1 SAMUEL 6:14 - KITAB NU TUMPU ALLA LELE MA'IMAI'

¹⁴ Loda aijo' madi'mo i lumajang salatan tinokamo i batu anu daka-daka' koko ale' i Yosua mian nu aha Bet-Semes. Mian anu jojoong ikota' aijo' nombiha-biha'mo kau' nu loda aijo' lantas nongkolotmo sapi' aijo' ohu-ohua' binau koloban anu opotunu ka' sinombahkonmo hi Tumpu.

1 SAMUEL 6:14 ပူးပေါင်းရင်းမြစ်များ

2 SAMUEL 24:18

Ka' suele i Gad tinokamo sinaa aitu nangadap hi Daud ka' notatae hi ia, “Tionyo ahi' belento Tomundo' pindakomo mokiita' i tampat ponggilingan gandum anu i Arauna, ka' potinjo na mezba bau ponsomban Tumpu.”

2 SAMUEL 24:22

Notatae na i Arauna, “Alamo Tomundo' madi' opai oli ka' sombahkonmo hi Tumpu apaa na anu o'oa'i nu belento ma'ima' Tomundo'. Aiya na sapi' bau koloban anu opotunu ka' kau' anu oposun nu belento Tomundo', alamo na pulu nu pajeko ka' dopi' haha aijo' anu binau pongututan.”

2 SAMUEL 24:25

Lantas pinotinjomo i Daud na mezba i kiijo' ponsomban Tumpu lantas nonsombahkonmo koloban anu pinotunu ka' koloban anu bau pompodame. Tumpu nontalimamo do'a i Daud ka' panyakit anu momolele aijo' i Israel madi'mo nolele.

1 TOMU-TOMUNDO' 19:21

I Elisa po'ule'mo ninsusule' i ale'nyo lantas pinahangkolotakonnyomo na sapi'nyo iwi-iwi'. Kau' nu pajekonyo pinosunnyomo bau pinongunjang antoknyo nu sapi' haha aijo'. Lapas aijo' pinaha bagi-bagiakonnyomo na antoknyo haha aijo' hi to mia-mian anu mokalaja hi ia, ka' kinaanmo nu aha. Lapas aijo' i Elisa nambamo nombatuki i Elia ka' tinimbalimo sangalunyo anu saja' montulungi ia.

NOSABATMO 20:24

Baui na Aku sa'angu' na mezbah te tano' na obau lantas sombahkonmo ikiijo' domba ka' sapi' nu belemiu bau koloban anu otunui ka' koloban bau pompodame. Maumo pa'ia mae na tampat anu Ku tantukan hi belemiu salaku tampat ponsomban Aku, Aku tionyo mae toka ka' mombalakati belemiu.

TO MIA-MIAN KOPIAN 21:4

Dodododopnyo subu-subu hondo mian nu Israel nompotinjomo sa'angu' na mezbah i kiijo' lantas nonsombakkonmo hi Tumpu koloban anu opotunu tiba koloban bau pompodame.

TO MIA-MIAN KOPIAN 6:26

Potinjo i tambulannyo aijo' sa'angu' na mezbah anu lewa'mo tinutugan ima-ima'. Lapas aitu sapi' lakinyo aijo' iwi-iwi' tionyo ahi' nu potunu salaku bau koloban hi Tumpu. O ala na ohi' anu binau pontandai Pilogot boune Asyera anu tinua'akonmo nu beleyum aijo' da bau kau' anu oposun.”

1 SAMUEL 11:5

Tempo'nyo aijo' i Saul salaje tinoka lengkat mae i ale' nomboa mae sapi'nyo. Ia nompokilawamo, “Apaamo uuka? Kadaka' iwi-iwi' na mian lewa'mo i humang?” Lantas pinoto'imo nu aha hi ia na lele anu binoa mae nu mian anu sinai mae lengkat i Yabesh.

1 SAMUEL 20:29

Pinoto'inyo tukoonyo, 'Pobee' pe'e mae na aku mamba, kalana to utu-utusku daagi mombau bau-bauon koloban kiijo' i Betlehem ka' aku ilaga mae nu to utu-utusku tu'a da mamba. Kalana aijo' de nu pobee' mae da aku mamba pe'e singkabot tiba to utu-utusku.' Mokonyo aijo' ia madi' tinoka nongkaan aiya, kita Tuuma.”

1 SAMUEL 6:13

Tempo'nyo aitu mian anu jojoong i Bet-Semes hau-haunyomo mompadak gandum i bangka'nyo. Salatan tinoa nu aha na Peti' Palajanjian aijo', aha ilame'mo na nolabot.