1 YOHANES 2:18 - KITAB NU TUMPU ALLA LELE MA'IMAI'

¹⁸ To ana-anakku, kakiamatan ohanimo! Pinoko poto'imo hi komiu i momonanyo tukoonyo Sampo Bali' i Kristus tokamo saidi' mae; ka' tempo' uuka aiya i lubatmo da'isan na mian anu monsampo bali' i Kristus. Aijo'mo na tandanyo saba' kakiamatan malia'mo toka.

1 YOHANES 2:18 ပူးပေါင်းရင်းမြစ်များ

MATIUS 24:11

Da'isan na to nabi-nabi anu madi' totu'u toka ka' mongakali da'isan na mian.

MATIUS 24:24

Kalana tokaje mae na anu momposalamat padahan anu madi' totu'u, ka' to nabi-nabi anu madi' totu'u. Aha mombau palabuatan-palabuatan anu o palias, ka' hahan anu okabangangi bau pongakali, de timbali, mau mian anu palesayamo hi Tumpu suele.

MATIUS 24:5

Kalana da'isan na mian anu toka mae mongala sanggong-Ku ka' motatae, ‘Akumo na Tomundo anu Momposalamat!’ Da'isan na mian nu akali nu aha.

MARKUS 13:6

Da'isan na mian anu tokaje mae mompake sanggong-Ku ka' notatae, ‘Akumo aiya na Ia!’ lantas mongakali da'isan na mian.

YOHANES 21:5

I Yesus notatae hi aha, “Ana-anak, pa' komiu ko ikan?” “I madi',” na koonyo nu aha.

ROMA 13:11

Gampanyo nu anu osumbu' miu iwi-iwi' aijo', aijo'mo tempo' uuka tempo'nyomo komiu mobula, bolimo hoyot. Kalana kita oposalamat ko oha-ohaninyomo na tempo'nyo uuka aiya, misa' sumo sala'je kita nontampu'uni pinalesaya.

ROMA 13:12

Pihi ko mingko-mingkotnyomo; ka' daagi' sasaidi' majingkamo. Jadi, sahanyo kita bolimo solaa' mombau anu i uno nu pintung. Kita tionyo montoukaimo butongto nu toongon ponjagai butong aijo'mo jingka.

IBRANI 1:2

Panyo tempo' uuka Ia basisik hi kita, Anak-Nyomo na mompotoka hi kita. Anak-Nyomo aiya na nombau pakalaja'an nu Tumpu nompotimbali dunia aiya songko-songko. Ka' suele Tumpu nontantukanmo tukoonyo Anak-Nyomo aiya na mohaki iwi-iwi'.

1 PETRUS 1:20

I Kristus pinile'anmo nu Tumpu ma'isa pe'e dunia aiya pinotimbali. Ka' i sinaa aiya tempo' nu mongahopimo kakiamatan, Ia tinokamo i dunia da belemiu oposalamat.

1 PETRUS 1:5

Iwi-iwi' aijo' bau bagi miu, kalana komiu pinalesayamo hi Tumpu. Jadi komiu o jagai nu kuasa nu Tumpu da komiu mohumpak kasalamatan anu oponyata'je toka i tempo'nyo saidi' mae.

1 PETRUS 4:7

Iwi-iwi na apaa mongahopi ka'ahenannyo, mokonyo aijo' okuasai ahi' na butong miu ka' balajaga-jaga, da belemiu moko ala timbali balado'a.

2 PETRUS 2:1

Tempo'nyo naipuan mae mian anu palesayamo hi Tumpu itina' hi komiu ko anumo tinimbali to nabi-nabi anu madi' totu'u. Sumo aijo' mule' itina' hi komiu saidi' mae ko anumo timbali to gulu-gulu' anu madi' totu'u. Aha mompogulu' to panga-pangajalan anu madi' totu'u, anu mombinasai mian. Ka' aha saidi' mae mompojalomo Anu Matangkas na kuasanyo anu nompobebasmo aha. Tiba jalan anu sumo aijo' aha mompotokamo kasilaka'an i posi butong, anu madi'mo pin nuta'upmo nu aha.

2 PETRUS 3:3

Momonanyo belemiu tionyo ahi' monsumbu' saba' sinaa anu i mihinyo mae, tokamo na to mia-mian anu kantumuu'annyo kinuasanmo nu napisu nu aha. Aha na saidi' mae monjojoamo belemiu

1 YOHANES 2:22

Anu baleko' atina'mo mian anu motataemo tukoonyo i Yesus misa' Tomundo anu Momposalamat anu Jinanji'mo nu Tumpu. Mian aijo' Sampo Bali' i Kristus; ia madi' mongakui Tuuma kabai Anak.

1 YOHANES 4:1

To Utu-utus anu okanonongi! Boli palesaya hi mian iwi-iwi' anu mangaku ko Roh nu Tumpu, panyo o uji' pe'e na aha da osumbu' pa' roh anu daagi' hi aha aijo' nolengkat mae hi Tumpu Allah kabai misa'. Kalana nabi anu madi' totu'u nanjoo'mo na namba noyaya.

1 YOHANES 4:3

Panyo mian anu madi' mongakui han aijo' mongkona i Yesus, madi' ko Roh nu Tumpu. Mian aijo' ko roh lengkat mae hi Sampo Bali' i Kristus. Kita Utus nohongomo tukoonyo Roh aijo' tokamo mae, ka' tempo' uuka ia, aiyamo i uno nu dunia aiya.

2 YOHANES 1:7

Manjoo'mo na anu baleko' nololomo i songko-songko na dunia. Ahamo atina' na to mia-mian anu madi' mompalesaya i Yesus Kristus anu tinokamo i dunia sumo samian na mian. Mian anu sumo aijo' atina'mo na anu mongakali ka' Sampo Bali' i Kristus.

YUDAS 1:18

Aha nompoto'imo momona hi komiu tukoonyo de malia'mo toka na sinaa kakiamatan lubatmo na to mia-mian anu monjojoa komiu, aijo'mo to mia-mian anu tumuu' montuluti apaa na anu nu kamilui nu aha sahingga monsaduakonmo anu moko baladosa'.