2 SAMUEL 17:14 - KITAB NU TUMPU ALLA LELE MA'IMAI'

¹⁴ Nohongo potatae aijo' i Absalom tiba aha mian nu Israel iwi-iwi' notataemo, “Pokinde' i Husai na lebe ma'ima' molingkudui pokinde' i Ahitofel.” Memang, Tumpumo na nontantukan da boli otuluti na pokinde' i Ahitofel anu ma'ima' aijo' da i Absalom mohumpakmo balaa'.

2 SAMUEL 17:14 ပူးပေါင်းရင်းမြစ်များ

KAJADIAN 32:28

Mian aijo' notataemo, “Sanggo nu beleyum misa'mo i Yakub. Beleyum nahaluku'mo tiba Tumpu Allah ka' tiba manusia, ka' beleyum na inguntungmo; kalana aitu sanggo nu beleyum i Israelmo”.

2 SAMUEL 15:31

Salatan pinoto'imo hi Daud na i Ahitofel suele naninggalumo ka' nosangaja'mo hi Absalom, i Daud binalado'amo sumo uuka, “O Tumpu de timbali da pokinde' i Ahitofel boli mingkaliangan!”

2 SAMUEL 15:34

Panyo beleyum montulungi mae ahi' aku, de beleyum minsusule'mo i kota' ka' basisik hi Absalom, nu poto'i sumo uuka: uuka aiya beleyum montulutimo ia ma'i-ma'ima' ka' mombaumo apa-apaa na anu opalentahkon susumo beleyum nontulutimo palentah nu tuumanyo u'utu mae. Tiba jalan anu sumo aijo' iwi-iwi' na pokinde' i Ahitofel madi'mo mingkaliangan.

2 SAMUEL 16:23

Tempo'nyo aitu iwi-iwi' na pokinde' i Ahitofel tinulutanmo sumomo ahi' potatae nu Tumpu Allah; mau i Daud maumo i Absalom nontulutimo sili na pokinde'nyo.

2 TAWARIKH 10:15

Apaa na anu pinoita nu mian da'isan madi' pinajuliannyo. Panyo aijo' memang katantuanmo nu Tumpu Allah. Apaa na anu pinoto'imo nu Tumpu hi Nabi Ahia mian nu Silo mongkona i Yerobeam anak i Nebat memang tionyo ahi jadi.

2 TAWARIKH 10:8

Panyo pokinde' nu to tu'a-tu'anyo haha aijo' madi' pinajulian i Rehabeam. Ola mule' ahi' ia namba hi to oli-olitau gondounyo ka' anu uuka aiya montulungi ia.

2 TAWARIKH 25:16

“Pomohokot”, na koonyo i Amazia, “De madi' opateimo mami na beleyum! Madi' toho' kami nohangkat beleyum da mompokinde'i i tomundo!” Sahingga nomohokotmo na nabi aijo', panyo ma'isa pe'e ia nomohokot ia daagi' notatae, “Uuka aiya sinumbu'kumo taalu' Tumpu Allah nontantukanmo da osilakaimo na belento Tomundo kalana belento Tomundo nombaumo han anu sumo aijo', ka' kalana belento Tomundo madi'mo nompajuli pokinde'ku.”

2 TAWARIKH 25:20

Panyo i Amazia, tomundo' nu Yehuda madi' montapali potatae i Yoas tomundo' nu Israel. Ka' Tumpu Allah memang kino kahanda'mo da i Amazia opatundu'mo kalana ia nonsombahmo patong nu pilogot nu aha mian Edom.

NEHEMIA 4:15

Aha to sampo-sampobali' mami nohongomo mae taalu' tanga'an nu aha ihongomo mami. Sahingga tinolosukapmo na pikilan nu aha tukoonyo nu aha tanga'an nu aha aijo', tinewa'mo nu Tumpu Allah. Lapas aijo' kami po'ule'mo nokalaja nombau pagan mesen aijo'.

AYUB 12:17

Po'ule'mo ingala-Nyo na kapandean bapikin hi to pama-pamalentah anu ko kakuasa-annyo, ka' to pola-polaya' pinotimbali-Nyomo da lewa' okokojoi.

MAZMUR 9:15

da ku puji' na Belento i ahop nu mian anu jojoong i Yerusalem. Aku montaligalaimo kalana lame'mo kalana Belento nomposalamatmo aku.

MAZMUR 9:16

To bansa-bansa anu madi' monsumbu' Belento nanabu'mo i bolo' anu pinosi kekemo nu aha; aha kinonamo nu so'o anu posi ahamo na nonta'an so'o.

NOSABATMO 9:16

Panyo belemiu Ku pobee' tumuu' da timbali Ku potoa na kakuasa'an-Ku hi belemiu, sahingga sanggong-Ku talasanggo i songko-songko na dunia.

AMSAL 19:21

Manusia talalo hondo manjoo' na tanga'an, panyo ola ahi' kaputusan nu Tumpu na jadi obau.

AMSAL 21:30

Madi' ko kapandean, ilimu', kabai kapandean mompopikilakon anu moko ala balatahan i ahop nu Tumpu.

YESAYA 8:10

Pombau tanga'an panyo iwi-iwi' aijo' madi' mingkaliangan. Pongala kaputusan panyo madi' kogunanyo, kalana Tumpu monsangalui kami.

MOHAANGI 3:37

De Tumpu madi' mongkahanda'i pa' apa-apaa tantu manusia madi' moko ala mombau apa-apaa mongkona han aijo'.

AMOS 9:3

De aha matisuluk i Bungkut nu Karmel, Ku lio na aha ka' Ku hakop. De aha matisuluk i apan nu ambai, Ku palentahje na tomundo nu ulo anu i ambai da mombutu' aha.

LUKAS 16:8

Saba' Tuan nu pongulus doi anu madi' hodi' aijo' nonpuji'mo pongulus aijo', kalana kapandean anu binaunyo aijo'; sabab to mia-mian i dunia aiya lebe pande mongatun ulusan nu aha molingkudui to mia-mian anu tumuu' i uno nu jingka.”

1 KORINTUS 3:19

Kalana anu osangka pande nu dunia, aijo' ponga' de Tumpu Allah na montoa. I uno nu Kitab nu Tumpu tinulismo, “Tumpu Allah mohakop to mia-mian pande i kapandean nu aha.”

PO'ULE' INGULIT 2:30

Panyo i Tomundo Sihon madi' nompobee' kita motulu i lipu' nu aha aijo'. Tumpu Allah nu belemiu nompotimbalimo ia da panggaga ka' mompagala da kita timbali mompatundu' ia. Da'erahnyo daagi' o jojoonginto sampe uuka aiya.

YOSUA 11:20

Pinobaanimo nu Tumpu na aha da jukut na mahampate tiba aha mian nu Israel da aha ohopu'imo ka' opateimo iwi-iwi' madi'mo daagi' ko ampunnyo susumo anu pinalentahkonmo nu Tumpu hi Musa.