2 TAWARIKH 16:9 - KITAB NU TUMPU ALLA LELE MA'IMAI'

⁹ Tumpu na montoa songko-songko na dunia ka' mombee'i kahosonan kona hi to mia-mian anu tulu-tulutan hi ia. Beleyum nombaumo apa-apaa anu sala', kalana aijo' otampu'uni uuka aiya beleyum saja'mo monta'up pahampatean.”

2 TAWARIKH 16:9 ပူးပေါင်းရင်းမြစ်များ

KAJADIAN 31:28

Pakalaus mule' beleyum madi' nombee'i kasampatan aku nongooki to maku-makumpungku salaku tanda poga'a-ga'atan. Ponga' hondo na kalakuan nu beleyum!

2 SAMUEL 24:10

Panyo' salatan pinoko lekengmo i Daud na bansa aijo' ingoa'annyo ia sinala'mo, lantas ia notataemo hi Tumpu, “O Tumpu, aku talalomo hondo binaladosa'! Ampuniakon mae na aku, kalana pinonga'mo hondo na aku nombaumo sumo aijo'.”

1 TOMU-TOMUNDO' 15:32

Tempo'nyo i Tomundo' Baesa daagi' nompalentah Israel, saja' nahampate na i Baesa tiba i Tomundo' Asa anu nompalentah Yehuda.

2 TOMU-TOMUNDO' 20:3

“O Tumpu, inau'akon mae na aku aiya anu nokalajamo ma'i-ma'ima' hi belento, ka' aku madi' lewa' tinageo' na kinyonyoa.”

1 TAWARIKH 21:8

Lantas binalado'amo na i Daud, “O Tumpu Allah', aku talalomo binaladosa'! Ampuniakon mae na aku kalana anu binaungkumo aijo' talalo hondo ponga'.”

2 TAWARIKH 15:17

Maumo madi' ingko-ingkot na tampat ponsomban pilogot i lipu' aijo' ingidean i Asa, panyo ia tataap tinulu-tulutanmo hi Tumpu i uno nu kantumuu'annyo.

2 TAWARIKH 15:19

Sampe tinoka i taun kinotolumpulu'nyomo ka' olima' na i Asa nompalentah madi'mo toho' kino anu lewa' mae nompahampateakon i lipu' aijo'.

2 TAWARIKH 16:10

Potatae i Nabi Hanani aijo' nonsaduakonmo da i Asa pinusamo hondo, sahingga pinosoopnyomo na nabi aijo' i uno nu talungku'. Tempo'nyo aitu suele nonsakisamo na i Asa pa' aha sangkuka na miannyo anu nu palentah.

2 TAWARIKH 19:9

Hi aha mian kopian haha aijo' binee'anmo i Yosafat palentah sumo uuka, “Pojalan na palentah anu binee'mo hi belemiu ka' tuluti totu-totu'u na Tumpu. Batuki totu-totu'u na palentah-Nyo iwi-iwi' anu pinalentahkon-Nyomo hi belemiu de belemiu mombau apa-apaa.

2 TAWARIKH 6:20

Ku taha'imani da sinaa ka' malom belento monjagai mae laigan aiya anu pinile'anmo nu Belento salaku tampat bau ponsoban belento kita Tumpu. Ku taha'imani da kiita' mae i tampat kajojoongan nu Belento i suluga' belento mohongo mae ka' mongampuni aku ka' mule' mian nu Israel, mian anu pinalesayamo hi belento aijo', de kami tokamo mae i laigan aiya, ka' balado'amo hi belento.

EZRA 5:5

Panyo pinalahatikanmo nu Tumpu Allah ka' jinagaan-Nyomo na to pola-polaya' nu aha Yehudi, sahingga to mia-mian anu bapangkat hi Tomundo Persia nomputusimo madi'mo mompoposia aha aijo' de ma'isa ko sulat pontaami mae i Darius, sulat anu opakatuje nu aha.

AYUB 28:24

kalana ia na montoa-toa puusnyo nu tano'; sinin na anu i patunyo nu langit timbali Nu potomatakon.

AYUB 31:4

Tantu nusumbu' nu Tumpu Allah na anu binaungkumo iwi-iwi'; kolangka-langkasku iwi-iwi' tinoa-Nyomo.

AYUB 34:21

Kantumuu'an nu manusia ia na monjagai Nutoa iwi-iwi' na kolangka-langkas nu manusia.

MAZMUR 113:6

Panyo Ia maninduku mae na kahanda' montoa langit tiba tano'.

MAZMUR 33:14

Kiita' mae i kasuhangan-Nyo Tumpu mompalahatikan iwi-iwi' na anu jojoong i dunia.

MAZMUR 33:15

Iamo na nombontuk kinyonyoa nu manusia, ka' monsumbu' iwi-iwi' palabuatan nu aha.

MAZMUR 33:18

Tumpu monjagai aha to mia-mian anu tulu-tulutan hondo anu talalo ahi' montaha'imani kalibosan-Nyo.

MAZMUR 34:15

patikojo'on ipalabuatan anu ma'idek, anu ma'ima' ahi' na saja' obau o'usahakan ahi' totu-totu'u na paladamean.

MAZMUR 37:37

Palahatikan na mian anu ma'ima' na kinyonyoanyo tiba anu hodi' na kinyonyoanyo; mian anu mongka'ima'i paladamean ko ka'ima'an nu humpak aiya mae i ahop.

AMSAL 15:3

Tumpu montoa iwi-iwi' anu jinadimo iyaya mae na tampat; Ia mompalahatikan iwi-iwi anu ma'ima' kabai anu ma'idek.

AMSAL 5:21

Tumpu montoa apa-apaa na anu binau mo nu manusia. Maumo mamba moya na manusia, Tumpu mompopiakon.

YESAYA 31:1

Silakamo na aha mian anu nambamo i Mesir nomoita da nu bantui mae nu aha! Aha montakabunakonmo kahosonan nu suludadu nu aha Mesir tiba gombuan nu suludadu nu aha anu monsake'i ajahan ka' mule' kuda nu aha anu toto hoso-hoson ka' mule' kareta nu aha manjo-manjoo' aijo'. Panyo aha madi' palesaya hi Tumpu, Tumpu nu Israel anu susi' ka' madi' aha nomoita da nu bantui.

YEREMIA 16:17

Aku montoamo sinin na anu nu bau nu aha. Madi'mo daagi' ko anu naninsuluk da madi' Ku toa; dosa' nu aha mule' tinoang-Kumo.

YEREMIA 32:19

Sinin na tanga'an nu Belento opalias hondo ka' apa-apaa na anu nu bau nu Belento akabangangi hondo; Nu toa iwi-iwi'na anu nu bau nu manusia ka' mombalosakon aha sitimbang tiba palabuatan nu aha.

YEREMIA 5:1

O mian anu jojoong i Yerusalem, tuusakon na jalan-jalan anu atina' ikota' nu belemiu! Lio iyaya mae ka' posi sakisimo. Soba palesa itampat-tampat anu loas na popasannyo atina' ikota' pa' daagi' ko anu hodi' na kinyonyoanyo anu bala usaha tulu-tulutan hi Tumpu Allah. De daagi' na nu ampuni ahi' nu Tumpu na Yerusalem.

YEREMIA 5:21

“Potombihing mae, o belemiu mian anu ponga' ahi taha-tahahumo! Belemiu ko mata panyo madi' montoa, ko bihing panyo madi' mohongo!

YEREMIA 5:3

Anu sahondo-hondonyo ahi' nu tuntut nu Tumpu aijo'mo tulu-tulutan. Tumpu nondokemo belemiu panyo madi' ahi' opajuli nu belemiu. Ia nohansunimo belemiu panyo belemiu madi' mongka'oho' opokinde'i. Belemiu panggaga hondo ka' madi' mongka'oho' balatobat mompala'i dosa-dosa' nu belemiu.

MATIUS 5:22

Panyo uuka Aku motatae hi beleyum, ihe na pusa hi mian sangga'at, tionyo o putusi na palakalanyo; ka' ihehe na monguduli mian sangga'at, tionyo o putusi na palakalanyo i ahop nu Mian Kopian Daka' nu Agama. Ka' ihehe na montaloakon hi mian sangga'at, ‘Talalo ponga'’, patut o alin i uno nu apu nalaka.

LUKAS 12:20

Panyo Tumpu notatae hi ia, ‘O anu ponga'! Pihi uuka mule' beleyum matemo, lantas ihemo ahi' na mohumpak iwi-iwi' kakaya'an anu ilimu'umo bau kapentingan nu butongum?’

1 KORINTUS 15:36

Ponga' hondo! De kita Utus mosu'an bine' i tano', bine' aijo' madi' tumuu', de bine' aijo' madi' mate pe'e.

GALATIA 3:1

To Utu-utus mian nu Galatia! Komiu talalo hondo ponga'! Pa' ihe na nonsale'i komiu? I Kristus sinilaka kalana sinalib pinotalangkumo sahondo-hondonyo hi komiu!

IBRANI 4:13

Madi' ko sa'angu' pe'e na anu konyawanyo na madi' nutoa nu Tumpu. Iwi-iwi na apaa langgo-langgo' ka' kantoan hi ahop-Nyo. Ka' kita tionyo ahi' mongakui apaa na anu binauntomo i hi Ia.

1 PETRUS 3:12

Kalana Tumpu saja' monginau' to mia-mian anu montuluti pongka'oho'-Nyo; ka' Tumpu saja' mohongo iwi-iwi' do'a nu aha; panyo Tumpu mongewa to mia-mian anu mombau ka'idekan.”

1 SAMUEL 13:13

Nohongo potatae aijo' i Samuel notataemo hi Saul, “Anu binaumo nu belento Tomundo', aijo' sala' hondo. Debelento Tomundo' montuluti palentah nu Tumpu Allah anu pinotokamo hi belento Tomundo' tantu Tumpu mompotatapmo belento Tomundo' tiba lee' nubelento Tomundo' da timbali tomundo' hi aha mian nu Israel sampe toka sidu-sidutu'.