2 SAMUEL 15:18 - KITAB NU TUMPU ALLA LELE MA'IMAI'

¹⁸ Iwi-iwi' na anu ko pangkatnyo mokalaja hi tomundo' tinuminjomo i sohipi'nyo salatan gombuan nu suludadu anu monjagai i tomundo' notulumo so' noliu-liu aha. Ka' suele ano atu na suludadu anu nombatukimo mae lengkat i Gat, tinuminjomo nojiji' i ahopnyo.

2 SAMUEL 15:18 ပူးပေါင်းရင်းမြစ်များ

2 SAMUEL 15:17

Salatan i tomundo' tiba iwi-iwi' na anu nonsangalui, ilumajangmo nompala'imo kota, aha daagi tinolotinjo koko laigan anu i pupuusnyomo nu kota.

2 SAMUEL 18:2

Lantas sinainyomo namba nahampate na aha, binaginyo totolu' na gombuannyo ka' anu nongkapalai toto sanggombu: i Yoab, i Abisai utus ise' i Yoab ka' i Itai anu nolengkat mae i Gat. I Daud notatae hi to sulu-suludadunyo haha aijo', “Aku suele mamba hingga-hinggat tiba belemiu.”

2 SAMUEL 20:23

Aiyamo na mian anu singkap ko ko pangkatnyo matangkas anu ihangkat i Daud. Talenga' nu aha Israel iwi-iwi'; i Yoab. Anu mongkapalai gombuan nu suludadu anu monjagai i Daud; i Benaya anak i Yoyada.

2 SAMUEL 20:7

Jadi i Abisai na nongkapalai gombuan nu suludadu anu nu toongi i Yoab tiba suludadu anu monjagai i tomundo' tiba iwi-iwi' na suludadu sangga'at nambamo lengkat i Yerusalem nololoi'mo i Seba.

2 SAMUEL 6:10

Kalana aijo' ia madi'mo nongka'oho' nomboa Peti' Palajanjian aijo' oboa i Yerusalem, panyo pino una'nyomo hi laigan i Obed-Edom mian nu Gat.

2 SAMUEL 8:18

Kapala nu anu monjagai i tomundo': i Benaya anak i Yoyada; To ima-imam ilaigan nu tomundo': to ana-anak i Daud.

1 TOMU-TOMUNDO' 1:38

Sahingga i Zadok, i Natan, i Benaya ka' suludadu anu monjagai tomundo' nompoitamo i Salomo da sumake'mo i bagal i tomundo' lantas sinangaluanmo nu aha namba i mata nu uee Gihon.

1 SAMUEL 23:13

Lantas i Daud tiba suludadunyo kila-kila 600 na mian, lia-lia' nompala'imo Kehila ka' nambamo lengkat i tampat sa'angu' mamba i tampat sangga'at. Salatan i hongomo i Saul na i Daud nambamo nompela'imo Kehila, ia madi'mo nonsidahakon namba nontumbuhi.

1 SAMUEL 25:13

“Takos na bajak nu belemiu totosamian!” na koonyo nu palentah i Daud. Malia-lia' na to sulu-suludadunyo nontuluti apaa na anu pinalentahkonmo i Daud aijo'. I Daud suele nontakosmo bajaknyo ka' nomboamo suludadunyo kila-kila aha 400 na mian panyo aha 200 na mian jinojoongmo monjagai pakakas nu aha.

1 SAMUEL 27:3

Sahingga jinojoongmo na ia tiba to sulu-suludadunyo i Gat, toto samian tibamo aha salaigan. I Daud nomboa ua'aha na bengkele'nyo aijo'mo i Ahinoam boune anu lengkat mae i Yizreel ka' i Abigail balu i Nabal boune anu lengkat mae i Karmel.

1 SAMUEL 27:4

Salatan ihongomo i Saul na i Daud nopalaimo nambamo i Gat ia madi'mo kinotanga'an mohakop i Daud.

1 SAMUEL 30:1

Inguansinaamo na i Daud tiba to sulu-suludadunyo tinokaje i kota' Ziklag. Salatan tinokamo ikiijo' tinokan nu aha mian nu Amalek nontumbuhimo mae sasu salatan lipu' nu aha Yehuda ka' nontumbuhimo mule' Ziklag. Madi' ko anu pinatean nu aha mau ola samian. Panyo pinapuanmo nu aha na kota' aijo' sampe noangot, lantas aha lau-lausmo namba ka' nomboamo to bou-boune, to ana-anak ka' mian sangga'at. Aha mule' nohakopmo bengkele' i Daud ua-ua aha i Ahinoam tiba i Abigail, tiba to ana-anaknyo ka' suele bengkele' tiba to ana-anak nu suludadunyo. I Daud tiba to sulu-suludadunyo sinusa'mo hondo, sahingga aha lewa'mo nohaangi ka' luusmo hondo na butong nu aha.

1 SAMUEL 30:14

Kami nontumbuhimo da'erah nu aha mian Kreti isasu salatan Yehuda tiba da'erah nu aha mian Kaleb, ka' pinapuanmo mami sampe noangot na kota' Ziklag.”

1 SAMUEL 30:9

Lantas nambamo na i Daud tiba to sulu-suludadunyo, aha ano atu. Salatan aha tinokamo i Kaunyo nu Besor i Daud tiba aha 400 na mian na namba; ka' aha anu 200 na mian sangga'at jinojoongmo ikiijo'. Kalana talalomo nalawe ka' madi'mo noko ala notaap i Kaunyo nu Besor.