu i Tomundo Daud ka' i Tomundo Salomo anaknyo momo'ane.

2 TAWARIKH 5:11

Iwi-iwi' na imam anu daagi' i kiijo' lengkat iyaya mae na tampat nosadiamo da mongala bahagian apaa na anu obau sinaa aitu. Iwi-iwi' na anu lewa' manyanyi ka' mahaik musik, aha mae tulunan nu bansa Lewi, aijo'mo i Asaf, i Heman, i Yedutun ka' iwi-iwi' na aha anu sa'anakan mae nompusokmo baju' hude lenan. Mian nu Lewi haha aijo' tinuminjo sasu kabete'an mezbah ka' nontoongi simbal ka' kasapi. Ka' sangalu mule' nu aha 120 na to ima-imam anu mompuuhi tolompet. Nyanyian nu aha to panya-panyanyi pinohinggat-hinggatakonmo tiba musik tolompet, simbal ka' musik sangga'at. Sumo uuka na onyi'nyo nu nyanyian nu aha mompuji' Tumpu: “O puji' na Tumpu, kalana Ia manonong. Kalibosannyo sampe toka sidu-sidutu'.” Salatan to ima-imam nosabatmo lengkat mae i Laigan nu Tumpu aijo', monti-montiik Laigan aijo' kahomo jingka tandanyo tinokamo na Tumpu, sahingga aha madi'mo noko ala nolausakon apaa na anu binaumo nu aha, aijo'mo monsombah Tumpu.

2 TAWARIKH 8:15

Iwi-iwi' na anu pinoto'imo i Daud hi to ima-imam ka' hi mian nu aha Lewi mongkona iwi-iwi' na gudang ka' sansangga'atannyo tinulutannyomo ima-ima'.

EZRA 6:18

Lapas aijo' ingatunmo nu aha mogombu-gombu na anu mokalaja mobobolosan i Laigan nu Tumpu, ka' binagi-bagimo hi to ima-imam ka' hi to mia-mian nu Lewi susumo koonyo n atulan anu tuli-tulis i kitab i Musa, panyo aha nombagi aijo' tinoa ahi' na aha anu pantas montoongi kalaja aijo'.

NEHEMIA 12:24

I Hasabya, i Serebya, i Yesua, i Binui tiba i Kadmiel na mongatun aha to mia-mian nu Lewi da binagi-bagi toto santompuk. Minsan mohumpak kalaja aha ohua' na tompukannyo, anu mompuji' Tumpu ka' montalima kase hi ia mobolobosan montuluti susumo anu ingatunmo i Tomundo' Daud Posaihon nu Tumpu Allah aijo'.

NEHEMIA 12:25

To mia-mian anu monjagai sabatan daka' Laigan nu Tumpu anu binee'an kalaja monjagai salipi' pompo'una'an posadiaon mantu anu o kaan koko sabatan daka' Laigan nu Tumpu aijo'mo: i Matanya, i Bakbukya, i Obaja, i Mesulam, i Talmon ka' i Akub.

NEHEMIA 12:36

Aitu mae i hiku nu aha anu lumajang montuntuni aijo'mo to mia-mian anu bubu' aha mae sa'anakan, aijo'mo: i Semaya, i Azareel, i Milalai, i Gilalai, i Maai, i Netaneel, i Yehuda tiba i Hanani. Aha iwi-iwi' nontoongi pakakas musik susumo anu lewa' nukuti' i Tomundo' Daud, posaihon nu Tumpu Allah. I Imam Ezra, anu pande-pande hondo i Atulan nu Tumpu Allah aijo', lumajang mamba momona hondo aita' hi mian anu nojiji'mo na i lumajang.

LUKAS 1:5

Tempo'nyo i Herodes tinimbalimo tomundo lipu' nu Yudea, daagi' ko sa'angu' na imam sanggonyo i Zakharia. Ia ninsoop i kumpulan nu to ima-imam Abia. Sanggo nu bengkele'nyo i Elisabet, suele lee' nu imam.

LUKAS 1:8

Tempo'nyo kumpulan Abia nohumpak bahagian, i Zakharia nontoongi pangkat imam, i ahop nu Tumpu.

SISIKON NU TO RASUL-RASUL 13:22

Salatan Tumpu nompobelentimo ia i pangkatnyo, Tumpu Allah nongangkat mule' i Daud da timbali tomundo nu aha. Ka' aiyamo na anu tinaloakon nu Tumpu mongkona i Daud, ‘Aku nohumpakmo i Daud anak i Isai aijo' samian anu momposanang kinyonyoang-Ku. Iamo na mian anu mombau pongka'oho'-Ku.’

SISIKON NU TO RASUL-RASUL 13:36

I Daud sinilakamo ka' kinubun mule' nohingga-hinggat tiba mompolee'nyo, noko bau na ia apaa na anu sinaiyakonmo nu Tumpu Allah. Bangke' i Daud suele nahutakmo ka' ningkotmo iwi-iwi'.

PO'ULE' INGULIT 33:1

Ma'isa pe'e sinilaka na i Musa, anu sinai mae nu Tumpu Allah, ia nombalakatimo bansa Israel, ia notatae sumo uuka: