2 SAMUEL 20:6 - KITAB NU TUMPU ALLA LELE MA'IMAI'

⁶ Sahingga notataemo na i tomundo' hi Abisai, “I Seba aijo' lebemo monsusa'i mae kita molingkuduimo i Absalom. Kalana aijo' boa na suludadungku ka' loloi' na ia, da boli sampe nu kuasai na to kota-kota' anu ko bentengnyo ka' mopalaimo mompala'i kita.”

2 SAMUEL 20:6 ပူးပေါင်းရင်းမြစ်များ

2 SAMUEL 10:14

Salatan aha mian nu Amon nontoa suludadu nu Siria nopalaimo aha suele nopalaimo madi'mo nongewa i Abisai lantas ninsusule'mo i kota'. Noko lapas na nahampate tiba mian nu Amon, i Yoab ninsusule'mo i Yerusalem.

2 SAMUEL 11:11

Tinaaman i Uria, “Suludadu nu Israel tiba Yehuda hau-haunyo kiijo' mae mahampate taha-tahahumo ka' Peti' Palajanjian nu Tumpu na monsangalui aha; i Yoab talenga' mami tiba to sulu-suludadu anu matangkas na pangkatnyo binakemah'mo i padang. Toho' mule' na aku aiya minsusule' ilaiganku, ka' mongkaan ka' monginum ka' mule' hoyotmo tiba bengkele'ku? Kalana monsawan nyawa nu belento Tomundo' tiba mule' nyawangku, aku madi' mombau han aijo'!”

2 SAMUEL 18:12

Panyo tinaaman nu mian aijo', “Mau mule' aku binee'an mae 1.000 na doi salaka aku madi' mongka'oho' molaniti anak mo'ane nu tomundo'. Kami iwi-iwi' nohongomo apaa na anu pinalentahkonmo i tomundo' hi belento Tuan ka' hi Abisai ka' hi Itai da boli obelai na i Absalom olitau aijo' kalana monginau' i tomundo'.

2 SAMUEL 18:2

Lantas sinainyomo namba nahampate na aha, binaginyo totolu' na gombuannyo ka' anu nongkapalai toto sanggombu: i Yoab, i Abisai utus ise' i Yoab ka' i Itai anu nolengkat mae i Gat. I Daud notatae hi to sulu-suludadunyo haha aijo', “Aku suele mamba hingga-hinggat tiba belemiu.”

2 SAMUEL 19:7

Jadi tionyo ahi' belento Tomundo' mosabat ka' mompotenang kinyonyoa nu to sulu-suludadu nu belento Tomundo'. Aku basumpa i uno nu sanggo nu Tumpu de belento Tomundo' madi' mosabat mompahakabot aha, saba pihi uuka aiya mau pe'e ola samian madi'mo ko anu mongka'oho' monsangalui belento Tomundo'. Aijo' timbalimo sa'angu' na balaa' anu daka' hondo anu nu oa'i nu belento Tomundo' saidi' mae sidu-sidutu' i uno nu kantumuu'an.”

2 SAMUEL 2:18

Aha toto-totolu' na anak i Zeruya tempo'nyo aitu daagi aijo'mo: i Yoab, i Abisai, tiba i Asael. I Asael de mopadeka' malia' hondo sumo jonga,

2 SAMUEL 21:17

Panyo i Abisai anak i Zeruya tinokamo mae nontulungi i Daud. Lako'mo ilalubusannyo na mian daka-daka' hondo aijo' ka' pinateannyomo. Lapas aijo' suludadu i Daud nonsale'imo i Daud da bolimo daagi' mamba hingga-hinggat mahampate. “Belento Tomundo' bau kataha'imanan nu mian Israel boli-boli dumo kami madi'mo ko Tomundo'nyo,” na koonyo nu aha.

2 SAMUEL 23:18

Aha tolumpulu' na suludadu anu matangkas na pangkatnyo ka' anu tinalasanggomo aijo' sinanggohan mule' “Tridasawira”. Anu mongkapalai aha i Abisai utus ise' i Yoab anak i Zeruya. Ia toho'mo nompatei nu talombo'nyo tolu'atu na mian. Kalana aijo' sahingga ia tinalasanggomo. Panyo ia madi' lebe baani molingkudui “Triwira”.

2 SAMUEL 3:30

Sumo aijo' na i Yoab tiba i Abisai utusnyo ise' nombalosakonmo pusah nu aha hi Abner, kalana i Abner nompateimo i Asael utus ise' nu aha tempo'nyo nahampate kiijo' mae i Gibeon.

2 SAMUEL 3:39

Maumo aku aiya tomundo' anu pinile'anmo nu Tumpu Allah, panyo uuka aiya ku oa'i madi'mo ko kahosonan. To ana-anak i Zeruya haha aijo' talalo hondo buhingison. Madi'mo ku poko ala na mompalentah aha. O'amalakon da Tumpu mohukum mian anu toto ide-idek na kinyonyoanyo pokakana tiba apaa na anu lewa'mo binau nu aha!”

1 TOMU-TOMUNDO' 1:33

notataemo na i tomundo' hi aha, “Laga mae na to sulu-suludadungku anu matangkas na pangkatnyo ka' lako' tiba aha hi Salomo anaku momo'ane. Posake' mae na ia i bagalku, ka' boa na ia i mata nu uee Gihon.

1 TAWARIKH 11:20

Aha tolumpulu' na suludadu anu toto tangka-tangkas na pangkatnyo aijo' ka' talasanggo aijo' suele osanggohi “Tridasawira”. Aha kinapalaan i Abisai utus ise' i Yoab. Daagi' kino minsan ia nompatei nu talombo' aha 300 na mian, sahingga ia tinalasanggomo. Panyo ia madi' ahi' sumo ko baani nu aha Triwira aijo'.

1 TAWARIKH 18:12

I Abisai (sanggo nu tinanyo i Zeruya) nompatundu'mo ka' nompateimo 18.000 na mian nu Edom i Bangka'nyo nu Asin.

YEREMIA 8:14

“Kadaka' kita madi'mo noko ala nombau apa-apaa?” na koonyo nu mian anu palesayamo hi Tumpu Allah. “Imbo' kita' mopalaimo mamba ikota-kota' anu ko bentengnyo, bakas da kita silakaje kiijo' mae. Noko putuskanmo nu Tumpu Allah na kita tionyo ahi' silakamo. Binee'an-Nyomo na kita lasung da o'inum kalana kita binaladosa'mo hi Ia.

MARKUS 3:24

“De sa'angu' na negara mombagi-bagi i uno nu posa'angu'an ka' mompaha idek, negara aijo' madi' moko tahan.

1 SAMUEL 26:6

Lapas aijo' pinokilawamo i Daud hi Ahimelekh mian nu aha Het, ka' hi Abisai utus i Yoab (tina nu aha i Zeruya), “Ihe na baani minsoop tiba aku mokiijo' i uno nu kemah i Saul?” Tinaaman i Abisai, “Akumo!”