2 TAWARIKH 13:11 - KITAB NU TUMPU ALLA LELE MA'IMAI'

¹¹ Toka subu-subu ka' mama lomo, aha mompapuimo kamangian ka' monsombahkonmo koloban anu opotunu hi Tumpu ka' momposadiamo roti anu suele osombahkon. Salatan malomo nututungimo nu aha na sulu' haha aijo' i tengke nu sulu' anu mosoni' na binau. Kami tataap montuluti iwi-iwi' palentah nu Tumpu, panyo belemiu nohikumo Ia.

2 TAWARIKH 13:11 ပူးပေါင်းရင်းမြစ်များ

KAJADIAN 26:5

Ku balakatije na komiu, kalana i Abraham nontulutimo Aku ka' nompo'imboamo iwi-iwi' na atulan ka' palentah-ngKu.”

2 TAWARIKH 13:10

Kami tataap palesaya hi Tumpu Allah mami ka' madi' o hiku mami na Ia. To ima-imam mami tataap lee' mae i Harun, ka' to mia-mian nu Lewi tataap montulungi aha.

2 TAWARIKH 2:3

I Salomo nompotuunmo tanga'annyo aijo' hi Hiram tomundo nu aha Tirus, “De timbali da belento Tuan mompaha bada-badagang tiba aku susumo tiba i Daud tuumangku. Belento Tuan nompobalukmo hi ia kau' lontio' nu Libanon anu binaunyomo laigan nu tomundo kajojoongannyo.

2 TAWARIKH 2:4

Uuka aiya aku kahanda'mo mombau sa'angu' na laigan bau samata-mata ponsomban Tumpu salaku bau pongadati Tumpu Allah-ngku. I laigan aijo' aku ka' mian da'isan, anu ku palentah monsombah Tumpu opapuakon kamangian da manohong, ka' saja' monsombahkon roti anu o kaan hi Tumpu. I laigan aijo' mule' kami monsombahkon koloban anu opotunu daagi' subu ka' de malomo, de tokamo i Sinaa nu Sabat, de tokame i Sinaa molame'akon Bitu'on Bu'ou, ka' i sina-sinaa sangga'at anu samata-mata bau pongadati Tumpu Allah mami. Kalana, Ia nompalentahmo da han aijo' saja' obau sampe toka sidu-sidutu' nu mian Israel.

NOSABATMO 29:38

“Sansina-sinaa sampetoka sidu-sidutu' aijo' mezbah tionyo ahi' saja' okolobanakon ohua' na domba anu umunnyo sataunmo.

YEHEZKIEL 44:15

Tumpu Anu Matangkas na Kuasanyo notatae, “Tempo'nyo bansang Israel nohikumo mae Aku, aha to ima-imam Lewi anu lee' mae i Zadok na tinataap ahi' nontuluti apaa na anu pinalentahkon-Ku okalaja i Laigan-Ku. Kalana aijo' aha ahi' na tionyo mombau anu Ku palentahkon ka' toka mae i ahop-Ku monsombahkon lompo'nyo tiba baso' nu sinin na koloban.

YEHEZKIEL 44:8

Misa'mo posi aha na mokalaja pakalaja'an anu susi' iuno nu Laigan-Ku, panyo mianmo anu isalipu'an mae na nu pokalaja nu aha mombau palakaja'an aijo'.

YEHEZKIEL 48:11

Daerah anu pinosadiamo aijo' ahamo to ima-imam na tumpunyo anu tulunan mae i Zadok. Aha tinulu-tulutanmo na nombau apaa na anu pinalentahkon nu Tumpu ka' madi' susumo aha mian nu Lewi anu bubu' mae sa'a-sa'angu' na tulunan, nonombaumo dosa' suele tiba aha mian nu Israel sangga'atannyo.

NOMBILANGMO 1:53

Panyo to mia-mian nu Lewi tionyo ahi' mombau kemah kajojoongan nu aha montikubi Kemah-Ku. Aha tionyo ahi' monjagai da boli ko mian anu mongohani, sahingga monsaduakonmo Aku pusa ka' mohukumo aha mian Israel.”

NOMBILANGMO 16:46

lantas i Musa notataemo hi Harun, “Ala na tampat nu apu nu beleyum ka' isimo nu oba nu apu anu o ala aijo' i mezbah ka' opo'una'i kamangian. Boa lia-lia' aijo' hi aha mian ka' baumo na atulannyo da bau pongampuni dosa' nu aha. Lia-lia'! Tumpu talalomo hondo pinusa, ka' panyakit anu molele nontampu'unimo.”

NOMBILANGMO 16:6

Dodop daagi' subu beleyum ka' aha anu nonsangaja'imo beleyum tionyo ahi' mongala tampat nu apu, o isi nu oba ka' kamangian, ka' oboa i mezbah. Otoantoje pa' ihe na aiya hi kita anu pinile'anmo nu Tumpu. Sukupmo aijo', o aha mian nu Lewi!”

NOMBILANGMO 9:19

De kundom aijo' pin na jojoong mohohungi Kemah aijo' aha tataap ahi' montuluti atulan nu Tumpu ka' madi' mamba mompala'i tampat aijo'.

LUKAS 1:9

Ia tinompile'i ingundiakon sumo kabiasa'an anu nubau nu to ima-imam, Zakharia tiniju' da minsoop i Laigan nu Tumpu, ka' mompapui kamangian.