1 TIMOTIUS 1:5 - KITAB NU TUMPU ALLA LELE MA'IMAI'

⁵ Kahanda' nu pokinde'ku aijo', atina'mo da mian timbali ko kinyonyoa anu ma'ima' ka' kinyonyoa anu ma'ima' ka' susi', tiba mule' totu-totu'u palesaya hi Tumpu, ka' tiba jalan anu sumo aijo' yo aha timbali mongkalibosi sangalunyo.

1 TIMOTIUS 1:5 ပူးပေါင်းရင်းမြစ်များ

MAZMUR 24:4

Mian anu madi' ko alunyo na pikilannyo ka' madi' mombau anu ma'idek, anu madi' mimpula-pula basumpa' ka' madi' monsombah pilogot.

MAZMUR 51:10

Sahanyo aku sola'mo mohongo lele anu lame', da kinyonyoa anu ihansunanmo nu Belento aiya po ule' ahi' montaligalai.

YEREMIA 4:14

O Yerusalem alinmo na palabuatan anu ma'idek anu lengkat ikinyonyoa nu beleyum da beleyum oposalamatmo. Sampe toka hipian na kopinnyo na pikilan toto ide-idek haha aijo' daagi' opo una' nu beleyum i uno nu kinyonyoa nu beleyum?

ZEFANYA 3:7

Aku bapikin, ‘Uuka aiya tantu mian-Ku anu pinalesayamo moholomatimo Aku ka' mompajulimo iwi-iwi' na pokinde'-Ku. Tantu aha monginau'mo pangajalan anu binee'-Kumo hi aha.’ Panyo taalu' aha ola mule' lebe ahi' mombau anu ma'idek lebemo molingkudui anu u'utu mae.

MATIUS 12:35

Mian anu ma'ima' montaloakon hahan anu ma'ima' kalana ia buke' nu ka'ima'an. Sumo aitumo na mian anu ma'idek montaloakon hahan anu ma'idek, kalana buke' nu ka'idekan.

MATIUS 5:8

Bila-bilahi na mian anu molino na kinyonyoanyo; aha monsumbu'je Tumpu!

SISIKON NU TO RASUL-RASUL 15:9

Tumpu montoa kita pokakana sumo aha. Ia nompobelesimo kinyonyoa nu aha, kalana aha palesaya.

SISIKON NU TO RASUL-RASUL 23:1

I Paulus nontonto'i to pangka-pangkat nu Mian Kopian Daka' nu Agama aijo', lantas notatae, “To Utu-utusku! Toka sinaa aiya aku madi' mongoa'i ko sala'nyo hi Tumpu i uno nu kinyonyoangku mongkona kantumuu'anku.”

SISIKON NU TO RASUL-RASUL 24:16

Mokonyo aijo' aku saja' bala usaha ima-ima', da kinyonyoangku belesi hi Tumpu, ka' belesi hi sangko mian.

ROMA 10:4

Atulan nu agama pinoko baumo i Kristus. Jadi batu-batu mian anu pinalesayamo hi Kristus, pompahasumbu'annyo tiba Tumpu mompo'ule'mo na'ima.

ROMA 12:9

Kalibosi nu kinyonyoa sanang. Opimpali na anu ma'idek, ka' mintoong i anu ma'ima'.

ROMA 14:15

Panyo de apaa na anu okaan nu kita Utus, samian na utus sangalunto anu bubuu' palesaya osakitimo na kinyonyoanyo, saba' kita Utus madi'mo mimpikilan molengkat i kinyonyoa anu molibos. De i Kristus sinilakamo bau kapentingan nu toto samian, boli mompojohok mian aijo' dumo ma'idek na kinyonyoanyo kalana nu saduakonmo nu anu okaan nu kita Utus.

ROMA 9:1

Apaa na anu kutaloakon aiya memang totu'u, kalana aku i Kristusmo na tumpunyo. Aku madi' baleko'. Kinyonyoangku anu pinotiju'mo nu Roh nu Tumpu mompohoson pikilanku, memang potataengku aiya totu'u.

1 KORINTUS 13:1

Mau mule' aku moko ala basisik tiba ngangahan basa' nu mian, kabai o tiba basa' nu malaikat, panyo aku madi' mongkalibosi mian sangga'at, saba' anu saja' kutaloakon aijo' ola onyi' anu linsingan panyo madi' ko alati'nyo.

2 KORINTUS 1:12

Kami sanang kalana kinyonyoa mami na mompohoson kami, saba' kantumuu'an mami i dunia aiya – anu talalo hondo pompahasumbu'an mami tiba kita Utus – pinojalanmo mami ma'i-ma'ima' ka' sahondo-hondonyo. Kami nombau aijo' misa' kalana kapandean nu mian, panyo kalana kahosonan anu binee' nu Tumpu Allah.

GALATIA 5:22

Sumo aitu mule' de to mia-mian nupotiju'mo nu Roh nu Tumpu Allah, kasawe'annyo aijo'mo: Aha mompaha kali-kalibosimo, aha lame'mo, aha madi'mo lewa' mombau apa-apaa; aha sabaanmo ka' monginau' sangalu, aha mongkanonongi mian sangga'at, aha tulu-tulutan,

GALATIA 5:6

Kalana de kita mosa'angu'mo tiba i Kristus Yesus, han mombatuki kabai madi' mombatuki atulan nu sunat, madi'mo mongkuka. Anu palalu hondo ola ahi' palesayamo hi Kristus, ka' aijo' oponyata' i uno nu kita mongkalibosi mian sangga'at.

PO'ULE' INGULIT 10:12

“Uuka aiya to Utu-utus, palahatikan apaa na anu nupoita nu Tumpu Allah nu belemiu hi belemiu: O'adati na Tumpu Allah nu belemiu ka' baumo iwi-iwi' na palentah-Nyo.

1 TIMOTIUS 1:18

Timotius, anakku! Kalaja aiya kupalesayakonmo hi beleyum, monginau' daagi' ko potuunon nu Tumpu anu pinotokakonmo nu to nabi-nabi i uno nu jama'at mongkona butong nu beleyum. Tionyo ahi' potuunon aijo' timbali bau mantu nu beleyum i uno nu usaha anu ma'ima'.

1 TIMOTIUS 1:19

Bala usaha mintoong i kapalesaya'an anu totu'u ka' obau ahi' nu kinyonyoa anu ma'ima' ka' susi'. Daagi' ko to mia-mian anu madi' montapali posi isi nu kinyonyoanyo anu ma'ima', sahingga natemo na kapalesaya'an nu aha.

1 TIMOTIUS 3:9

Aha tionyo ahi' montoongi kinyonyoa anu ma'ima' ka' belesi' i ajalan kapalesaya'an nu mian Kristen anu pinonyata'mo nu Tumpu Allah.

2 TIMOTIUS 1:3

Aku montalima kase hi Tumpu anu binaungkumo na palentahnyo nu kinyonyoa anu ma'ima' sumo anu binaumo nu mompolee'ku naipuan mae. Aku saja' montalima kase hi Tumpu ka' ku inau' na beleyum i uno nu do'a, mau sinaa mau mule' pihi.

2 TIMOTIUS 1:5

Aku tonginau' i kapalesaya'anum anu totu-totu'u hi Kristus, pokakana sumo kapalesaya'an nu kele'um i Lois ka' tinaum i Eunike. Ka' kupalesaya hondo-hondo beleyum mule' palesaya sumo aijo'.

2 TIMOTIUS 2:22

Pimpali na kasanangan nu mian anu daagi' olitau. Bala usaha da kantumuu'an mombatuki pongka'oho' nu Tumpu, tulu-tulutan i pangajalan-Nyo ka' mongkalibosi sangko mian, ka' mule' kinyonyoa sanang. Tumuu'mo sumo aijo' tiba aha anu mongkakase momoita tulung hi Tumpu i uno nu kinyonyoa anu ma'ima'.

TITUS 1:15

Iwi-iwi na apaa susi' kona hi to mia-mian anu susi'. Panyo kona hi to mia-mian anu pikilannyo mahenyu ka' anu madi' palesaya, madi' hondo-hondo ko anu susi', kalana pikilan ka' kinyonyoa nu aha nahenyumo!

IBRANI 10:22

Kalana aijo', imbo' da kita mongohanimo Tumpu ka' kinyonyoanto hodi'mo ka' palesayamo totu-totu'u; ka' kinyonyoanto anu pinosusi'mo ka' madi'mo ko kasala'an o oa'i, ka' butongto pinobelesi'mo nu uee anu molino.

IBRANI 13:18

Saja' odo'akon mae na kami. Otutugi mami, kinyonyoa mami totu-totu'u hodi', kalana iwi-iwi na han saja' anu totu'u na obau mami.

IBRANI 9:14

Yo, de baso' tiba abu'nyo aijo' moko ala mompobelesi kahenyuan nu to mia-mian, apaa mule' baso' i Kristus. Kalana kuasa nu Roh anu sampe toka sidu-sidutu', i Kristus nonsombahkonmo posi butong-Nyo hi Tumpu salaku koloban anu ma'ima'. Baso'-Nyo mompobelesi kinyonyoanto da bolimo mombau atulan nu agama anu madi' kogunanyo, da kita timbali mombau palentah nu Tumpu anu tumuu'.

YAKOBUS 4:8

O'ohani na Tumpu, da Tumpu suele mongohanije komiu. Obaso'i na lima miu, komiu anu baladosa'! Ka' opolino na kinyonyoa miu, komiu anu mopanga' na kinyonyoa!

1 PETRUS 1:22

Kalana komiu tulu-tulutan i pangajalan anu lengkat mae hi Tumpu, jadi belemiu mompolomas ahi' butong, ka' halala' ahi' na mongkalibosi to mia-mian anu bubu'mo pokakana na kapalesaya'an. Kalana aijo' tionyo ahi' kinyonyoa miu mompaha kali-kalibosi totu-totu'u samian ka' samian.

1 PETRUS 3:16

Panyo obau ahi' na aijo' nu ima' ka' mingadat. Ka' kinyonyoa komiu opohodi' ahi', da de belemiu opitana'i kalana belemiu tumuu' ma'ima' salaku anu mombatuki i Kristus, saba' mian anu mompitana'i aijo' timbali mosi pa'ambangje.

1 PETRUS 3:21

Jadi, anu tinimbali aijo' susumo ibalatnyo palamandian anu tempo' uuka aiya momposalamat belemiu. Palamandian aijo' misa' sa'angu' na jalan mompolomas butong songko-songko anu kudulon, panyo salaku janji' miu hi Tumpu lengkat i kinyonyoa anu ma'ima'. Palamandian aijo' momposalamat belemiu kalana i Yesus Kristus sinilaka po'ule'mo pinotumuu',

1 PETRUS 4:8

Mompaha kali-kalibosi totu-totu'u samian ka' samian, aijo' na lebe molingkudui iwi-iwi' kalana de mompaha kali-kalibosi belemiu suele timbali mompaha ampu-ampuni.

2 PETRUS 1:7

Ka' tumuu' mombatuki pongka'oho' nu Tumpu tionyo ahi' otiwai nu mongkalibosi to utu-utus anu pokakana na iman. Ka' mule' de komiu mongkalibosi to utu-utus anu pokakana na iman tionyo ahi' otiwai nu mongkalibosi iwi-iwi'na mian.

1 YOHANES 3:10

Aiya na pompaha sala'annyo, to ana-anak nu Tumpu tiba to ana-anak nu Ibilis; ihehe na madi' mombau pongka'oho' nu Tumpu, kabai madi' mongkalibosi Utusnyo, ia misa' anak nu Tumpu.

1 YOHANES 3:23

Anu pinalentahkon-Nyomo hi kita atina'mo: Kita tionyo ahi' palesaya hi Anak-Nyo, aijo'mo i Yesus Kristus ka' kita tionyo ahi' mompaha kali-kalibosi, susumo anu pinalentahkonmo i Kristus hi kita.

1 YOHANES 3:3

Iwi-iwi' na mian anu montaha'imani i Kristus susumo aiya, mompokopiani ahi' butongnyo da totu-totu'u susi', belesi' madi' baladosa' sumo i Kristus susi'.