2 PETRUS 1:16 - KITAB NU TUMPU ALLA LELE MA'IMAI'

¹⁶ Tempo'nyo kami nompoto'i hi belemiu i Yesus Kristus Tumpunto toka talasanggo hondo, kami madi' nohongo hi sisik anu toto bale-baleko' anu ola pohumpakan puji' nu mian. Katalasanggoan i Kristus aijo' tinoamo mami nu posi mata mami.

2 PETRUS 1:16 ပူးပေါင်းရင်းမြစ်များ

MALEAKHI 3:2

Tetapi ihe na moko ala totahan i sinaa nu Tumpu anu tokamo mae aijo' ka' mompotoamo butong-Nyo? Kalana Ia sumomo ahi' apu nu tukang anu lewa' monsopu' logam, ka' mule' sumomo ahi' sabung nu tukang baso'i hude.

MALEAKHI 4:5

Panyo ma'isa pe'e sinaanyo anu opalias ka' mule' anu okabuhuk aijo' titinantukan-Kumo tokamo mae, Ku palentah pe'e mamba hi belemiu na i Nabi Elia.

MATIUS 16:27

Madi'mo pin Anak nu Mian, mohingga-hinggatmo tiba to mala-malaikat-Nyo tokamo mae tiba kuasa nu Tuuma-Nyo. Tempo'nyo aitu Ia mombalosimo toto samian sitimbang tiba i palabuatannyo.

MATIUS 16:28

Da osumbu' anu daagi' aiya hi komiu, daagi' ko anu madi' silaka, de ma'isa pe'e montoa Anak nu Mian toka mae sumo Tomundo.”

MATIUS 17:1

Ilapas anon sinaa, i Yesus nomboamo i Petrus ka' i Yakobus tiba utusnyo i Yohanes, ola posi aha na nokiijo' i sa'angu' na bungkutnyo anu matangkas.

MATIUS 24:27

Sabab katokaan nu Anak nu Mian sumo sahaya nu kilat majingka lengkat i Kabete'an, ka' majingka toka i Kinsoban.

MATIUS 24:3

Lapas aitu, i Yesus namba i Bungkutnyo nu Zaitun, ka' hau-haunyo Ia suha-suhang, anu saja' mombatuki Ia tinoka ka' binisala tiba Ia mongkona posi aha. “Poto'i mae hi kami hipian na iwi-iwi' aijo' timbali,” koonyo nu aha hi Ia, “Apaa na bau pongoosian salaku tanda katokaanmo nu kita Tuuma, ka' sinaa imihinyomae?”

MATIUS 28:18

I Yesus nongohani aha ka' notatae, “Iwi-iwi' na kuasa i suluga' ka' i dunia aiya binee'mo hi beleng-Ku.

MARKUS 13:26

Tempo'nyo aijo' Anak nu Mian otoantoje na toka i uno nu sehu' tiba kuasanyo anu daka' ka' kamulia'annyo.

MARKUS 14:62

“Akumo na Ia,” tinaaman i Yesus, “ka' komiu iwi-iwi' montoaje Anak nu Mian sumuhang i sasu koanan nu Tumpu Anu Talalo Susi' ka' toka mae i uno nu sehu' lengkat i langit!”

LUKAS 1:2

Aha nontulis sosok tiba apaa na anu sinisikakon hi kita nu to mia-mian anu pinosi toanyo na hahan aijo' lengkat pe'e i momonanyo, ka' lapas mae nompolele lelenyo.

LUKAS 9:43

Iwi-iwi' na mian binangangmo na nontoa kuasa nu Tumpu anu daka' aijo'. Tempo'nyo to mia-mian daagi' kaho-kahonyo bangang montoa iwi-iwi' na anu binau-Nyo, i Yesus notataemo hi anu saja' mombatuki Ia.

YOHANES 1:14

Potatae nu Tumpu tinimbalimo mian, Ia jinojoongmo aiya hi kita, ka' kita nontoamo katalasanggoan-Nyo. Katalasanggoan-Nyo tinalimanyomo salaku anak sa'a-sa'angu'nyo nu Tuuma. Kalana Ia, sahingga kita nontoamo Tumpu ka' kalibosan-Nyo hi kita.

YOHANES 17:2

Kita Tuuma nombee'mo kuasa mompalentah iwi-iwi' na mian hi Anak, da Ia mombee'i kantumuu'an kopian ka' toka sidu-sidutu' hi iwi-iwi' na mian anu binee'mo nu Tuuma hi Ia.

ROMA 1:4

panyo salaku Tumpu Ia memang Anak nu Tumpu. Aijo' nyata' i kuasa anu madi' ko gampanyo kalana mau sinilakamo na Ia panyo po'ule' tinumuu'.

1 KORINTUS 1:17

I Kristus nonsai aku misa' da mompalamandikan mian, panyo mombebakon Lele Ma'ima' lengkat mae hi Tumpu; ka' saja' mule' kubau madi' mompake susumo kapandean nu mian basisik, da kuasa nu kasilakan i Kristus aita' i kau' salib madi' palasuma.

1 KORINTUS 1:23

Panyo kita aiya ola mompolele i Kristus anu sinilakamo sinalib. Lele aijo' momposumpu kinyonyoa nu mian Yahudi, ka' osangka palasuma nu to mia-mian misa' Yahudi. Ka' mian anu misa' Yahudi monsangka aijo' sa'angu' na kaponga'an.

1 KORINTUS 1:7

sahingga sa'angu' pe'e na balakat madi' maga'a hi komiu, hau-haunyo komiu montanda'i Tumpunto i Yesus Kristus toka ka' nutoa nu mian iwi-iwi'.

1 KORINTUS 2:1

To Utu-utus! Tempo'nyo aku tinoka hi komiu ka' nompolele hi komiu mongkona tanga'an nu Tumpu anu ma'isa sinumbu' nu dunia aiya, aku madi' mompake kapandean nu dunia aiya, kabai basisik nu potatae anu toto ima-ima' anu ola momposanang bihing.

1 KORINTUS 2:4

Lele anu pinotokakon hi komiu madi' pinotokakonku nu potatae anu mompagala mongendei susumo kapandean nu dunia. Aku nompotokakon aijo' tiba jalan momponyata', saba' Roh nu Tumpu Allah ko kuasanyo.

2 KORINTUS 2:17

Kami madi' sumo mian da'isan anu mompotimbali lele lengkat mae hi Tumpu ola sumo balu-balukon. Pongka'oho' mami anu sahondo-hondonyo, kalana kami binee'anmo kalaja nu Tumpu. Ka' Tumpu na nosi toamo saba' kami nompotokamo lele aijo' susumo to posa-posaihon i Kristus.

2 KORINTUS 4:2

Kami madi' mompake hahan anu oposuluk ka' mongambangi. Kami madi' mongka'oho' mokalaja mongakali kabai monggeo-geo'akon potatae nu Tumpu. Hodi-hodi' na kinyonyoa mami mohongo-hongo apaa na koonyo nu Tumpu mombatuki pongka'oho'-Nyo. Mokonyo aijo' o'inde'i mami da mian iwi-iwi' mompopikilakon kami ima-ima' i uno nu kinyonyoanyo.

EFESUS 4:14

Sahingga kita madi'mo po'ule' mingana-anak anu sumo nupuuhi nu mombun oboa mokiijo' mo'uuka mae nu ngangahan nu solok nu pangajalan lengkat hi to mia-mian anu pande na mongakali. Aha mompotimbali mian ponga' nu kapandean nu aha mongakali.

FILIPI 3:21

Butongto anu madi' mahoson ka' anu timbali mohonsu aiya nubali'ije i Kristus timbali sumo butong-Nyo anu talasanggo. Ia timbali moko ala mombau aijo' kalana Ia daagi' ko kuasa mompatundu' iwi-iwi na apaa.

1 TESALONIKA 2:19

Komiumo na anu otaha'imani mami ka' okalame'akon mami. Kalana de Tumpu Yesus tokamo, ka' kita mangadapmo hi Ia, saba' komiumo na anu timbali obuulakon mami!

2 TESALONIKA 2:9

Mian anu Ma'idek aijo' tokamo mae nu sa'angu' na kakuasa'an anu daka' lengkat hi Ibilis. Ia mompodaagi' iwi-iwi' na ngahan anu okabangangi ka' hahan anu madi' ko gampanyo, anu saja' mombaleko'i ka' mongakali.

1 TIMOTIUS 1:4

Taloakon hi aha da bolimo daagi' mompajuli to sisi-sisik anu baleko', ka' to sisi-sisik anu pinolengkatannyo madi' ko kamingkotannyo. Iwi-iwi' aijo' ola saja' molubatakon painggagan, ka' madi' mompopodaka' makisut nu Tumpu anu ola timbali osumbu' de palesayamo hi Ia.

1 TIMOTIUS 4:7

Patikojo'oni na to sisi-sisik nu tominuat anu madi' ko gunanyo. Opobiasa ahi' o'ajan na butongum i kantumuu'an mongka'ima'i mogreja.

TITUS 1:14

ka' madi'mo daagi' montoongi i sisik nu aha Yahudi anu madi' totu'u kabai atu-atulan anu binau nu to mia-mian anu madi' montalima pangajalan anu totu'u aijo'.

2 PETRUS 2:3

Kalana aha mangoa, sahingga to gulu-gulu' anu madi' totu'u aijo' nonsisikakonmo hi belemiu to sisi-sisik anu o posi kalang da bau pohumpakan ka'untungan hi belemiu. Panyo anu momputusi monabu'akonmo hukuman hi aha pininmo na pinosadia, ka' kabinasa'an anu tinantukanmo bau bagi nu aha hau-haunyomo montanda'imo aha.

1 YOHANES 4:14

Kami nontoamo Anak nu Tumpu, ka' kami nompolelemo Ia, anu sinai mae nu Tuuma da timbali Tomundo anu Momposalamat dunia aiya.

YUDAS 1:14

I Henokh, lee'mo ko popitu'nyo lengkat mae hi Adam, naipuan mae toho'mo nonsisikakon kantumuu'an nu mian haha aijo'. I Henokh notatae, “Toa, Tumpu tokaje mae tiba to mala-malaikatnyo anu susi' i mada-madalannyo

ANU PINOTO'I HI YOHANES 1:7

Toa, Ia toka mae nu saput nu kundom! Iwi-iwi' na mian montoa Ia, ka' suele aha anu nonjalo'mo Ia. Iwi-iwi' na bansa i dunia mohangi Ia. Memang, totu-totu'u! Amin!