Panyo' O Tumpu Allah, pa' totu-totu'u ahi sanang na Belento jojoong i dunia aiya? Mau langit songko-songko madi' sampa' na ko ewanyo bau kajojoongan nu Belento apaa mule' ola laigan bau ponsomban anu binaungkumo aiya!
Lantas aku notataemo, “Silakamo! Madi'mo daagi ko anu ku taha'imani kalana nganga'ku nahenyumo nu dosa' ka' aku jojoong hi aha bansa anu suele susumo aijo'mo. Maumo sumo aijo' posi matangkumo na nontoa Tomundo', aijo'mo Tumpu Anu Daka' na Kuasanyo!”
Lapas aitu posaihon anu nontalima samadala na doi mosoni' aijo' tinokamo, ka' notatae, ‘Kita Tuan, kusumbu' kita Tuan mian anu masigo. Kita Tuan mompadak bua'nyo i tampat anu madi' sinu'anan nu kita Tuan, ka' mongala hasinnyo i tampat anu madi' sinu'anan bine' nu kita Tuan.
Lantas aha mian nu Bet-Semes notataemo, “Ihe na moko ala tuminjo i ahop nu Tumpu, Tumpu Allah Anu Susi' aijo'? Iya na pomboan Peti' aijo' da majo'on lengkat hi kita?”