2 TAWARIKH 30:12 - KITAB NU TUMPU ALLA LELE MA'IMAI'

¹² I Yehuda suele Tumpu Allah nokalajamo ka' nomposa'angu'mo kinyonyoa nu mian da'isan da totu-totu'u tulu-tulutan hi pongka'oho' nu Tumpu Allah aijo'mo montuluti palentah i tomundo ka' to mia-miannyo anu ko pangkatnyo.

2 TAWARIKH 30:12 ပူးပေါင်းရင်းမြစ်များ

2 TAWARIKH 29:15

Lapas aijo' aha nomposihukmo to mia-mian nu Lewi sangga'at, ka' aha iwi-iwi' nomposusi'mo butong nu aha. Lapas aijo', to ima-imam ninsoopmo i Laigan nu Tumpu susumo anu pinalentahkonmo nu tomundo, ka' nomposusi'mo butong susumo koonyo nu atulan nu Tumpu. Iwi-iwi' na anu nahumimi'mo sinabatakonmo i popasan nu Laigan nu Tumpu. Lantas binoamo nu mian Lewi i Bangka'nyo nu Kidron i sambiha'nyo nu kota.

2 TAWARIKH 29:25

Susumo apaa na anu pinoto'imo nu Tumpu hi Daud anu pinotokakon i Nabi Gad, anu mokalaja hi tomundo, ka' anu pinotokakonmo i Nabi Natan, i tomundo nombee'imo kalaja i Laigan nu Tumpu na aha mian nu Lewi mongkuti' kasapi ka' gambuus,

2 TAWARIKH 29:36

Sahingga sinanangmo na kinyonyoa i Tomundo Hizkia tiba miannyo anu nu palentah kalana madi' pinin Tumpu Allah nontulungimo aha sahingga noko alamo nombau iwi-iwi' aijo'.

2 TAWARIKH 8:15

Iwi-iwi' na anu pinoto'imo i Daud hi to ima-imam ka' hi mian nu aha Lewi mongkona iwi-iwi' na gudang ka' sansangga'atannyo tinulutannyomo ima-ima'.

EZRA 7:27

Lantas notataemo na i Ezra, “O puji' na Tumpu, Tumpu Allah anu sinombahmo nu mompolee'to! Ia nompotuka' mo hi kinyonyoa i tomundo sahingga ia kinokinyonyoamo mongulus Laigan nu Tumpu kiijo' i Yerusalem.

MAZMUR 110:3

De tokamo na sinaanyo beleyum mongkuasaimo, i bungkutnyo anu susi', layat nu beleyum sanang na mamba mahampate. Sumomo dondu'ok daagi' subu, to oli-olitau tokamo mae hi beleyum.

YEREMIA 24:7

Aku mosu'an, misa' monggautakon aha. Aku mombee'i hi aha da ko kahanda' mangalati', taalu' Akumo ahi' aijo' na Tumpu. Sahingga aha timbalimo mian anu palesayamo hi beleng-Ku, ka' Aku timbalimo Tumpu Allah nu aha, kalana po' ule'mo mae na aha montuluti Aku buke-buke' na kinyonyoa nu aha.

YEREMIA 32:39

Ku bee'imo na aha tujuan nu kantumuu'an samata-mata ola sa'angu': aijo'mo, moholomati mae Aku sampe toka sidu-sidutu'; han aijo' na mombee'i ka'ima'an nu kantumuu'an nu aha, ka' suele kona hi lee' nu aha.

YEHEZKIEL 36:26

Jadi belemiu Ku bee'imo kinyonyoa anu bu'ou ka' mule' pikilan anu bu'ou. Kinyonyoa nu beleyum anu nokutmo susumo batu aijo' Ku bolosimo nu kinyonyoa anu tulu-tulutan.

SISIKON NU TO RASUL-RASUL 4:19

Panyo i Petrus ka' i Yohanes nontaami, “Posi tutugimo apaa na anu totu'u i ahop nu Tumpu: mombatuki palentah nu to Tutuuma kabai mombatuki palentah nu Tumpu.

2 KORINTUS 3:5

Kami madi' ko apa-apaa moko ala momponyata' au'aitu kami moko ala mombau kalaja aiya, panyo Tumpu na nombee'i kahosonan aijo' hi kami da moko ala mombau.

PO'ULE' INGULIT 4:2

Apaa na anu ku palentahkon, boli otuangi kabai oga'ai mau ola sangkiding. Tuluti na palentah nu Tumpu Allah nu belemiu iwi-iwi' anu binee'kumo hi belemiu.

FILIPI 2:13

kalana Tumpu na mokalaja i uno nu butong miu da mompotimbali komiu halala' ka' moko ala momposanang kinyonyoa nu Tumpu.

1 TESALONIKA 4:2

Kalana komiu nonsumbu'mo pompotiju' anu binee'mo mami hi komiu kalana kuasa nu Tumpu Yesus.

IBRANI 13:20

Tumpu mompotumuu'mo Tumpunto i Yesus anu sini-sinilakamo. Kalana Ia sinilakamo, sahingga Ia tempo' uuka tinimbalimo Polaya'to anu Talasanggo aiya hi kita to domba-domba-Nyo. Ia sinilaka aijo' mompaka pompohosonmo palajanjian anu sampe toka sidu-sidutu' anu binaumo nu Tumpu hi kita.

IBRANI 13:21

O amalakon da Tumpu anu pinolengkatan mae nu kabilahian aijo' momposukup hi komiu iwi-iwi na han anu ma'ima' anu opalalui miu da moko ala mombau apaa na anu Nu kahanda'i. O amalakon da kalana i Yesus Kristus, Tumpu na mokalaja i uno nu butongto apaa na anu Nu kahanda'i. Tionyo ahi' i Kristus o puji' sampe toka sidu-sidutu'! Amin.