1 TIMOTIUS 5:17 - KITAB NU TUMPU ALLA LELE MA'IMAI'

¹⁷ Polaya' nu jama'at anu mompojalan kalaja ma'i-ma'ima', patut obee'i bau ponginau' kalajanyo pinduan lipat, lebe-lebe aha anu make-makeke na mompogreja ka' mongajan.

1 TIMOTIUS 5:17 ပူးပေါင်းရင်းမြစ်များ

2 TOMU-TOMUNDO' 2:9

Salatan tinokamo aijo' mae i santoanyo, pinoto'imo i Elia hi Elisa, “Poitamo mae pa' apaa na anu nu kahanda'i hi belengku, da ma'isa pe'e nuhangkat nu Tumpu ka' mompala'imo beleyum!” Tinaaman i Elisa “Bee'mo mae na kuasa nu belento Tuumangku hi belengku, da aku moko ala mombolosakon belento Tuumangku.”

YESAYA 40:2

Potenangmo nakinyonyoa nu aha Yerusalem, poto'i taalu' tobotuanan imadi'anmo. Kasala'an nu aha ingampunan-Kumo, iwi-iwi na dosa nu aha ihukum-Kumo lipat pinduan.”

YEREMIA 16:18

Dosa' tiba palabuatan ma'idek nu aha Ku balosakonmo nu hukuman pinduan lipat, kalana aha nohenyuimo lipu'-Ku nu pilogot manjoo' hondo. Pilogot haha aijo' madi' konyawanyo sumomo ahi' bangke' nu mian anu sinilakamo.”

YEREMIA 17:18

O'amalakon da anu mololoi' mae ka' anu momposansala' mae aku, nu popo ambangmo nu Belento ka' nu popo buhukmo hondo nu Belento. Panyo boli ahi' mombau sumo aijo' hi belengku, o Tumpu. Potokamo mae na balaa' hi aha sampe aha hansunmo ahi' silaka iwi-iwi.

ZAKHARIA 9:12

Pinsusule'mo mae o belemiu to mia-mian anu bibinoamo ka' pinojoongmo i sa'angu na tampat, tempo uuka belemiu montaha'imanimo. Pinsusule'mo mae i tampat anu timbali monjagai belemiu. Aku tataap mombalakatimo belemiu. Potombihing mae: Pinduan ohu'a na belemiu Ku balakati kalana iwi-iwi na kasansala'an anu ingoa'anmo nu belemiu.

NOMBILANGMO 18:31

Labinyo aijo' timbalimo okaan nu belemiu iyaya mae hingga-hinggat tiba belemiu sa'anakan, salaku tambonyo belemiu mokalaja i Kemah nu Tumpu.

MATIUS 24:25

Jadi, o inau'! Aku mompoto'imo hi komiu i moonanyo ma'isa pe'e han aijo' jadi saidi' mae.

LUKAS 10:7

Jojoong ola i sa'angu' na laigan. Talima apaa na anu nubagiakon i kiijo' hi komiu, kalana mian mokalaja ko hak montalima tamboonyo. Bolimo molali-lalin lengkat i laigan sa'angu' mamba i laigan sangga'at.

LUKAS 12:42

Tumpu nontaami, “Ihe na posaihon anu mohongo-hongo ka' pande, sahingga i hangkat nu tuannyo timbali kapala nu to posa-posaihon sangga'at da ia mombee'i aha mongkaan toka i tempo'nyo?

YOHANES 4:38

Aku monsai komiu mamba mompadak i ale' anu madi' kinalaja miu; mian sangga'at nokalajamo kiijo' mae, lantas komiu na montalima ka'untungannyo i kalaja nu aha.”

SISIKON NU TO RASUL-RASUL 11:30

Posa'angu'an nu tanga'an aijo' binaumo, lantas i Barnabas ka' i Saulus sinai da momboa pontulungi aijo' hi to pola-polaya' nu jama'at.

SISIKON NU TO RASUL-RASUL 20:35

I iwi-iwi' na han, aku nombee'imo sonto' hi komiu saba' kalana mokalaja totu-totu'u montulungimo to mia-mian anu madi' mahoson. Kalana tionyo ahi' o inau'to apaa na anu pinosi taloakonmo i Tumpu Yesus, ‘Lebe sanang na mombee'i ka' de mule' ola montalima.’ ”

SISIKON NU TO RASUL-RASUL 28:10

Aha nombee'i kami manjoo' na palasen, ka' salatan kami kahanda'mo talabut, aha nomboai kami nokiijo' i kapan iwi-iwi' na anu opalalui mami i jalan.

ROMA 12:8

Mian anu ko balakat mongkakeha'i mian sangga'at, tionyo totu-totu'u mongkakeha'i mian sangga'at. Mian anu ko balakat mombee'i mian sangga'at apaa na anu daagi' hi ia, tionyo obau na aijo' nu kinyonyoa manonong ka' pantas. Mian anu ko balakat mongatun, tionyo totu-totu'u mongatun. Mian anu ko balakat mompotoa kalibosan hi mian sangga'at, tionyo obau nu kinyonyoa sanang.

ROMA 15:27

Tiba kinyonyoa sanang aha nomputusimo da mombau sumo aijo'. Memang konanyomo na aha patut montulungi to utu-utus anu kasiasi i Yerusalem aijo'; kalana mianmo nu Yahudi haha aijo', sahingga mian anu misa' Yahudi nohumpakmo to bala-balakat anu lengkat mae hi Tumpu. Jadi to mia-mian anu misa' Yahudi aijo' patut suele montulungi to mia-mian Yahudi nu to bala-balakat, susumo lapangnyo to bala-balang.

ROMA 16:12

Salan do'angku hi Trifena tiba hi Trifosa anu nake-nakeke na nokalaja montuluti palentah nu Tumpu, ka' hi Persis anu ku kukalibosi. Ia suele nakekemo na nokalaja kalana kapentingan nu Tumpu.

1 KORINTUS 15:10

Panyo kalana balakat nu Tumpu aku tinimbalimo susumo tinuu'ku uuka aiya. Ka' madi' pinalasuma na Tumpu nongampunimo aku. Pakalaus aku ahi' na mokalaja lebe makeke molingkudui rasul kanjoo'annyo sangga'at. Panyo sabenannyo aijo' misa' usahangku; aijo' usaha nu Tumpu anu mongkalibosi aku ka' mokalaja hingga-hinggat ka' aku.

1 KORINTUS 16:16

Totu-totu'u kupoto'i da komiu mohongo-hongo pongatun nu to mia-mian anu sumo aijo', tiba to mia-mian sangga'at anu mompahakalaja mompolele Lele Ma'ima' ka' mongatun hingga-hinggat tiba aha.

1 KORINTUS 3:9

Kami to mia-mian anu hingga-hinggat mombau kalaja anu nu Tumpu; ka' komiu aijo' sumomo ale' nu Tumpu. To Utu-utus suele sumo gudang nu Tumpu.

2 KORINTUS 6:1

Kalana kami mokalaja hingga-hinggat tiba Tumpu, mokonyo aijo' opoita mami sabole-bole boli komiu monsia-siakon ka'ima'an nu kinyonyoa nu Tumpu aijo'.

GALATIA 6:6

Mian anu nontalimamo pangajalan i Kristus, tionyo ahi' mobagi hi gulu'nyo apaa na anu ma'ima' iwi-iwi', anu daagi'mo hi ia.

PO'ULE' INGULIT 18:8

Ia tionyo ahi' mohumpak anu okaan pokakana na konjoo'nyo susumo to ima-imam sangga'at; apaa na anu ihumpaknyomo hi to utu-utusnyo suele anunyomo.”

FILIPI 2:29

Jadi, talimamo na ia nu kinyonyoa sanang sumo samian na utus anu sampo palesaya. O'angga'i na mian iwi-iwi' anu sumo ia.

FILIPI 4:3

Toka hi sangalungku anu momo' hongo-hongo ku poita suele da kita Utus montulungi ua'-ua'aha na boune aijo'. Aha nokalajamo totu-totu'u tiba aku, nombebakon Lele Ma'ima' anu lengkat mae hi Tumpu; pokakana sumo i Kelemen ka' iwi-iwi' mian sangga'atan anu nokalajamo hingga-hinggat tiba aku. Sanggo nu aha haha aijo' daagi'mo i uno nu Kitab nu Mian Tumuu'.

1 TIMOTIUS 3:5

Kalana de mian madi' monsumbu' mongatun posi auwannyo, mosia na ia timbali mongatun jama'at nu Tumpu?

1 TIMOTIUS 4:10

Aijo' na sababnyo kita mompagala ahi' bala usaha mokalaja totu-totu'u, kalana kita montaha'imani ahi' totu-totu'u hi Tumpu Allah anu tumuu'; Iamo na anu Momposalamat iwi-iwi' na mian, ka' anu talalo hondo to mia-mian anu pinalesayamo.

1 TIMOTIUS 4:14

Boli beleyum batuk moluluk na mompake balakat lengkat hi Roh nu Tumpu anu binee'mo hi beleyum tempo'nyo to pola-polaya' nu jama'at nompotudumo lima nu aha atina' i ubakum, ka' to nabi-nabi nompokambotmo potuunon nu Tumpu mongkona butong nu beleyum.

1 TIMOTIUS 4:16

Ojagai na butongum ka' ojagai mule' na pangajalanum. Tionyo ahi' beleyum saja' mombau iwi-iwi' aijo', kalana tiba jalan anu sumo aijo' beleyum momposalamatmo mau posi butongum mau mule' to mia-mian anu mohongomo beleyum.

1 TIMOTIUS 4:6

De beleyum mongajanakon iwi-iwi' aijo' hi to Utu-utus anu sampo palesaya, beleyum timbalimo posaihon i Kristus Yesus anu ma'i-ma'ima' na mokalaja. Ka' beleyum tionyo ahi' saja' mompokopiani isi nu kinyonyoa nu beleyum nu potatae nu Tumpu Allah anu opalesayanto, ka' mule' to panga-pangajalan anu totu'u, ka' anu tinulutanumo sumo uukamo na kopinnyo.

1 TIMOTIUS 5:19

Boli monsitujui poosala' mongkona hi samian na polaya' nu jama'at, beilako' de nu pototu'umo nu ohua' na mian sakisi kabai molabi.

1 TIMOTIUS 5:3

O'adati na to balu-balu anu totu-totu'u me mosi tumuu' butong sausa'.

2 TIMOTIUS 2:6

Anu topo ale', anu mokalaja totu-totu'u iamo na momonanyo ko hak mohumpak hasin anu sinu'annyo.

2 TIMOTIUS 4:2

Tionyo ahi' beleyum saja' mompolele lele lengkat mae hi Tumpu Allah aijo', ka' sabole-bole opoita da mian mohongo pa' aha mongka'oho', kabai madi'. Tionyo ahi' beleyum bala usaha da mian palesaya totu-totu'u, mompoto'i kasala'an ka' mongkakeha'i aha. Pagala osabalakon na mongajan mian.

IBRANI 13:17

Obatuki na palentah nu to pola-polaya' miu, ka' otuluti na aha. Kalana aha saja' mompalahatikan santuu' miu, ka' aha mule' saja' ahi' mompalahatikan mosia na pakalaja'an nu Tumpu anu binaumo nu aha. De komiu montuluti aha, sanang na kinyonyoa nu aha mokalaja; de madi', tantu aha mokalaja susa' na kinyonyoa, ka' aijo' madi' mompo'untung komiu.

IBRANI 13:24

Potokakon na salan do'a mami toka hi iwi-iwi' na polaya' miu ka' toka hi mian iwi-iwi' anu palesayamo hi Tumpu. Talima suele na salan do'a lengkat mae hi to utu-utus anu kiijo' mae i Italia.

IBRANI 13:7

Boli okolilimi na to pola-polaya' miu anu mompotoka potuunon nu Tumpu hi belemiu. Opalahatikan mosia na aha tumuu' ka' mosia na aha silaka, ka' obau sonto' na iman nu aha.