1 TOMU-TOMUNDO' 17:12 - KITAB NU TUMPU ALLA LELE MA'IMAI'

¹² Tinaaman nu balu aijo', “Jumo nu sanggo nu Tumpu anu tumuu', Tumpu Allah anu osombah nu belento Tuuma, aku basumpa', totu-totu'u aku madi'mo ko roti. Ola labu nu tiligu na daagi' hi belengku, me sangkakup kiijo' i mangko'. Ka' lanya' nu Zaitun sangkiding kiijo' i boton. Aku aiya mongala kau' anu oposun bau pongunjang tiligu anu me ise-ise' kiijo', da okaan nu kami moto anak. Me aijo' na anu okaan mami, madi'mo ko anu okaan sangga'at; lapas aijo' kami montanda'imo silaka.”

1 TOMU-TOMUNDO' 17:12 ပူးပေါင်းရင်းမြစ်များ

KAJADIAN 21:15

Salatan uee anu binau mantunyo i ningkotmo, i Hagar nompo'una'mo anaknyo ipatuu nu kumbung.

KAJADIAN 21:16

Lantas sinumuhangmo kila-kila sa'atu na meten lengkat itampat aijo'. Ia notatae i uno nu kinyonyoanyo, “Aku madi' moko ala montoa anakku silaka.” Lantas ia ihumangmo.

2 SAMUEL 15:21

Panyo tinaaman i Itai, “Belento Anu Talasanggo, i uno nu sanggo nu anu tumuu' ka' kalana nyawa nu belento Tuanku, maumo pa' moya na belento Tuanku mamba, ku batuki, mau mule' mongahopimo kapaten.”

1 TOMU-TOMUNDO' 17:1

Daagi' ko samian na nabi, sanggonyo i Elia. Ia mian lengkat mae i Tisbe, sa'angu' na kota' i da'erah Gilead. Daagi' kino sansinaan ia tinokamo hi Tomundo' Ahab ka' notatae, “Jumo nu sanggo nu Tumpu anu tumuu' Tumpu Allah anu osombah nu mian Israel ka' anu kuku hongo na palentahnyo, ku poto'i hi belento Tuan, ohua' kabai totolu' na taun anu aiya mae i ahop madi'mo daagi' ko dondu'ok kabai ujan mau ola sangkiding, de ku poto'imo, yo atina' daagi'mo.”

1 TOMU-TOMUNDO' 17:11

Hau-haunyo balu aijo' i lumajangmo mongalapi uee, i Elia notataemo daka-daka' “O pontina'on, ka' suele roti boai mae sangkiding.”

1 TOMU-TOMUNDO' 17:13

Boli bata-bata, “Pontina'on!” na koonyo i Elia hi ia, “Baumo Pontina'on na anu o kaan bau bagi nu belento Pontina'on ka' mule' bau bagi nu anak nu belento Pontina'on. Panyo' anu momonanyo pe'e obaui aku, sa'angu' na roti ise-ise', te labu ka' lanya' ititina' na obau ka' boa mae hi belengku.

YEREMIA 14:18

De aku mamba i padang tampat anu loas, tinoangkumo na bangke' nu anu sinilakamo ipahampatean. I uno nu kota' tinoangkumo na kasansala'an, nu to mia-mian anu mompai patemo nu ohop. Nabi tiba imam mompojalan kawajibannyo madi' nu sumbu' pa apaa na anu nu bau.”

YEREMIA 4:2

De belemiu basumpa' i uno nu sanggong-Ku ka' belemiu tumuu' ahi' sahondo-hondonyo, adin ka' madi' mombau kasala'an, saba' iwi-iwi' na bansa momoitamo mae hi belengku da Ku balakati na aha, ka' aha mompuji'mo mae Aku.”

YEREMIA 5:2

Belemiu natataemo, koonyo nu belemiu nonsombahmo Tumpu pada hal tanga'an nu belemiu na madi' ahi' sumo aijo'.

MOHAANGI 4:9

Aha sinansala'mo ka' sinilaka kinomayu-mayu'annyoje kalana madi' hondo-hondo ko anu okaan; anu sinilaka i pahampatean, lebe ko untungnyo tiba anu sinilaka nu ohop.

MATIUS 26:7

samian na boune tinoka hi Yesus. Ia nomboa sa'angu' na boton pualam ko isinyo minya-minya' manohong ka' mahan! Tempo'nyo i Yesus hau-haunyo suha-suhang mongkaan, boune aijo' nondudu'imo nu minya-minya' i buan nu ubak i Yesus.

1 SAMUEL 14:39

Aku bajanji' tiba sanggo nu Tumpu anu tumuu', anu nombee'imo ka untungan nahampate hi aha mian nu Israel, saba' mian anu kosala'nyo tionyo ahi' ohukum mate, mau mule' ia i Yonatan anaku momo'ane.” Panyo mau pe'e samian madi' ko anu nontaami ia.

1 SAMUEL 14:45

Panyo mian da'isan notataemo hi Saul, “Te toho' mule' i Yonatan na mohumpak hukuman osilakai? Yo aitu iamo na nomboa mae ka'untungan nahampate anu daka' aiya? Madi'! Kami bajanji' tiba sanggo nu Tumpu anu tumuu', saba i Yonatan madi' timbali mohudu' na ubaknyo mau pe'e ola sahamba. Kalana ola samata-mata ola Tumpu na nontulungi sahingga ia nohumpakmo ka'untungan na nahampate sinaa aiya.” Sumo aijo' na i Yonatan pinotumuu' nu aha mian da'isan da boli nohumpak hukuman o silakai.

1 SAMUEL 20:21

Lantas kupokaumo na posaihonku montoluki hihis haha aijo', ka' de kupoto'i hi ia, 'Ee hihisnyo aijo' ohani hondo aiya mae; lako' mae toluki,' aijo' alati'nyo beleyum madi' opoposia ka' timbalimo mosabat. Aku basumpa' hi sanggo nu Tumpu anu tumuu' saba' beleyum madi' ko balaa' apa-apaa anu montokai mae.

1 SAMUEL 20:3

Tinaaman i Daud, “Tuuma nu beleyum nonsumbu'mo hondo saba' beleyum mongkalibosi hondo aku. Jadi tantu ia madi' mongka'oho' mompoto'i han aijo' hi beleyum da beleyum boli susa' na kinyonyoa. Maumo pa' mosia, Tumpu anu tumuu' na monsumbu' kantumuu'anku aiya totu-totu'u sumomo nggalau' i tuntungnyo nu tanduk!”

1 SAMUEL 25:26

Ka' uuka aiya o Tuanku, i uno nu sanggo nu Tumpu anu tumuu', aku basumpa' da uka' da mian iwi-iwi' anu monsampo bali' belento Tuanku ka' toto samian na anu ko kahanda' mompatei belento Tuanku pokakanamo susumo uka' i Nabal.

1 SAMUEL 26:10

I uno nu sanggo nu Tumpu anu tumuu' ku sumpa'akon saba' Tumpuje na mompatei i Saul de ukunnyo tokamo mae kabai de ia matemo i uno nu pahampatean.