2 TAWARIKH 30:6 - KITAB NU TUMPU ALLA LELE MA'IMAI'

⁶ Kalana pinalentahkonmo i tomundo ka' to mia-miannyo anu ko pangkatnyo sinaimo na mian namba i songko-songko na Yehuda ka' Israel momboa sulat haha aijo' anu onyi'nyo sumo uuka, “O mian da'isan nu Israel! Belemiu madi'mo kinuasan nu mian Asyur. Uuka aiya belemiu po'ule'mo mae palesaya hi Tumpu, Tumpu Allah anu nu sombah i Abraham, Ishak tiba i Yakub, da ia po'ule'je montulungi belemiu.

2 TAWARIKH 30:6 ပူးပေါင်းရင်းမြစ်များ

YEREMIA 51:31

Bobotokon nopadeka'mo sangga'at nu payuntun mule' nu sangga'at mamba mompoto'i hi tomundo' Babel koonyo kota' nu aha tinumbuhanmo mae isongko-songko na tampat.

YEREMIA 4:1

Tumpu notatae, “O mian Israel, de belemiu mongka'oho' mae minsusule' hi beleng-Ku. Alin pe'e mae na pilogot anu Ku ka'ideki aijo', ka' tulu-tulutanmo ahi' hi beleng-Ku.

ESTER 8:14

Jadi nambamo na to mia-mian anu sinai aijo' nonsake'i ajahan i tomundo. Ka' suele kiijo' i Susan puso nu kota' nu Negara, palentah aijo' binasa'mo.

2 TOMU-TOMUNDO' 15:29

Tempo'nyo i Pekah nompalentah, i Tiglat-Pileser tomundo' nu aha Asyur nongalamo kota' Iyon, Abel-Bet-Makha, Yanoah, Kedes-Hazor, da'erah Gilead, Galilea tiba Naftali. Miannyo anu jojoong i kota' haha aijo' suele binoanyomo salaku mian anu i hakop binoa i Asyur.

2 TOMU-TOMUNDO' 15:19

Tempo'nyo i Pul tomundo' nu Asyur nontumbuhimo Israel, binee'anmo i Menahem na ia 34.000 kilogram na salaka da ia montulungi i Menahem da sabole-bole ia mompalentah Israel, ka' mongkuasai Israel.

AYUB 9:25

Kantumuu'anku sansina-sinaa tomboliu malia' hondo, ka' madi'mo tinoa-toa, madi' daagi' nongoa'i kasanangan.

2 TAWARIKH 28:20

I Tomundo Asyur tinoka mae misa' da montulungi i Ahas, panyo ola mule' ahi' nomposusa' ia.

1 TAWARIKH 5:26

Kalana aijo' Tumpu Allah nompotuka'mo hi kinyonyoa i Pul tomundo' nu aha Asyur, sahingga i lambanannyomo tinumbuhan na lipu' aijo'. I Pul suele salakumo i Tiglat-Pileser. Lantas aha tulunan nu bansa Ruben, Gad, tiba tulunan nu bansa Manasye anu i sasu kabete'an Kaunyo nu Yordan binoamo nu aha salaku anu i hakop ka' mambamo pinojoong nu aha i Halah, i Habor, i Hara, ka' sa'angu' na tampat koko Kaunyo Gozan. I Kiijo' mae aha tinataapmo na jinojoong sampe sinaa uuka aiya.

YAKOBUS 4:8

O'ohani na Tumpu, da Tumpu suele mongohanije komiu. Obaso'i na lima miu, komiu anu baladosa'! Ka' opolino na kinyonyoa miu, komiu anu mopanga' na kinyonyoa!

HOSEA 14:1

Samaria tionyo ahi' ohukumo kalana notomuhukmo madi'mo nohongo-hongo Aku. Mian da'isan nu aha saidi' mae mohopu'mo i uno nu pahampatean; to ana-anak anu daagi bungamea osilakaimo ka' to bou-boune anu hau-haunyo poboa obiha'mo na kompong nu aha.”

YEHEZKIEL 33:11

Poto'iakon hi aha saba' atas sanggong-Ku, Tumpu anu tumuu', Tumpu Anu Matangkas na Kuasanyo, Aku madi' sanang de mian anu palabuatannyo ma'idek silaka; panyo mule' ahi' Ku ka'ima'i da ia bolimo daagi' lewa' mombau dosa'nyo haha aijo' da ia tataap tumuu'. O bansa Israel, bolimo daagi' lewa' mombau palabuatan ma'idek! Kadaka' belemiu mongka'ima'i silaka?

MOHAANGI 5:21

O Tumpu, boa na kami po'ule' minsusule' hi Belento; kami po'ule'mo minsusule' hi Belento! Po'ule'akonmo mae na ka'ada'an mami susumo naipuan mae.

YESAYA 6:13

Pakalaus de daagi' ko anu aha sampulu' na mian lantas samian na daagi' jojoong ilipu' aijo' ia suelemo ahi' opatei. Panyo susumo kau' nunuk de otaa'mo daagi' ahi' ko tu'onyo sumo aijo' mule' daagi' ahi' ko tuha'nyo na bansa aijo' anu saidi' mae pomulaian mian anu susi'mo.”

YESAYA 1:9

De bisuannyo Tumpu Anu Daka' hondo na Kuasanyo madi' nongala aha to pia-piangkuka na mian, kita sinilakamo iwi-iwi' mimbalu-balu' mo Sodom ka' Gomora.

YEREMIA 29:1

Aku nontulismo surat namba hi to ima-imam, hi to nabi-nabi, hi to pola-polaya' nu bansa anu daagi' tutuu' ka' mule' toka hi mian sangga'at anu binoamo mae lengkat i Yerusalem namba i Babel binoa i Nebukadnezar.

1 TOMU-TOMUNDO' 18:36

Salatan nonsombahkonmo koloban malom-malom i Elia nongohanimo mezbah aijo' ka' binalado'a, “O Tumpu, Tumpu Allah anu nunu sombah i Abraham, i Ishak, ka' i Yakub, ponyata'mo mae uuka aiya da nusumbu'mo nu aha taalu' Belentomo atina' na Tumpu Allah nu Israel, ka'akumo aiya na posaihon nu belento. Ponyata'mo mae mule' da nusumbu' nu aha taalu' anu ku bau aiya iwi-iwi' palentah mae lengkat hi Belento.

1 TAWARIKH 29:18

O Tumpu Allah anu nu sombah i Abraham, i Ishak tiba i Yakub mompolee' mami, de timbali da belento montoa mae kami da mian anu pinalesayamo hi belento sabole-bole mongka'ima'i belento susumo tempo' uuka aiya ka' tulungiakon mae da aha saja' tulu-tulutan hi belento.

YEREMIA 3:14

Tumpu notatae, “O mian anu madi' tulu-tulutan pinsusule'mo mae hi beleng-Ku! Belemiu Akumo na tumpunyo. Aku mongalamo belemiu toto samian isa'angu' na kota' ka' mule' toto ua'aha isa'angu' na tulunan nu bansa ka' po ule'mo momboa belemiu i Puge'nyo nu Sion.

MOHAANGI 3:40

Sahanyo oselidikinto na kantumuu'anto, ka' pobalikmo hi Tumpu Allah i suluga'. Imbo'mo da kita momposadia kinyonyoa ka' balado'a

HOSEA 6:1

To mia-mian nu Israel notataemo, “Imbo'mo da kita minsusule'mo hi Tumpu. Lamo ia na monsakiti kita, panyo Ia mule' ahi' na mompa'alin. Ia na mobelai kita, panyo Ia mule' ahi' na mombobodiakon iwi-iwi na Belento.

ZAKHARIA 1:3

Panyo uuka aiya Aku motataemo hi belemiu: Pinsusule'mo mae hi beleng-Ku da Aku suele minsusule'mo hi belemiu.

ZAKHARIA 1:4

Boli montiho susumo mompolee' nu belemiu. Daagi' pe'e naipuan mae to nabi-nabi nompotokamo potuunon-Ku hi aha da aha bolimo mombau palabuatan anu ma'idek, ka' mombau dosa'. Panyo aha madi' nompajuli ka' madi' nongka oho' tinulu-tulutan hi beleng-Ku.