1 YOHANES 3:12 - KITAB NU TUMPU ALLA LELE MA'IMAI'

¹² Boli kita sumo i Kain, anu tinimbalimo anak nu Ibilis ka' nompateimo posi Utusnyo. Apaa na sababnyo i Kain nompateimo Utusnyo? Kalana hahan anu binaunyomo aijo' sala', panyo hahan anu binaumo nu Utusnyo aijo' totu'u.

1 YOHANES 3:12 ပူးပေါင်းရင်းမြစ်များ

KAJADIAN 4:25

I Adam ka' bengkele'nyo nohumpak mule' samian na anak mo' ane. Notatae na i Hawa, “Tumpu Allah nombee'imo mae aku anak mo' ane bau pombolosi i Habel, anu pinateanmo i Kain.” Kalana aijo' sinanggohannyomo na anak aijo' i Set.

2 SAMUEL 13:22

I Amnon kina'idekanmo hondo i Absalom ka' madi'mo nu samposisik na ia, kalana ia nompakisamo noduhus tiba i Tamar utus ise'nyo aijo'.

MAZMUR 37:12

Mian anu ma'idek na palabuatannyo saja' montanga'i anu ma'idek hi aha mian anu ma'ima na palabuatannyo, ka' montoa ia kinyonyoa mongka'ideki.

MAZMUR 38:20

To mia-mian anu mongewa mae aku da'isan ka' to hoso-hoson, aha mongka'ideki mae jalan nu kantumuu'anku.

AMSAL 27:4

Tambuha' aijo' buhingison hondo ka mohansuni, panyo mongahopi mian minsihip ihe na moko tahan?

AMSAL 29:10

Mian anu madi'tageo' na kinyonyoanyo nuka'ideki nu mian anu ka'oho mompatei, panyo nusangaja'i nu mian anu manonong.

AMSAL 29:27

Mian anu manonong madi' mongka'ima'i mian anu ma'idek na kinyonyoanyo; mian anu ma'idek na kinyonyoanyo mongka'ideki mian anu manonong.

MATIUS 13:19

Bine' anu nanabu' i jalan sumomo to mia-mian mohongo lele mongkona mosia na Tumpu mompalentah, panyo madi' mangalati'. Anu Ma'idek aijo' tinoka ka' nongagoi apaa na anu daagi' pinoto'i i uno nu kinyonyoa nu aha.

MATIUS 13:38

Ale' aijo', aiyamo dunia aiya. Bine' anu ma'ima', aijo'mo to mia-mian anu tinimbalimo mian anu palesayamo hi Tumpu. To pada-padang aijo'mo to mia-mian anu mosambiha' hi Ibilis.

MATIUS 23:35

Kalana aijo' komiu o hukum, kalana nompateimo mian iwi-iwi' anu madi' ko sala'nyo – lengkat pe'e nompatei i Habel anu madi' ko sala'nyo, tinoka i pinompateian i Zakharia anak i Berikia, anu pinatean miu i olot nu Laigan nu Tumpu, ka' i tampat ponsombahkonan.

MATIUS 27:23

“Panyo apaa na anu ma'idek binau-Nyo?” pinokilawa i Pilatus. Lantas aha noloboo' lebe mahoson mule', “Salibmo na Ia!”

MATIUS 5:37

Taloakonmo, ‘Ii'’ kabai ‘Madi'’ – molabii anu sumo aijo' nyata' nolengkat mae i Ibilis.”

LUKAS 11:51

salatanmo pe'e i Habel pinatean sampe i Zakharia pinatean, anu tinimbali i olot nu mezbah ka' Laigan nu Tumpu. Palesayamo: To mia-mian tempo' aiya, tantu o hukum kalana iwi-iwi' sinumo aijo'mo.

YOHANES 10:32

Panyo i Yesus notatae hi aha, “Komiu nontoamo Aku nombau manjoo' na hia anu ma'ima', anu pinalentahkon nu Tuuma hi beleng-Ku. Iwi-iwi' na hia aijo', iya na anu monsaduakon komiu mongka'oho'mo mombunu' Aku nu batu?”

YOHANES 8:40

Aku mompotokakon hi komiu kahondoan anu ihongong-Kumo lengkat mae hi Tumpu, panyo komiu kahanda'mo mompatei Aku. I Abraham madi' nombau sumo aijo'!

YOHANES 8:41

Komiu mombau apaa na anu binau nu posi tuuma miu.” Tinaaman nu aha, “Kami misa' ana-anak bule. Tuuma mami ola sa'angu', aijo'mo samata-mata Tumpu.”

SISIKON NU TO RASUL-RASUL 7:52

Apaa daagi' ko nabi anu madi' sinakisa nu mompolee' miu? Aha nompateimo to posa-posaihon nu Tumpu anu u'utu pe'e mae nombebakonmo tukoonyo. Posaihon nu Tumpu anu totu'u, tokaje mae. Ka' uuka aiya komiu nongkabisa'imo ka' nompateimo Posaihon nu Tumpu aijo'.

1 TESALONIKA 2:14

To utu-utus, han anu ingoa'anmo miu ingoa'anmo suele nu jama'at nu Tumpu i Yudea anu tinimbalimo i Kristus Yesus na tumpu-Nyo. Komiu nongoa'i kasansala'an lengkat i posi bansa miu, sumomo anu ingoa'an nu to jama-jama'at nu Tumpu i Yudea, aijo' lengkat mae hi to mia-mian nu Yahudi.

IBRANI 11:4

Kalana bala'iman, sahingga i Habel nonsombahkonmo hi Tumpu Allah koloban anu lebe ma'ima' molingkudui koloban i Kain. Kalana ia bala'iman sumo aijo', i Habel tinalimamo nu Tumpu salaku mian anu ma'ima', kalana inyata'mo na Tumpu nontalimamo anu sinombahkonnyo. I Habel sinilakamo, panyo kalana ia bala'iman, sahingga ia daagi' basisik sampe uuka aiya.

IBRANI 12:24

Komiu tokamo mangadap hi Yesus anu Nonjambatanimo da montalimamo palajanjian anu sala'je aijo'; komiu mangadapmo i baso' anu pinipi'akonmo, anu mompokopianimo hahan da lebe ma'ima' molingkuduimo anu pinokopiananmo nu baso' i Habel aijo'.

1 PETRUS 4:4

Tempo' uuka mian anu madi' monsumbu' Tumpu, mongkabangangi kalana komiu madi'mo mombatuki tumuu' sumo aha, mombau dosa' madi' ko batasnyo. Mokonyo aijo' aha monjojoa belemiu.

1 YOHANES 3:8

Panyo mian anu sabau-baunyo dosa' atina'mo na anak nu Ibilis, kalana Ibilis binaladosa' salatanmo pe'e momonanyo. Kalana han aijo' sahingga Anak nu Tumpu tinoka mae aijo'mo da monggalisi pakalaja'an nu Ibilis.

YUDAS 1:11

Silaka na aha! Kalana aha nombatukimo jalan anu tinuluanmo i Kain. Da mohumpak doi, aha nontuamo butong nu aha i uno nu kasala'an, pokakana sumo i Bileam. Ka' aha mule' pinateanmo kalana notomuhukmo susumo i Korah.

ANU PINOTO'I HI YOHANES 17:6

Lantas tinoangkumo taalu' boune aijo' nalangumo nu baso' nu mian anu pinalesayamo hi Tumpu ka' baso' nu to mia-mian anu pinateanmo kalana tulu-tulutan hi Yesus. Salatan aku nontoamo boune aijo', aku kino banga-bangangmo.