1 SAMUEL 30:6 - KITAB NU TUMPU ALLA LELE MA'IMAI'

⁶ To sulu-suludadu i Daud sinusa'mo hondo kalana madi'mo kino anak tiba bengkele' nu aha. Mokonyo aijo' aha kahanda'mo mompahambunu'akon nu batu i Daud. Jadi i Daud sinusa'mo hondo panyo kinyonyoanyo po ule'mo pinohoson nu Tumpu Allahnyo.

1 SAMUEL 30:6 ပူးပေါင်းရင်းမြစ်များ

KAJADIAN 32:7

Nohongo aijo' i Yakub nabuhukmo hondo ka' binata-batamo. Lantas to mia-mian anu kiijo' hi ia binaginyomo binau ohua' na tompukan, sumo aitu mule' na dombanya, mee'nyo, sapi' ka' untanyo.

2 SAMUEL 17:8

Belento Mian Daka' tantu monsumbu'mo i Daud tiba to sulu-suludadunyo baani hondo na mahampate. Ko baaninyo nu aha sumomo ahi' tinanyo nu beruang anu nolapusmo na anaknyo. Ka' mule' i Daud anu saja'mo nahampate, jadi ia pinandemo ahi' na mahampate, madi'mo toho' hoyot maninggalum tiba to sulu-suludadunyo.

2 TOMU-TOMUNDO' 4:27

Panyo salatan tinokamo i ahop hi Elisa, ia tinolodadupumo ka' nontanggogolimo tengke i Elisa. I Gehazi kahanda' mohela' ia da boli sumo aijo', panyo i Elisa notataemo, “Pojohokmo! Ia aijo' sinusa'mo hondo na kinyonyoanyo. Panyo Tumpu madi' nompoto'i apa-apaa hi belengku!”

AYUB 13:15

Aku sabinmo, kalana madi'mo ko anu otaha'imani! De nu silakaimo nu Tumpu Allah na aku, ku halala'akonmo na butongku aiya, panyo ku poto'i ahi' na kahondoan nu kalakuanku i ahop-Nyo.

MAZMUR 116:10

Aku sabole-boleh palesaya, mau mule' aku notataemo, “Aku talalomo hondo nongoa'i kasansala'an.”

MAZMUR 138:3

Salatan aku nongkakasemo hi Belento, Belento nontaamimo mae, pinohosonmo nu Belento na kinyonyoangku sahingga aku binaanimo.

MAZMUR 18:2

Ku ka'ima'i na Belento, o Tumpu, Belentomo na tinimbali kahosonanku.

MAZMUR 18:6

Aku tinikubanmo nu balaa anu monsilakaimo, bau pohakop nu anu monsilakaimo ingahopankumo.

MAZMUR 25:17

Kasusa'an nu kinyonyoangku mompaka pintuangmo po'uhanakonmo mae na aku da madi'mo sansala.

MAZMUR 27:14

Sabole-bole ahi' taha'iman hi Tumpu, pohoson ka' bolimo mongabali' na kinyonyoa nu beleyum; ingat, sabole-bole ahi' taha'iman hi Tumpu.

MAZMUR 31:24

Ka'ima'i na Tumpu o iwi-iwi' na mian anu palesayamo hi Ia, Tumpu na monjagai mian anu tulu-tulutan hi Ia. Panyo mian anu takabun na Nu hukum ahi' madi' ka' madi'.

MAZMUR 42:11

Kinyonyoangku nohintutumo hondo kalana sola'mo mae nu kokojoi nu sampobali', Aha saja'mo mae mompokilawa, “Iyamo mae na Tumpu nu beleyum?”

MAZMUR 42:5

Kinyonyoangku susa'mo de tonginau'mo naipuan mae, salatan aku mambamo i Laigan nu Tumpu, hingga-hinggat tiba mian da'i-da'isan anu mombaumo lamean. Aku ilumajang mamba momona hi aha anu lumajang lame-lame' lewa' montaligalai ka' manyanyi bau pompuji' Tumpu.

MAZMUR 42:7

Itano' pinomboan mae aiya kinyonyoangku nohintutumo hondo, kalana aijo' aku tinonginau'mo hi Tumpu. Santuu'ku na'anjumo isolok nu kasusa'an aku inganjuhakonmo nuiaba' mompokalangkabut; sumomo ahi' buhok nu uee Kaunyo nu Yordan itampat anu masolok lengkat mae i bungkutnyo nu Hermon tiba Bungkutnyo nu Mizar.

MAZMUR 56:11

Aku mompuji'mo Tumpu, kalana apaa na anu jinanji'Nyomo.

MAZMUR 62:1

Anu mongkapalai panyanyi. Ingala i lagu: Yedutun. Mazmur i Daud.

MAZMUR 62:5

Belemiu ola batanga' monabu'akon ia da madi'mo talasanggo na sanggonyo. Belemiu mongka'ima'imo baleko'; nganga' nu belemiu montaloakon mombalakati, panyo i uno nu kinyonyoa nu belemiu montotobi'akon.

MAZMUR 71:4

O, Tumpu-ngku potumuu'akon mae na aku da madi' nusilakai nu mian anu ma'idek na kinonyoanyo, i kuasa nu to mia-mian anu uesan ka' buhingison.

MAZMUR 71:5

Kalana Belentomo na anu ku taha'imani o, Tumpu, o, Tumpu, aku pinalesayamo hi Belento salatanmo pe'e aku daagi' olitau.

NOSABATMO 17:4

Lantas i Musa notataemo hi Tumpu, ia notatae, “Apaa na anu tionyo ku bau hi mian haha aiya? Pitoa, aha mongka'oho'mo mompobunu'i mae nu batu.”

AMSAL 18:10

Tumpu aijo' sumo laigan tangka-tangkas anu mahoson hondo; mokiijo'mo na kalambanan nu mian anu madi' tageo' na kinyonyoanyo da mohumpak tampat anu madi'ko anu mompoposia.

YESAYA 25:4

Kalana Belento baumo palaian nu to mia-mian anu madi' mahoson, tampat anu madi' ko mian mompoposia hi aha mian anu kasiasi i uno nu kasusa'an. Belentomo na bau pihohungan de ko baleba' makansang, ka' pingkongan de talalo mapengges na singit. Kalana mian anu buhingison de montumbuhi pokakanamo ahi' susumo anton daka' itempo' nu ehua, susumo mombun mapanas itano' anu kuunmo.

YEREMIA 16:19

O Tumpu, Belentomo na nonjagaimo mae aku ka' nombee'imo mae kahosonan hi belengku; Belento nontulungimo mae aku tempo'nyo i uno nu kasusa'an. To bansa-bansa lengkat mae ipuus nu tano' tokamo mae hi Belento ka' motatae, “Mompolee' mami daagi' ko pilogot anu madi' totu'u ka' madi' ahi' hondo-hondo kokaliangannyo.

YUNUS 2:2

“O Tumpu, i uno nu kasusa'anku aku motataemo hi Belento. Ka' Belento nontaamimo mae aku. I dunia nu mian anu sinilakamo aku nomoitamo tulung. Apaa na anu pinoitangkumo ihongomo nu Belento ka' pinalahatikanmo nu Belento.

NOMBILANGMO 14:10

Iwi-iwi' na mian da'isan mongkahanda'imo mompahambunu'akon aha nu batu sampe mate. Panyo monti-montiik mian haha aijo' nontoamo jingka nu Tumpu tinokamo aijo' i Kemah-Nyo.

MATIUS 21:9

Mian da'isan anu ilumajang i moona ka' anu i mihi hi Yesus molo-moloboo', “Tumuu'mo na Anak i Daud! Obalakatiakon na Ia anu tinoka tiba sanggo nu Tumpu! Puji' na Tumpu Anu Matangkas na Kuasanyo!”

MATIUS 27:22

“Desumo aitu, apaa na kubau hi Yesus anu osanggohi Kristus?” i Pilatus nompokilawa hi aha. “Salibmo na Ia!” tinaaman nu aha iwi-iwi'.

YOHANES 8:59

Lantas to mia-mian nu Yahudi aijo' nontoluk batu bau pombunu'-Nyo; panyo i Yesus naninsulukmo, lantas nambamo nompala'i Laigan nu Tumpu.

ROMA 4:18

I Abraham ola saja' taha'iman ka' palesaya mau mule' madi'mo nupoko ala nu butongnyo. Kalana aijo' ia tinimbali tuuma nu manjoo' na bansa. Sumo tinulis i uno nu Kitab nu Tumpu, “Lee'um timbali da'isan hondo.”

ROMA 4:20

Ia tataap palesaya ka' madi' bata-bata i janji' nu Tumpu Allah. Ola o kalana palesayanyo nompotimbalimo ia da mompaka pahoson, sahingga ia saja' mompuji' Tumpu.

ROMA 8:31

Apaa na anu opoko taloakon uuka aiya mongkona iwi-iwi' aijo'? De Tumpu mosambiha' hi kita, ihena moko ewa kita?

2 KORINTUS 1:6

De kami mongoa'i kasusa'an, aijo' bau pompohoson kinyonyoaum da bau kasalamatanum. De kinyonyoa mami opohosonmo, saba' komiu suele opohosonmo sahingga komiu timbali sabaan mongoa'i iwi-iwi' na kasusa'an susumo suele anu ingoa'anmo kami.

2 KORINTUS 4:8

Iwi-iwi'mo na han baumo pompahantuda'akonan kami, panyo kami madi' momosia. Mingkotmo na pikilan mami, panyo kami madi' ma'osa.

2 KORINTUS 7:5

Tempo'nyo mule' kami tinoka i Makedonia, kami madi' toho' kino kasampatan nilawe. Iwi-iwi' na han pinohumpakanmo mami kasusa'an: lengkat mae hi sangga'atan mompainggagakon, i uno nu kinyonyoa nabuhukmo.

IBRANI 13:6

Kalana aijo' kita baani ahi' na motatae, “Tumpu na anu Montulungi mae aku, aku madi' mabuhuk. Apaa na anu nu poko ala nubau nu mian hi belengku?”

TO MIA-MIAN KOPIAN 18:25

Koonyo nu mian haha aijo' tulunan nu bansa Dan, “Sahanyo gintumi na nganga'; da boli mian haha aijo' motambuha' ka' montumbuhimo beleyum. Dumo beleyum ka' iwi-iwi' na to utu-utus nu belemiu silaka.”

TO MIA-MIAN KOPIAN 20:22

Kalana aha nahungku'mo sumo aijo', nambamo na aha mian nu Israel i tampat ponsomban Tumpu lantas i humangmo hi Tumpu sampe i nalom kiijo' mae. Aha nompokilawamo, “O Tumpu, pa' daagi' tionyo ahi' kami mamba mompahampateakon to utu-utus mami mian nu aha Benyamin haha aijo'?” Tumpu nontaami, “Ii' lako'mo.” Mokonyo aijo' suludadu nu aha Israel binaanimo mule', sahingga aha po'ule' mule' nomposadia suludadu nu aha susumo sinaa momonanyo.

1 SAMUEL 23:16

I Yonatan nambamo nokiijo' nonsingkaboti ia da mompohoson kinyonyoanyo da palesaya ahi' totu-totu'u kalana Tumpu Allah saja' monjagai ia.

1 SAMUEL 28:15

Lapas aijo' i Samuel notataemo hi Saul, “Kadaka' beleyum nolingkangmo mae aku? Kadaka' beleyum nolaga mule' mae aku?” Tinaaman i Saul, “Aku biningongmo hondo kalana nu tumbuhimo mae nu aha mian Filistin, padahan aiya Tumpu Allah nompala'imo aku. Aku madi'mo mae tinaaman-Nyo kabai pinot'i-Nyo mae hi to nabi-nabi kabai pinoipi-Nyo mae. Kalana aijo' ku kakaase hi belento Tuuma poto'i mae pa' apaa na anu tionyo ahi' kubau.”